ދިވެހި ފުލުހަކު އަންހެނަކަށް އަނިޔާކޮށް، މަރުގެ އިންޒާރުދިން މައްސަލައެއް ދިވެހި ފުލުހުންގެ ޚިދުމަތުން ބަލަން ފަށައިފިއެވެ.
މިކަމާ ގުޅިގެން ފުލުހުންގެ މީޑިއާ އޮފިޝަލަކު "ސަން"އަށް ވިދާޅުވީ، އެ މައްސަލަ ފުލުހަށް ހުށަހަޅާފައި ވާކަމަށެވެ. އެހެންކަމުން އޮންނަ ގަވާއިދުގެ ތެރެެއިން އެ މައްސަލަ ތަހުގީގު ކުރަމުން އަންނަ ކަމަށް އޭނާ ވިދާޅުވިއެވެ.
އެ ފުލުހުންގެ މީހާ އަންހެނަކަށް ބިރުދައްކާ މަރުގެ އިންޒާރުދޭ ކޯލް ރިކޯޑިންތައް ސޯޝަލް މީޑިއާގައި ދަނީ ދައުރުވަމުންނެވެ. އަދި އޭނާ އަންހެން މީހާއަށް ކޮށްފައިވާ މެސެޖުތަކުގެ ސްކްރީންޝޮޓްތަކެއް ވެސް ދަނީ ދައުރުވަމުންނެވެ.
މިކަމާ ގުޅިގެން އަނިޔާ ލިބުނު އަންހެން މީހާ ސޯޝަލް މީޑިއާގައި ލިޔެފައި ވާގޮތުން، ފުލުހުންގެ މީހާގެ ފަރާތުން އޭނާއަށް ވަނީ މަރުގެ ހަމަލާތައް ވެސް ލިބިފައެވެ.
އޭނާ ވަނީ މިފަދަ މީހަކު ދިވެހި ފުލުހުންގެ ޚިދުމަތުގައި އުޅޭތީ އެކަމުގެ ކަންބޮޑުވުން ފާޅުކޮށްފައެވެ. އަދި ގާނޫނާއި ގަވާއިދުގެ ތެރެއިން މި މައްސަލަ ބެލެންޖެހޭނެކަން ފާހަގަކޮށް އޭނާ ވަނީ، އެކަށީގެންވާ މިންވަރަށް ހެކި އުރި އިރު ވެސް އޭނާގެ މައްޗަށް ދައުވާ ނުކުރަނީ ކީއްވެގެންތޯ ސުވާލުކޮށްފައެވެ.
"މިދިޔަ މަހުގެ 25ވަނަ ދުވަހު ޕީޖީ އަޅުގަނޑަށް ފޯނުން ގުޅާފައި ދެންނެވި ކުރިއަށް އޮތް ދެ އަހަރުތެރޭ އޭނާގެ އެއްވެސް އުނދަގުލެއް އަޅުގަނޑަށް އައިސްފި ނަމަ މައްސަލަ ކޯޓަށް ފޮނުވާނަމޭ،" އޭނާ ލިޔެފައި ވެއެވެ.
މިއީ ރާއްޖޭގެ އަދުލުއިންސާފުގެ ނިޒާމު އޮންނަންޖެހޭ ގޮތްތޯ އޭނާ ވަނީ ސުވާލު އުފައްދައިފައެވެ. އަދި އޭނާ އަބަދު ވެސް ހުންނަނީ ބިރުވެރިކަމެއްގެ ތެރޭގައި ކަމަށް ވެސް ލިޔެފައި ވެއެވެ.