ކުރީގެ ނައިބު ރައީސް އަޙުމަދު އަދީބްގެ އަތުން 14 މިލިއަން ރުފިޔާ ނެންގެވި ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ކުރައްވާ ތުހުމަތު ރައީސް ޑރ. މުޙައްމަދު މުއިއްޒު މިރޭ ދޮގުކުރައްވައިފިއެވެ.
ޕީއެންއެފްއިން ބޭއްވި ޖަލްސާއެއްގައި ވާހަކަދައްކަވަމުން ޔާމީން ވަނީ ރައީސް މުޢިއްޒު އޭރު އަދީބު އަތުން 14 މިލިއަން ރުފިޔާ ނެންގެވި ކަމަށް ތުހުމަތު ކުރައްވާފައެވެ.
މިކަމާ ގުޅުވައި މިރޭ ސަންގު ޓީވީއަށް ރައީސް ދެއްވި ބަސްދީގަތުމެއްގައި ވިދާޅުވީ، އަދީބު އަތުން ނުވަތަ އެހެން މީހެއްގެ އަތުން ފައިސާއެއް ހޯދާފައިނުވާ ކަމަށާއި އެ ކަހަލަ ވާހަކަތައް އަޑުއިވޭތީ އެކަމާ ވަރަށް ހައިރާންފުޅުވާ ކަމަށެވެ.
އެގޮތުން، އެއްވެސް އިރެއްގައި އަދީބާ އެއްކޮށް ގާތްކޮށް އުޅުއްވާފައި ނުވާ ކަމަށާއި ވަކިން މީޓިންއެއްގައި އަދީބާ ބައްދަލުވެފައިނުވާ ކަމަށް ރައީސް ވިދާޅުވިއެވެ. އޭރު އަދީބާ ބައްދަލުވަނީ ހަމައެކަނި ކެބިނެޓް ބައްދަލުވުންތަކުންކަން އެމަނިކުފާނު ވަނީ ފާހަގަކުރައްވާފައެވެ.
އެމަނިކުފާނު ސިންގަޕޫރަށް ކުރެއްވި ދަތުރުފުޅެއްގައި ވެސް އަދީބާ ބައްދަލުކުރައްވާފައިވާ ކަމަށް ޔަމީން ތުހުމަތު ކުރައްވާފައިވާއިރު، ރައީސް ވަނީ އެ ތުހުމަތު ދޮގުކުރައްވާފައެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި ރައީސް މުއިއްޒު: އަދީބް އަތުން 14 މިލިއަން ރުފިޔާ ނެންގެވި ކަމަށް ޔާމީން ތުހުމަތު ކުރާ ވާހަކަ ރައީސް ދޮގުކުރައްވައިފި -- ފޮޓޯ/ އަވަސް
ހަމަ ޔަގީނުން ވެސް އެމަނިކުފާނަށް މައުލޫމާތު ދެއްވާ ބޭފުޅުން ހަމަ ކަނޑައެޅިގެން ދޮގު މައުލޫމާތު އެދެއްވަނީ. އަޅުގަނޑު ހަމަ ހައިރާންވޭ އެކަހަލަ ވާހަކަތައް އެމަނިކުފާނު ގަބޫލުފުޅު ކުރައްވަވާތީ ވެސް.
މީގެއިތުރުން، 2018ގެ ޔާމީންގެ ކެންޕޭންގައި ހޯއްދަވައިދެއްވުމަށް ހަވާލުކުރެއްވި ހުރިހާ ކަމެއް ކުރެއްވީ ހިތާއި ރޫހުން އެމަނިކުފާނަށް ދެވަނަ ދައުރެއް ހޯއްދައިވައިދެެއްވުމަށް ކަމަށާއި ރައީސްއަކީ, ޔާމީނާ އެންމެ ގާތުން ކެބިނެޓުގައި މަސައްކަތްކުރެެއްވި އެކަކުކަމަށް ރައީސް ވިދާޅުވިއެވެ.
ޔާމީންގެ ޕީއެންއެފް ޖަލްސާއެއްގައި ވަނީ އެ މަނިކުފާނު ވެރިކަމުގައި ހުންނެވިއިރު، މާމިގިލީ ކޯޓަކުން އަމުރެއް ނެރެގެން އެ މަނިކުފާނު ހައްޔަރު ކުރުމަށް އުޅުނު މައްސަލައާ ގުޅޭ ފުލުހުންގެ ތަހުގީގު ރިޕޯޓެއް ކަމަށް ބުނެ، ލިޔެކިޔުމެއް ދައްކައިފައެވެ.
އޭގައި ވަނީ އަދީބު މެދުވެރިކޮށް އަބްދުއްރަހީމަށް ހަތަރު މިލިއަން ރުފިޔާ ހަވާލުކޮށްފައިވާކަން އެނގޭ މެސެޖެއްގެ ވާހަކައެވެ. އަދި ޔާމީންގެ މައްޗަށް ކޯޓު އަމުރެއް ނެރެފި ނަމަ، ސިއްރުން އެ ކަމަށް އެއްބާރުލުންދީ، އެ ވެރިކަން ބަދަލު ކުރެވިއްޖެނަމަ، އިތުރު 16 މިލިއަން ރުފިޔާ ދޭނެ ކަމަށެވެ.
ޔާމީން ތުހުމަތު ކުރައްވާ ގޮތުގައި ރައީސް މުއިއްޒާއި އަބްދުއްރަހީމް ނެންގެވި ކަމަށް ތުހުމަތުކުރާ އެ ފައިސާއަކީ އެމްއެމްޕީއާރުސީގެ ޚިޔާނާތާއި ގުޅުންހުރި ފައިސާއެވެ.