ފަސް އަހަރު ވަންދެން އަންހެނަކު ބަންދުކޮށްގެން ގެންގުޅެ، ޖިސްމާނީ އަދި ނަފްސާނީ އަނިޔާ ދިން ކަމަށް ތުހުމަތުވާ މީހަކު ޕޮލެންޑުން ހައްޔަރުކޮށްފިއެވެ.
ލެގްނިކާ ޓައުންގެ ޕްރޮސެކިއުޓަރުން ބުނި ގޮތުގައި އެ އަންހެންމީހާ ބަންދުކޮށްގެން ގެންގުޅުނީ 2019ވަނަ އަހަރުގެ ޖެނުއަރީ މަހުން ފެށިގެން މިދިޔަ ހަފުތާއާ ހަމައަށް ގްލޯގޯ ކައިރީގައި އޮންނަ ގައިކީ އަވަށުގައެވެ.
އެކަން ކުރި ކަމަށް ތުހުމަތު ކުރެވޭ މީހަކީ އުމުރުން 35 އަހަރުގެ މަޓިއުސް ޖޭ ކިޔާ މީހެކެވެ.
އޭބީސީ ނޫހުން ރިޕޯޓުކޮށްފައިވާ ގޮތުގައި ބަންދުކޮށްގެން ގެންގުޅުނީ 30 އަހަރުގެ އަންހެނެކެވެ. އެމީހާ ބަހައްޓާފައި ހުރީ ފެނާއި ފާޚާނާ ވެސް ނެތް ތަނެއްގައެވެ. އެތަނުގައި އޭނާއަށް ތަކުރާރުކޮށް ޖިންސީ ގޯނާކޮށް އަދި ޖިސްމާނީ ގޮތުން އަނިޔާކޮށް ކާނާއާއި ފެން ވެސް ދީފައި ވަނީ ވަރަށް މަދުން ކަމަށް ރިޕޯޓުކޮށްފައިވެއެވެ.
އެމީހާ ހައްޔަރުކޮށްފައި ވަނީ އަންގާރަ ދުވަހު އެ އަންހެން މީހާ ޑޮކްޓަރަށް ދައްކަން ހޮސްޕިޓަލަކަށް ގެނައި ވަގުތެއްގައި އެތަނުގެ މުވައްޒަފެއްގެ ކައިރީ އޭނާގެ ހާލަތު ކިޔައިދިނުމުންނެވެ.
އެކަމާ ގުޅިގެން ފިރިހެންމީހާ ހައްޔަރުކޮށް ސުވާލު ކުރުމުން އެކަން ކުރި ކަމަށް އޭނާ އެއްބަސްވެފައެއް ނުވެއެވެ. ކުށް ސާބިތުވެއްޖެ ނަމަ 25 އަހަރުގެ ޖަލު ހުކުމެއް އޭނާ އަށް އަންނާނެއެވެ.