އަންނަ ނޮވެމްބަރު މަހު އަޒަރުބައިޖާން އެއާލައިންސްއިން ރާއްޖެއަށް ފުރަތަމަ ފަހަރަށް ސީދާ ދަތުރުތައް ފަށަށް ނިންމައިފިއެވެ.
ޓްރެވަލް އެންޑް ޓުއާ ވޯލްޑް (ޓީޓީޑަބްލިއު) އިން ރިޕޯޓުކޮށްފައިވާ ގޮތުގައި އަޒަރުބައިޖާންއިން ރާއްޖެއަށް ސީދާ ދަތުރުތައް ފަށަން ނިންމާފައި ވަނީ ނޮމެވްބަރު މަހުގެ އަށް ވަނަ ދުވަހުއެވެ.
އެ ތާރީޚުން ފަށައިގެން، ކޮންމެ ހަފުތާއަކު އަޒަރުބައިޖާންގެ ވެރިރަށް ބަކޫއިން ވެލާނާ އިންޓަނޭޝަނަލް އެއާޕޯޓަށް ހަފުތާއަކު ދެ ދަތުރު ކުރާނެއެވެ.
މި ދަތުރުތަކުގައި އަޒަރުބައިޖާން އެއާލައިންސްއިން ބޭނުންކުރުމަށް ހަމަޖެހިފައި ވަނީ ބޯއިން 787 ޑްރީމްލައިނާ މަރުކާގެ މަތިންދާބޯޓުތަކެވެ. މިއިން ކޮންމެ ދަތުރަކަށް ހަ ގަޑިއިރު ހޭދަވާނެއެވެ.
ފުރަތަމަ ދަތުރުތަކުގެ ޓިކެޓް މިހާރުވެސް ލިބެން ހުރިއިރު، ޓިކެޓެއްގެ އަގަކީ ދެކޮޅަށް 633 ޑޮލަރެވެ.
އެ އެއާލައިނުން ފާހަގަކުރާ ގޮތުގައި މިއީ އެ އެއާލައިންގެ ރޫޓް ނެޓްވޯކް ވަރަށް ބޮޑަށް ފުޅާވެގެންދާނެ ކަމެކެވެ. އެކަމުގެ ސަބަބުން ދަތުރުވެރިންނަށް ރީތި ގޮނޑުދޮށްތަކާއި ލަގްޒަރީ ރިސޯޓްތަކަށް ދިއުމުގެ ފުރުސަތު ލިބިގެންދާނެއެވެ.
ގިނަ އެއާލައިންތަކަކުން އަންނަނީ ރާއްޖެއަށް ދަތުރުތައް ފައްޓަމުންނެވެ. ފާހަގަކޮށްލެވޭ ގޮތުގައި މި ފަހުން ރާއްޖެއަށް އެންމެ ގިނަ ޓޫރިސްޓުން އަންނަ، ޗައިނާގެ ޒިއަމެން އެއާލައިންސްއިން ވެސް ވަނީ ވެލާނާ އިންޓަނޭޝަނަލް އެއާޕޯޓަށް ޝެޑިއުލް ދަތުރުތައް ރަސްމީކޮށް ފަށައިފައެވެ. އަދި ޗައިނާގެ ޗޮންޗިން އެއާލައިނުން ވެސް މިދިޔަ ޖޫން މަހު ވަނީ ރާއްޖެއަށް ދަތުރުތައް ފަށައިފައެވެ.