އިންޑިއާގެ އެންމެ ކާމިޔާބު ބަތަލާއިންގެ ތެރޭ ހިމެނޭ ދީޕިކާ ޕަދުކޯން ބަލިވެއިންކަން އިއުލާނުކުރުމާ އެކު ވަރަށް ގިނަ ބަޔަކު އުފާފާޅުކޮށް ދީޕިކާއާއި ފިރިމީހާ ރަންވީރު ސިންގްއަށް ތަހުނިޔާއާއި މުބާރަކްބާދީ ކިޔެވެ. އެކަމަކު، އޭގެ ފަސް ހަ މަސް ފަހުން ދީޕިކާ އާއްމުންގެ ތެރެއިން ފެންނަން ފެށުމުން އާއްމުންގެ ބަޔަކު ވަނީ ބަތަލާ ބަލިވެއިން ވާހަކަ އަކީ ތެދު ވާހަކައެއް ނޫންކަމަށް ބުނެފައެވެ.
ޚާއްސަކޮށް ހަ މަހުގެ ބަނޑަކާ އެކު އާއްމުންގެ ތެރެއިން ދީޕިކާ ފެންނަން ފެށުމުން އިންޓަނެޓުގައި ޓްރޯލްކުރި ބައެއް މީހުން ބުނީ ދީޕިކާގެ ހިނގުމާއި ހަރަކާތްތައް ހުރީކީ މާބަނޑު އަންހެނަކުގެ ހުންނާނެ ގޮތަކަށް ނޫންކަމަށާއި ދީޕިކާގެ ދެމަފިރިން ކުއްޖަކު ހޯދީ ސަރޮގޭސީ މެދުވެރިކޮށް ކަމަށެވެ. ބެލުންތެރިންގެ ފަރާތުން ސަމާލުކަން ހޯދުމަށް ދީޕިކާ 'ފޭކް ޕްރެގްނެންސީ' ޚަބަރުތައް ފަތުރަނީ ކަމަށް ވެސް ބައެއް މީހުން ބުނެފައިވެއެވެ.
ނަމަވެސް، ޓްރޯލްކުރި މީހުންގެ ވާހަކަތަކަށް ނިމުމެއް ގެނެސްދިނީ މީގެ ދެ ދުވަސް ކުރިން ދީޕިކާގެ ސޯޝަލް މީޑިއާގައި ޕޯސްޓުކުރި މެޓާނިޓީ ފޮޓޯޝޫޓެވެ. ވިހެއުމުގެ މުއްދަތު ކައިރިވުމުން ހަނދާނަކަށް ރައްކާކުރުމަށް ނަގާ ޚާއްސަ މެޓާނިޓީ ފޮޓޯ ޝޫޓުގެ ފޮޓޯތައް ބައެއް ފިލްމީ ތަރިން އާއްމު ނުކުރެއެވެ.
ދީޕިކާގެ މެޓާނިޓީ ފޮޓޯ ޝޫޓުގެ ބައެއް މަންޒަރުތައް--ފޮޓޯ/ބޮލީވުޑްހަންގާމާ
ގިނަ ބަޔަކު އުއްމީދުކުރީ ވެސް ބަތަލާ ދީޕިކާއަކީ އިންޑިއާގެ ދެކުނަށް ނިސްބަތްވާ ބަތަލާއަކަށްވުމުން އެ ހިސާބުގެ ސަގާފަތަށް ލޯބިކުރުމުގެ ގޮތުން މެޓާނިޓީ ފޮޓޯތައް އާއްމުނުކުރާނެ ކަމަށެވެ. އެހެންނަމަވެސް، ގިނަ ބަޔަކަށް ސިހުން ލިބުނީ ވަރަށް 'ޕްރައިވެޓް' މި ފޮޓޯތައް ސޯޝަލް މީޑިއާއަށް ދޫކޮށްލުމުންނެވެ.
ދީޕިކާއާއި ރަންވީރު ސިންގް އެކީގައި ނަގާފައިވާ ފޮޓޯތައް ސޯޝަލް މީޑިއާއަށް ދޫކޮށްލުމާ އެކު ގިނަ ބަޔަކު ބުނެފައިވަނީ މިއީ ބަތަލާގެ 'ފޭކް ޕްރެގްނެންސީ ޚަބަރު' ފެތުރި މީހުންނަށް ދިން ވަރަށް ވަރުގަދަ މެސެޖެއް ކަމަށެވެ. ދީޕިކާ ވިހާނެ ތާރީޚެއްގެ ގޮތުގައި ބުނެފައިވަނީ މި މަހުގެ 28 ވަނަ ދުވަހެވެ. ރިޕޯޓުތައް ބުނާގޮތުން ދީޕިކާ ވިހެއުމަށް ދާނެ ކަމަށް ބެލެވެނީ އިނގިރޭސިވިލާތުގެ ލަންޑަނަށެވެ.