ބޮލީވުޑްގެ ބަތަލާ ކަންގަނާ ރަނައުތު އަމިއްލަ އޮފީސް މަސައްކަތްތަކަށް މުމްބާއީގެ އަނދޭރީން ބޮޑު އަގުގައި ބިމެއް ގަނެފިއެވެ.
ފިލްމީ ޚަބަރުތައް ގެނެސްދޭ ރިޕޯޓުތައް ބުނާގޮތުން ކަންގަނާ އަލަށް ގަނެފައިވާ މި ބިމުގެ އަގު 178,805 އެމެރިކާ ޑޮލަރަށް އަރައެވެ. ކަންގަނާ އޮފީސް މަސައްކަތްތަކަށް ބޭނުންކުރާނެ މި ބިން ގަނެފައި މިވަނީ މި މަހުގެ ކުރީކޮޅު ކުރިން ބަތަލާ މުމްބާއީގައި ދިރިއުޅުނު ގެ ވިއްކާލަން ނީލަމަށްލިތާ މާ ގިނަ ދުވަހެއް ނުވަނީހެވެ.
މުމްބާއީގައި ބަތަލާ ދިރިއުޅުނު ގޭގެ ވެސް އެއް ފަންގިފިލާ ބޭނުންކުރީ އޮފީސް މަސައްކަތްތައް ހިންގުމަށެވެ.
ކަންގަނާ އަލަށް ގަނެފައިވާ އިމާރާތުގެ ރަސްމީ އިދާރީ މަސައްކަތްތަކާ ލިޔެކިޔުންތައް މި މަހުގެ 23ވަނަ ދުވަހު ނިންމާފައިވާއިރު ޑިއުޓީގެ ގޮތުގައި ބަތަލާ ވަނީ 11 ހާސް އެމެރިކާ ޑޮލަރު ކަމާބެހޭ އިދާރާއަށް ދައްކާފައި ކަމަށް ރިޕޯޓުތައް ބުނެއެވެ.
މުމްބާއީގައި ކަންގަނާ ކުރިން ދިރިއުޅުނު ގެ--ފޮޓޯ/ޖީކިއު އިންޑިއާ
މި ބިމުގައި ކަންގަނާގެ އޮފީސް އިމާރާތް ކުރުމުގެ މަސައްކަތް ވަރަށް އަވަހަށް ފަށަން ނިންމާފައިވާއިރު މި އިމާރާތުގެ މަސައްކަތް ނިމޭނީ 2026ވަނަ އަހަރުގެ ފަހުކޮޅު ކަމަށް ފިލްމީ ޚަބަރުތައް ބުނެއެވެ.
އިންޑިއާގައި މި އަހަރު ބޭއްވި ލޯކް ސަބާ އިލެކްޝަންގެ ގޮނޑި ކާމިޔާބުކޮށްފައިވާ ބަތަލާ އެންމެ އަވަހަށް ބެލުންތެރިންނަށް ފެންނާނީ މި ފެށޭ ސެޕްޓެމްބަރު މަހުގެ ހަ ވަނަ ދުވަހު ރިލީޒްކުރާ ފިލްމު "އިމަޖެންސީ"އިންނެވެ. މި ފިލްމު ރިލީޒްކުރުމާ ދެކޮޅަށް އިންޑިއާގެ ސިކުންގެ ގިނަ ބަޔަކު އަންނަނީ އަޑު އުފުލަމުންނެވެ. މި ފިލްމާ ގުޅިގެން ބަތަލާއަށް ދާދިފަހުން ވަނީ މަރުގެ އިންޒާރުތައް ވެސް ލިބިފައެވެ.