ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑަށް މި ފަހުން ގުޅުނު ކިލިއަން އެމްބާޕޭގެ ދެ ގޯލުން، ރެއާލް ބެޓިސްގެ މައްޗަށް ކުރި ހޯދައިފިއެވެ.
ރެއާލްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-0 އިންނެވެ.
މެޗުގައި ރެއާލުން ކާމިޔާބުކުރި ދެ ލަނޑު ވެސް އެ ޓީމަށް ކާމިޔާބުކޮށްދީފައިވަނީ މި ސީޒަންގައި އެ ޓީމާ އަލަށް ގުޅުނު ފަރަންސޭސިވިލާތުގެ ކެޕްޓަން ކިލިއަން އެމްބާޕޭއެވެ. މިއީ ލަލީގާގައި އޭނާއަށް ކާމިޔާބުކުރެވުނު ފުރަތަމަ ދެ ލަނޑެވެ. ރެއާލަށް ކުޅުނު ފުރަތަމަ މެޗުގައި ޔުއޭފާ ސުޕާ ކަޕްގައި އޭނާ ލަނޑު ޖެހި ނަމަވެސް ލަލީގާގައި މިހާތަނަށް ރެއާލް ކުޅުނު ތިން މެޗުގައި ވެސް އޭނާއަށް ލަނޑެއް ކާމިޔާބުކުރެވިފައެއް ނުވެއެވެ.
މެޗުގައި ރެއާލްގެ ފުރަތަމަ ލަނޑު އެމްބާޕޭ ކާމިޔާބުކޮށްދީފައިވަނީ މެޗުގެ 67 ވަނަ މިނެޓުގައި ފެޑެރީކޯ ވަލްވާޑެ ތަނަވަސްކޮށްދިން ފުރުސަތެއްގައެވެ. ދެވަނަ ލަނޑު އޭނާ ކާމިޔާބުކޮށްފައިވަނީ މެޗުގެ 75 ވަނަ މިނެޓުގައި ލިބުނު ޕެނަލްޓީއަކުންނެވެ.
ލަލީގާގައި އޭނާގެ ފުރަތަމަ ލަނޑު ފެނިފައިމިވަނީ އެމްބާޕޭ ލީގުގައި ފޮނުވާލި 25 ވަނަ ހަމަލާއިންނެވެ. އަދި، ދެވަނަ ލަނޑު 26 ވަނަ ހަމަލާއިންނެވެ. މިއީ ޔޫރަޕްގެ އެންމެ ބޮޑު ފަސް ލީގަށް ބަލާއިރު މިހާތަނަށް އެންމެ ގިނަ ހަމަލާ ފޮނުވާލާފައިވާ ކުޅުންތެރިޔާއެވެ.
މި ކާމިޔާބީއާ އެކު ރެއާލް މިހާރު އުޅެނީ ކުޅުނު ހަތަރު މެޗުން ލިބިފައިވާ އަށް ޕޮއިންޓާ އެކު ތާވަލުގެ ދެވަނައިގައެވެ. އެއީ، ތާވަލުގެ އެއްވަނައިގައި އުޅޭ އެފްސީ ބާސެލޯނާއަށް ވުރެ ހަތަރު ޕޮއިންޓު ފަހަތުންނެވެ. ރެއާލް މިހާތަނަށް ކުޅުނު އެއްވެސް މެޗަކުން ބަލިނުވި ނަމަވެސް ދެ މެޗުން އެއްވަރުވިއެވެ.
މި މެޗުން ބަލިވުމުން ބެޓިސް މިހާރު އުޅެނީ ތިން މެޗުން ލިބިފައިވާ ދެ ޕޮއިންޓާ އެކު ތާވަލުގެ 17 ވަނައިގައެވެ.