ބާ ކައުންސިލްގެ އެގްޒެކްޓިވް ކޮމިޓީގައި ބަންޑާރަނައިބު ނުހިމެނޭގޮތަށް ގާނޫނީ ފަންނުގެ ގާނޫނަށް ގެނައި އިސްލާހަކީ ވަކީލުންގެ ކަންކަން ރެގިއުލޭޓް ކުރުމުގެ ބާރާއި މިނިވަންކަން ވަކީލުން އައްޔަނުކުރާ ބަޔަކަށް ލިބިދިނުމަށް އެޅުނު މުހިންމު ފިޔަވަޅެއް ކަމަށް ބަންޑާރަނައިބު އަޙުމަދު އުޝާމް މި ރޭ ވިދާޅުވެއްޖެއެވެ.
ބަންޑާރަނައިބު މިހެން ވިދާޅުވީ ބާ ކައުންސިލްގައި ބަންޑާރަނައިބު ނުހިމެނޭގޮތަށް ގާނޫނީ ފަންނުގެ ގާނޫނަށް ގެނައި އިސްލާހު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ތަސްދީގު ކުރެއްވުމާ ގުޅިގެންނެވެ.
މިކަމާ ގުޅިގެން އުޝާމް އެކްސްގައި ކުރެއްވި ޕޯސްޓުގައި ވިދާޅުވީ ގާނޫނީ ފަންނުގެ ގާނޫނަށް ތިންވަނަ އިސްލާހު ގެނައުމުގެ ގާނޫނު ރައީސް މިއަދު ތަސްދީޤުކުރެއްވުމާ އެކު ދިވެހިރާއްޖޭގެ ބާ ކައުންސިލްގެ އެކްސްކޯގައި ބަންޑާރަނައިބު ހިމެނުން ނިމުމަކަށް އައިސްފައިވާ ކަމަށެވެ.
އުޝާމް ވިދާޅުވީ މިއީ ހަގީގީ މާނައިގައި، ގާނޫނީ ވަކީލުންގެ ކަންކަން ރެގިއުލޭޓްކުރުމުގެ މިނިވަންކަމާއި ބާރު، ގާނޫނީ ވަކީލުން އައްޔަނުކުރާ ބަޔަކަށް ލިބިދިނުމަށް އެޅުނު މުހިންމު ފިޔަވަޅެއްކަމަށެވެ.
މި ބިލު މަޖިލީހުން ފާސްކުރީ މިދިޔަ އޮގަސްޓުމަހުގެ 22ވަނަ ދުވަހުގައެވެ.
މި އިސްލާހާ އެކު ބާ ކައުންސިލްގެ ކޮމިޓީގެ މެންބަރެއްގެ ގޮތުގައި ބަންޑާރަނައިބު ކަނޑައަޅާފައި އޮތްއޮތުން ބަދަލުކޮށް، އެ ކައުންސިލްގެ އެގްޒެކްޓިވް ކޮމިޓީއަކީ ހަމަ އެކަނި ގާނޫނީ ވަކީލުން އިންތިޚާބުކުރާ ރައީސަކާއި ނައިބު ރައީސަކާއި މެންބަރުންގެ މައްޗަށް އެކުލެވޭ ކޮމިޓީއެއް ކަމަށް ވަނީ ކަނޑައަޅާފައެވެ. މި ކަމަށް މަގުފަހި ކުރުމަށް ގާނޫނީ ވަކީލުންގެ ތެރެއިން އިންތިޚާބުކުރެވޭ ވަކީލުންގެ އަދަދު ހަތަކަށް ބަދަލުކޮށް، ގާނޫނުގައި ބަންޑާރަނައިބާ ގުޅޭގޮތުން ހުރި ބައިތައްވަނީ އުނިކޮށްފައެވެ. މި ބަދަލުގެ ދަށުން ބާ ކައުންސިލްގެ އެގްޒެކްޓިވް ކޮމިޓީއަށް އިންތިޚާބުކުރަންޖެހޭ މެންބަރު، މި ގާނޫނަށް އަމަލު ކުރަން ފަށާތާ 60 ދުވަހުގެ ތެރޭގައި އިންތިޚާބުކޮށް ނިންމަންވާނެ ކަމަށް ބަޔާންކޮށްފައިވެއެވެ.
އޭގެ އިތުރުން ރަސްމީ އިދާރާތަކުންނާއި ރަޖިސްޓަރީ ކޮށްފައިވާ ކިޔަވައިދޭ މަރުކަޒުތަކުން ދޫކުރާ ލިޔުންތަކުގައި އަސްލާ އެއްގޮތް ކަމުގެ ތައްގަނޑު ޖަހައިދިނުމާއި، ބޭރު ގައުމުތަކުގައި ބޭނުންކުރުމަށްޓަކައި ދިވެހިރައްޔިތުންނަށް ބައެއް ބާވަތުގެ ލިޔެކިޔުންތަކުގައި ޑިޕްލޮމެޓިކް މިޝަންތަކުން އަސްލާ އެއްގޮތް ކަމުގެ ތައްގަނޑު ޖަހައިދިނުމުގެ ހުއްދަ ލިބިދެވޭގޮތަށް ޕަބްލިކް ނޯޓަރީންގެ ގޮތުގައި މަސައްކަތްކުރުމުގެ ހުއްދަ ދެވޭ ތަންތަނާ ގުޅޭ މާއްދާއަށް ވެސް މި ބިލުން އިސްލާހު ގެނެސްފައިވެއެވެ.
މި ބިލް މިއަދު ތަސްދީގު ކުރެއްވުމާ އެކު ދިވެހި ސަރުކާރުގެ ގެޒެޓުގައި ޝާއިއުކޮށް، އެއަށް އަމަލުކުރަން ވަނީ ފަށައިފައެވެ.