އިންޓަނޭޝަނަލް ކްރިމިނަލް ކޯޓު، (އައިސީސީ)އިން ރަޝިއާގެ ރައީސް ވުލަޑިމިއާ ޕުޓިން ހައްޔަރު ކުރުމަށް ނެރެފައިވާ އަމުރާ އެއްގޮތަށް އޭނާ ހައްޔަރުކޮށްދިނުމަށް ޔޫކްރެއިނުން މޮންގޯލިއާ ސަރުކާރަށް އެދިއްޖެއެވެ.
ޔޫކްރެއިނުން އެގޮތަށް އެދިފައި ވަނީ އަންނަ ސެޕްޓެމްބަރު މަހުގެ ދެ ވަނަ ދުވަހު ޕުޓިން މޮންގޯލިއާއަށް ދަތުރުކުރެއް ކުރެއްވުމަށް ހަމަޖައްސާފައި އޮތުމާ ގުޅިގެންނެވެ.
ޔޫކްރެއިނުން އެގޮތަށް އެދުނު ނަމަވެސް ދަތުރަށް ބަދަލެއް ނާންނާނެ ކަމަށް ރަޝިއާއިން ބުނެފައިވެއެވެ.
"އަޅުގަނޑުމެން ގޮވާލަން މޮންގޯލިއާގެ ކަމާބެހޭ ފަރާތްތަކަށް އައިސީސީން ނެރެފައިވާ އަމުރަށް އަމަލުކޮށް ހޭގްގައި ހުންނަ އައިސީސީއަށް ޕުޓިން ގެންދިއުމަށް." ޔޫކްރޭންގެ ޚާރިޖީ ވުޒާރާއިން ބުނެފައިވެއެވެ.
ޔޫކްރޭނުން އެތައް ސަތޭކަ ކުޑަކުދިންނެއް ގަވާއިދާ ޚިލާފަށް ރަޝިއާއަށް ގެންދިޔަ ކަމުގެ ތުހުމަތުގައި ޕުޓިން ހައްޔަރު ކުރުމަށް އައިސީސީން އަމުރު ނެރެފައި ވަނީ މިދިޔަ މާޗްމަހުއެވެ. ނަމަވެސް ރަޝިއާއިން އެ ތުހުމަތު ދޮގުކުރެއެވެ. އަދި އެއީ ސިޔާސީ ގޮތުން ޕުޓިންއަށް ކުރާ ދައުވާއެއް ކަމަށް ވެސް ރަޝިއާއިން ބުނެފައިވެއެވެ.
އެ އަމުރު މޮންގޯލިއާ ހިމެނޭ ގޮތަށް އައިސީސީގެ 124 މެމްބަރު ތަންފީޒުކުރަން ޖެހެއެވެ. އެގޮތުން މެމްބަރު ގައުމުތަކުގެ ތެރެއިން ގައުމަކަށް ޕުޓިން ވަޑައިގެންފިނަމަ، ހައްޔަރުކުރުމަށް ކޯޓު އަމުރުގައި ލާޒިމްކޮށްފައިވެއެވެ.