އިންޑިއާ ކަނޑުގެ އައްސޭރިފަށުގެ ގައުމުތައް ގުޅިގެން އެކުލަވާލެވިފައިވާ "ޖީ 16 ގްރޫޕް އޮފް ލައިކް މައިންޑަޑް ކޯސްޓަލް ސްޓޭޓްސް"ގެ 36 ވަނަ ބައްދަލުވުން މިއަދު ބަޑޮސް މޯލްޑިވްސް ރިސޯޓްގައި ފަށައިފިއެވެ.
ވޯލްޑް ބޭންކުގެ އެހީގައި ބޭއްވި މި ބައްދަލުވުން އިފްތިތާހުކޮށްދެއްވީ ފިޝަރީސް މިނިސްޓަރު އަހުމަދު ޝިޔާމެވެ.
ފިޝަރީސް މިނިސްޓްރީން ބުނީ، މި ބައްދަލުވުމުގެ އަމާޒަކީ އިންޑިއާ ކަނޑުން އެކި ޤައުމުތަކަށް ކަނޑުމަސް ބޭނޭނެ މަތީ މިންވަރު ކަނޑައެޅުމާ ބެހޭ ގޮތުން އިންޑިއަން އޯޝަން ޓޫނާ ކޮމިޝަން (އައިއޯޓީސީ)އަށް ހުށަހަޅާފައިވާ ގަރާރާ މެދު މި ގައުމުތަކުގެ މެދުގައި މަޝްވަރާކޮށް އެއްބަސްވުމަކަށް އައުން ކަމަށެވެ.
އެގޮތުން، މި ބައްދަލުވުމުގައި ގަރާރާ މެދު އެއްބަސްވުމަކަށް އާދެވިއްޖެނަމަ، އަންނަ އަހަރުގެ އައިއޯޓީސީގެ އަހަރީ ބައްދަލުވުމުގައި މި ގަރާރު ފާސްކުރުމަށް ހުށަހެޅޭނެ ކަމަށް އެ މިނިސްޓްރީން ބުނެފައިވެއެވެ.
ޖީ 16 ގްރޫޕް އޮފް ލައިކް މައިންޑަޑް ކޯސްޓަލް ސްޓޭޓްސްގެ 36 ވަނަ ބައްދަލުވުމުގެ ތެރެއިން --- ފޮޓޯ/ ފިޝަރީސް މިނިސްޓްރީ
ދެ ދުވަހަށް ބާއްވާ މި ބައްދަލުވުމުގައި ރާއްޖޭގެ އިތުރުން އޮސްޓްރޭލިއާ، ބަންގްލަދޭޝް، ކޮމޮރޮސް، އީރާން، ކެންޔާ، މެލޭޝިއާ، މޮޒަމްބީކް، ސްރީ ލަންކާ، ސައުތް އެފްރިކާ، ޓެންޒޭނިއާ އަދި ތައިލެންޑްގެ ފިޝަރީސް މިނިސްޓްރީން ބައިވެރިވެއެވެ.
މީގެ އިތުރުން، އޮބްޒާވަރުންގެ ގޮތުގައި ވޯލްޑް ވައިޑް ފަންޑް ފޯ ނޭޗާ (ޑަބްލިއުޑަބްލިއުއެފް) ސަސްޓެއިނަބްލް ފިޝަރީޒް އެންޑް ކޮމިއުނިޓީސް ޓްރަސްޓް (އެސްފެކްޓް) އަދި ސައުތް ވެސްޓް އިންޑިއަން އޯޝަން ޓޫނާގެ ފަރާތުން ބައިވެރިވެފައިވެއެވެ.
މި ބައްދަލުވުން ހުޅުވައިދެއްވައި މިނިސްޓަރު ޝިޔާމް ވިދާޅުވީ، އިންޑިއާ ކަނޑުގެ ކަނޑުމަހުގެ މަސްވެރި ކަމަށް އެންމެ ބޮޑަށް ބަރޯސާވެފައިވާ އެއް ގައުމަކީ ރާއްޖެ ކަމަށެވެ.
ޖީ 16 ގްރޫޕް އޮފް ލައިކް މައިންޑަޑް ކޯސްޓަލް ސްޓޭޓްސްގެ 36 ވަނަ ބައްދަލުވުމުގެ ތެރެއިން --- ފޮޓޯ/ ފިޝަރީސް މިނިސްޓްރީ
ކޮންމެ ގައުމަކަށް ބޭނޭނެ އެންމެ މަތީ މިންވަރު ކަނޑައެޅުމުގައި ރާއްޖޭގެ އިގުތިޞާދަށާއި މަސްވެރިކަމުން ވަޒީފާގެ ފުރުސަތުތައް ހުރި މިންވަރާއި މަސްވެރި އާއިލާތަކަށް ކުރާ އަސަރު ވީހާ ވެސް ކުޑަވާނެ ގޮތަކަށް މިކަމުގެ މަޝްވަރާތައް ކުރިއަށް ގެންދިއުމުގެ މުހިންމުކަން މިނިސްޓަރު ވަނީ ފާހަގަކުރައްވާފައެވެ.
އިންޑިއާ ކަނޑުގެ ކަނޑުމަހާއި ކަނޑުމަހުގެ ބާވަތްތައް ދެމެހެއްޓެނެވި ގޮތެއްގައި ބެލެހެއްޓުމަށް އައިއޯޓީސީގެ މެންބަރު ގައުމުތަކުގެ މެދުގައި އިންޑިއާ ކަނޑުގެ ކަނޑުމަހުގެ މަސްވެރިކަމުގައި މަސް ބޭނޭނެ މިންވަރުތަކެއް ކަނޑައުޅުމަށް އަލޮކޭޝަން ރެޖީމެއް ކަނޑައެޅުމަށް މަޝްވަރާކުރާތާ މިހާރު ވަނީ 14 އަހަރު ވެފައެވެ.