އަލަށް އަށް ވަކީލަކު ހުވާކޮށް، ގާނޫނީ ވަކީލުކަމުގެ ހުއްދަ އެ ވަކީލުންނަށް މިއަދު ދީފިއެވެ.
މިއަދު ބާކައުންސިލުން ބޭއްވި ރަސްމިއްޔާތެއްގައި ގާނޫނީ ވަކީލުންނަށް ހުވާލައިދެެއްވީ ދިވެހިރާއްޖޭގެ ހައި ކޯޓުގެ ފަނޑިޔާރު ހުސައިން މަޒީދެވެ. މި ވަކީލުންނަށް ގާނޫނީ ވަކީލުކަމުގެ ހުއްދަ ހަވާލުކޮށްދެއްވީ ބާ ކައުންސިލްގެ ރައީސް ހުސައިން ސިރާޖެވެ.
މި ރަސްމިއްޔާތަކީ ބާކައުންސިލުން ވަކީލުންނަށް ހުވާލައިދެއްވުމަށް މި އަހަރު ބޭއްވި ތިން ވަނަ ހަފުލާއެވެ.
ވަކީލުންނާ މުޚާތަބުކުރައްވައި އެ ރަސްމިއްޔާތުގައި ވާހަކަދައްކަވަމުން، ފަނޑިޔާރު ހުސެން މަޒީދު ވިދާޅުވީ، ގާނޫނީ ވަކީލުކަން ކުރުމުގެ ޒިންމާއަކީ ކުޑަ ކަމެއް ނޫން ކަމަށާއި އެއީ ވަރަށް ބޮޑު މަސްއޫލިއްޔަތެއް ކަމަށެވެ.
އެ ޒިންމާ އަދާކުރުމުގައި ފަރުވާކުޑަ ކުރެވިއްޖެނަމަ، އެކަމެއްގެ ސަބަބުން ވަރަށް ގިނަ ބަޔެއްގެ ހައްގުތައް ގެއްލިދާނެ ކަމަށާއި އިއާދަނުކުރެވޭ ވަރުގެ ބޮޑެތި ގެއްލުންތައް ކުރިމަތިވެދާނެ ކަމަށް ފަނޑިޔާރު ވިދާޅުވިއެވެ.
އަލަށް ގާނޫނީ ވަކީލު ކަމުގެ ހުއްދަ ހޯއްދެވި ވަކީލުން ހަފްލާގައި ބައިވެރިވިންނާއެކު ފޮޓޯއަކަށް ހުއްޓިގެން ---- ސަން ފޮޓޯ/ މޫސާ ނަދީމް
އެހެންކަމުން، ވަކީލުންގެ ވަޒީފާއަކީ ވަރަށް ޒިންމާދާރު ކަމާއެކީ އަދާކުރަން ޖެހޭ މަސްއޫލިއްޔަތެއް ކަމަށާއި ޝަރުއީ ދާއިރާގެ ކުރިއެރުން ވަނީ ވަކީލުންނާ ވަރަށް ބޮޑަށް ގުޅިލާމެހިފައިވާ ކަމަށް ފަނޑިޔާރު މަޒީދު ވިދާޅުވެއެވެ.
ގާނޫނީ ވަކީލުން ދިރާސާ ކުރައްވައިގެން، ގާނޫނީ ވަކީލުން ތައްޔާރުވެވަޑައިގެން އެކުރައްވާ ވަކީލުކަމަކީ ނުވަތަ އެ ހުށަހަޅުއްވާ ހުށަހެޅުންތަކަކީ އަދުލު އިންސާފު ގާއިމު ކުރުމަށް ފަނޑިޔާރުންނަށް ވެދެވޭ ވަރަށް ބޮޑު އެހީތެރިކަމެއް. ފަނޑިޔާރުންނަށް އަދުލު އިންސާފުން މައްސަލަތައް ނިންމުމުގައި އެ އެހީތެރިކަމަކީ އަބަދުވެސް ފަނޑިޔާރުން ވަކީލުންގެ ފަރާތުން އެދެމުންދާ އެދުމެއް ދިވެހިރާއްޖޭގެ ހައި ކޯޓުގެ ފަނޑިޔާރު އަލްއުސްތާޛު ހުސެން މަޒީދު
އޭގެއިތުރުން، އެ ރަސްމިއްޔާތުގައި ބާ ކައުންސިލްގެ ރައީސް ސިރާޖް ވިދާޅުވީ، މިއަހަރުގެ މިހާތަނަށް ގާނޫނީ ދާއިރާއާ ގުޅި، ވަކީލު ކަމުގެ ހުވާ 407 ބޭފުޅަކު ކުރައްވާފައިވާ ކަމަށެވެ.
ގާނޫނީ ދާއިރާއަކީ އަބަދުވެސް ބަދަލުތައް އަންނަ ދާއިރާއެއް ކަމަށްވާއިރު، ބަދަލުވަމުންދާ އިގްތިޞާދީ، އިޖްތިމާއީ އަދި ސިޔާސީ ހާލަތްތަކާ ގުޅިގެން އާ ގާނޫނުތައް ތައާރަފުކުރަމުން އަންނަކަން އޭނާ ފާހަގަކުރެއްވިއެވެ.
އަލަށް ގާނޫނީ ވަކީލު ކަމުގެ ހުވާ ކުރެއްވި ވަކީލަކަށް ބާ ކައުންސިލްގެ ރައީސް ހުސައިން ސިރާޖް ހުއްދަ ހަވާލުކުރައްވަނީ ---- ސަން ފޮޓޯ/ މޫސާ ނަދީމް
އެގޮތުން، ރާއްޖޭގައި ތައާރަފުކުރާ ގިނަ ގާނޫނުތަކަކީ ދުނިޔޭގެ ތަހުޒީބުވެފައިވާ މުޖުތަމައުތަކުގައި ހުރި ގާނޫނުތަކާ ވަރަށް ގިނަ ގޮތްގޮތުން އެއްގޮތް ގާނޫނުތަކެއް ކަމަށް އޭނާ ވިދާޅުވިއެވެ.
އިތުރަށް ސިރާޖް ވިދާޅުވީ، ވަކީލުކަމުގައި މަސައްކަތްކުރާއިރު، އަލަށް ދަސްކުރަން ކުރަންޖެހޭ ކަންތައްތަކާއި މުރާޖާ ކުރަންޖެހޭ ކަންތައްތަކާއި ދިރާސާ ކުރަންޖެހޭ ކަންތައްތައް، މި ދާއިރާއިން ކިޔެވިއިރަށް ވުރެ ގިނައިން ކުރަން ޖެހޭނެ ކަމަށެވެ.