މާލޭގެ ގެއަކުން އިއްޔެ އިލްކެޓްރޯނިކް ސާމާނުތަކެއް ވަގަށް ނެގި މައްސަލައިގައި ދިވެހި ދެ ފިރިހެނުން ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ މ. ދާރުލްގަރާރު، އިސްމާއިލް ވިޝާލް (30އ) އަދި ވިދުވަރު، ބ. ދަރަވަންދޫ، ހުސައިން ޝާއިފް (32އ)އެވެ.
މި މައްސަލައާ ގުޅިގެން މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، އިއްޔެ ހަވީރު 16:05 ހާއިރު މާލެ ގެއެއްގެ ތެރޭގައި ހުރި މީހެއް އަތުން ވަގަށް ނަގާފައިވާ ކަަމަށް ޝައްކުކުރެވޭ އިލެކްޓްރޯނިކް ސާމާނުތަކެއް އެ ދެ މީހުންގެ އަތުން ފެނުނު ކަމަށެވެ.
އެ މައްސަލައިގެ ތުހުމަތުގައި އެ ދެ ފިރިހެނުން ހައްޔަރުކޮށްފައިވާ ކަަމަށް ފުލުހުން މައުލޫމާތުދިނެވެ.
މި މައްސަލަ ފުލުހުން ގެންދަނީ ތަހުގީގުކުރަމުންނެވެ.
މި ފަހަކަށް އައިސް ވައްކަމާއި ފޭރުމުގެ އިތުރުން މާރާމާރީގެ މައްސަލަތައް ވަނީ އިތުރުވެފައެވެ. އަދި، ފުލުހުން ގެންދަނީ އެ މައްސަލަތަކުގައި ހައްޔަރުކުރާ ފަރާތްތަކުގެ ވަނަވަރު ހާމަކުރަމުންނެވެ.