މާނަ ފުން ބައެއް އުރުދޫއާއި ހިންދީ ޅެންތަކާއި ލަވަތައް ދިވެހިބަހަށް ތަރުޖަމާކޮށް ތިލަކޮށް ގެނެސްދީ, ދިވެހި ބަހުގެ އެކެޑަމީގެ ރައީސް ޑރ. އަޝްރަފް އަބްދުއްރަޙީމް ލިޔުއްވައިފައިވާ "ފުރެއްދެ ޅެންވެރިންގެ މުތީތައް" ފޮތް ނެރެފިއެވެ.
މި ފޮޮތް ނެރެފައިވަނީ ރޭ، ޒޫމް މެދުވެރިކޮށް ބޭއްވި ޚާއްޞަ ޕްރޮގްރާމެއްގައެވެ. މި އޮންލައިން ބައްދަލުވުން އިންތިޒާމުކުރީ އީސާ އޮންލައިން ޕޮއެޓްރީ (އީއޯޕީ)އިންނެވެ.
މި ފޮތް ނެރެދެއްވީ މަޝްހޫރު ޅެންވެރިޔާ އާދަމް ޢަބްދުއްރަޙްމާން (އުތީމު އާދަމްބެ)އެވެ.
މި ފޮތް ނެރުމަށް ބޭއްވި ހަފްލާގައި ޅެންވެރިޔާ، މިހާރުގެ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް ބައިވެރިވެވަޑައިގަތެވެ.
ގާތްގަނޑަކަށް 100 ވަރަކަށް ހިންދީ ޅެމުގެ ދިވެހި ތަރުޖަމާ ހިމެނޭ މި ފޮތުގައިވަނީ ބައްރެޞަޣީރުގެ ޅެންވެރިޔާ ނުވަތަ ޝާއިރެމަޝްރިޤް ޑރ. ޢައްލާމް މުޙައްމަދު އިޤްބާލުގެ ބައެއް ޅެންތަކާއި ހިންދުސްތާނުގެ މަޝްހޫރު ޅެންވެރިޔާ ޖާވީދު އަޚްތަރުގެ ދެތިން ޅެމެއްގެ އިތުރުން ގުލްޒާރުގެ ދެތިން ޅެމެކެވެ.
ޑރ. އަޝްރަފްގެ ފޮތް "ފުރެއްދެ ޅެންވެރީންގެ މުތީތައް"ކަވަރު --
އަދި ދިވެހި ޅެންވެރިކަމުގެ ފަންނުގައި ވަރަށް ފުންނާބު އުސް ދެތިން ޅެންވެރިއަކު ހައްދަވާފައިވާ ދެތިން ޅެމެއް ވެސް މި ފޮތުގައި ވަނީ ހިމަނައިފައެވެ.
ދިވެހީންގެ މެދުގައި ވެސް މަގުބޫލު ޅެންތައް ހިމެނޭއިރު އޭގެ ތެރޭގައި، މައިނެ ޕޫޗާ ޗާންދު ސޭ ކެ ދޭކަ ހޭ ކަހީން، މޭރެ ޔާރު ސާ ހަސީނާއި ތުޖް ސެ ނާރާޒު ނެހީ ޒިންދަގީ ހައިރާން ހޫމޭ ފަދަ ލަވައާއި ޅެންތައް ހިމެނެއެވެ. މީގެ އިތުރުން ހިމެނޭ ބައެއް ޅެންތައް:
- ޕަރޭޝާން ހޫނ މޭ
- ޗާންދީ ޖޭސާ ރަންގް ހެ ތޭރާ ސޯނެ ޖޭސޭ ބާލް އޭކް ތުހީ ދަންވާން ހެ ގޯރީ ބާކީ ސަބް ކަންގާލް
- މޭ އައުރު މޭރީ ތަންހާއީ އަކްސަރު ޔޭ ބާތޭން ކަރު ތޭ ހޭ
- ނީލާ އާސްމާން ސޯގަޔާ
ޑރ. އަޝްރަފްގެ ފޮތް "ފުރެއްދެ ޅެންވެރީންގެ މުތީތައް" ފޮތުގައި ހިމެނޭ ޅެމެއްގެ ތަރުޖަމާ --
މިއީ 2017ވަނަ އަހަރުގެ އޮކްޓޫބަރުގައި އިންޑިއާގެ ޖައިޕޫރުގައި އޮތް ސައުތު އޭޝިއަން ސޫފީ ފެސްޓިވަލުގައި ނެރެފައިވާ ފޮތެކެވެ. ނަމަވެސް މިފަހަރު އަލަށް މި ފޮތް ނެރެވުނުއިރު، ފޮތުގެ ލޭއައުޓާއި ކަަވަރު ޕޭޖަށް ބޮޑެތި ބަދަލުތަކެއް ގެނެވިފައިވާއިރު ޑރ. އަޝްރަފް މިހާރުގެ ފޮތް ސިފަކުރެއްވީ "ހާސްބައި ތަފާތު" ފޮތެއްގެ ގޮތުގައެވެ.
އަލަށް ނެރެވުނު މި ފޮތުގެ ލޭއައުޓާއި ކަވަރު ފަރުމާކުރުމުގެ މަސައްކަތް ކުރެއްވީ އީސާ ޝަރީފެވެ.
މި ފޮތާ ގުޅޭ ގޮތުން ޑރ. އަޝްރަފް މީގެ ކުރިން ވިދާޅުވެފައިވަނީ އޭނާ މަސައްކަތް ކުރައްވާފައިވާނީ، ކުރިމަތިވާ އުފަލާއި، ހިތާމައާއި، ގައުމުގެ އަދި ވެށީގެ ހާލަތާއި، ގުދުރަތީ ނިޒާމާއި، ތިމާ ލޮލަށް ސިފަވާ ގުދުރަތުގެ ކުޅަދުންވަންތަކަން ބޭރުގެ ޅެންވެރިންނަށް ސިފަވާ މިންވަރު ދެނެގަނެވޭތޯ ބަލައި ހޯދުމަށް ކަމަށެވެ.
ޑރ. އަޝްރަފްގެ ފޮތް "ފުރެއްދެ ޅެންވެރީންގެ މުތީތައް" ފޮތުގައި ހިމެނޭ ޅެމެއްގެ މައުލޫމާތު --
އަދި އެ ވެރިންގެ ޅެންތަކުގައި އެ ކަންކަން ހުށަހަޅުއްވާފައިވާ ގޮތް ދިވެހި ސިކުނޑިތަކަށް ވިސްނޭ މިންވަރަށް ދިވެހި ބަހަށް ފުރޮޅާލުމަށް ކަމަށެވެ.
މި ފޮތުގެ މަގުސަދެއްގެ ގޮތުގައި އަޝްރަފު ފާހަގަކުރައްވާފައިވަނީ ދިވެހި އަދަބިއްޔާތަށާއި ދިވެހި ޅެންވެރީންގެ އިލްމަށް ކުރިއެރުން ގެނެސްދީ، ކޮންމެ ވެސް ވަރެއްގެ ޣިޒާއެއް ދިވެހި ޅެންވެރިންނަށް ލިބިދިނުމެވެ.
މި ފޮތް ގަންނަން ބޭނުންވާ ފަރާތްތަކަށް 7777228، 7684346، 9922668 ނަންބަރާ ގުޅައިގެން އެ ކަން ކުރިއަށް ގެންދެވޭނެއެވެ.