ދިވެހިރާއްޖޭގެ މަސްވެރި ސިނާއަތް ރަނގަޅުކުރުމަށްޓަކައި ރައީސުލްޖުމްޙޫރިއްޔާ ޑރ. މުހައްމަދު މުއިއްޒުގެ ސިޔާސަތުތައް ތަންފީޒު ކުރުމަށް ބޭނުންވާ ހުރިހާ ފައިސާއެއް މިހާރު ހުރީ ހޯދާފައި ކަމަށާއި ދެން އޮތީ ސިޔާސަތު ތަންފީޒުކުރުމުގެ މަރުހަލާ ކަމަށް ފިޝަރީޒް މިނިސްޓަރު އަހުމަދު ޝިޔާމް ރޭ ވިދާޅުވެއްޖެއެވެ.
އިއްޔެއަކީ ދިވެހިރާއްޖޭގެ 44ވަނަ މަސްވެރިންގެ ދުވަހެވެ. ދުވަހާ ގުޅުވައި ދައުލަތުގެ މީޑިއާގައި ވާހަކަދައްކަވަމުން މިނިސްޓަރު ޝިޔާމް ވިދާޅުވީ މި ސަރުކާރުގެ އަމާޒަކީ ސަބްސިޑީ ނުދޭ, އަމިއްލަ ފައި މައްޗަށް ތެދުވެފައިވާ ސިނާއަތަކަށް މަސްވެރިކަމުގެ ސިނާއަތް ހެދުން ކަމަށެވެ.
އެ އަމާޒަށް ވާސިލުވުމަށްޓަކައި މަސްވެރި ސިނާއަތް ރަނގަޅުކޮށް، ކުރިއެރުވުމަށް ވަރަށް ގިނަ ކަންކަން ކުރަން އެބަހުރި ކަމަށް ޝިޔާމް ވިދާޅުވިއެވެ. އޭގެ ތެރޭގައި މަސް ރައްކާ ކުރުމުގެ ސްޓޯރޭޖްގެ ދަތިކަމާއި، އައިސްޕްލާންޓްތަކުގެ ދަތިކަމާ އަދި އެ ނޫން ވެސް ގިނަ ކަންތައްތަކެއް މިނިސްޓަރު ފާހަަކުރެއްވިއެވެ.
ޝިޔާމް ވިދާޅުވީ މިހާރު އެއްގަމުގައި 4،200 މެޓްރިކް ޓަނުގެ ސްޓޯރޭޖް ހުރިއިރު ކަނޑުމަތީ ބޯޓުތަކުގައި ހުރި ސްޓޯރޭޖާ ލައިގެން 8،500 މެޓްރިކް ޓަނުގެ ސްޓޯރޭޖް އެބަހުރި ކަމަށެވެ. ނަމަވެސް އެއީ މަސްރައްކާ ކުރުމަށް އެންމެ އެކަށީގެންވާ ވަރުގެ ސްޓޯރޭޖެއް ނޫން ކަމަށް އޭނާ ވިދާޅުވިއެވެ. އެހެންކަމުން މިހާރު މިނިސްޓްރީން ކުރާ މަސައްކަތަކީ އެ 8،500 މެޓްރިކް ޓަނުގެ ސްޓޯރޭޖް، 25،000 މެޓްރިކް ޓަނަށް އިތުރުކުރުން ކަމަށް ޝިޔާމް ވިދާޅުވިއެވެ.
އަޅުގަނޑުމެން މަސްވެރި ސިނާއަތުގަ ކުރަންހުރި ހުރިހާ މަސައްކަތްތަކެއް ކުރަން ހުރި ފައިސާ އަޅުގަނޑުމެން ސެކިއުއާ ކޮށްފިން. ކުރިއަށް އޮތް ދޮޅު އަހަރާއި ދެ އަހަރާ ދޭތެރޭ މިތަންތަނުން ޚިދުމަތް ލިބޭނެ ކަމަށް އަޅުގަނޑުމެން މި ޔަގީންކުރަނީ. އިރާދަކުރެއްވިއްޔާ އެވަރަށް އަޅުގަނޑުމެން މަސައްކަތްކުރާނަން، ފިޝަރީޒް މިނިސްޓަރު އަހުމަދު ޝިޔާމް
ހަމައެއާއެކު އާރްއެސްޑަބްލިއުގެ ނިޒާމު ދެކުނުގެ ރަށްތަކާ އަޅާބަލާއިރު އުތުރުގެ ރަށްތަކުގައި މަދުކަން ވަނީ ފާހަގަކުރައްވާފައެވެ. އެހެންކަމުން ބޮޑަށް އައިސްގެ ޑިމާންޑް އޮތީ އުތުރުގައި ކަމަށާއި މިހާރު ސަރުކާރުން ގާއިމުކުރާ 17 އައިސްޕްލާންޓްތަކުގެ ތެރެއިން ބޮޑުބައެއް އުތުރުގައި ގާއިމުކުރައްވާނެ ކަމަށް ޝިޔާމް ވިދާޅުވިއެވެ.
ޝިޔާމް ވިދާޅުވީ ދިވެހިރާއްޖޭގައި މެރިކަލްޗާ ދާއިރާ ވަރަށް ބޮޑަށް ކުރިއަރާނެ ކަމުގެ މަލަމަތި މިހާރު ފެންނަ ކަމަށެވެ. އެގޮތުން ދުނިޔޭގައި މެރިކަލްޗާގެ ދާއިރާގައި މަސައްކަތް ކުރާ ވަރަށް ގިނަ ބައެއްގެ ޝައުގުވެރިކަން ދިވެހިރާއްޖެއަށް އެބަހުރި ކަމަށް ވެސް ޝިޔާމް ވިދާޅުވިއެވެ.
...އަޅުގަނޑަށް ފެނިގެން މިދަނީ މެރިކަލްޗާ ސިނާއަތަކީ ދިވެހިރާއްޖެއަށް ބޭރުފައިސާ ވައްދާ އެންމެ ބޮޑު އެއް ސިނާއަތަކަށް ވެގެންދާތަން. ރާއްޖޭގެ މަސްވެރި ސިނާއަތް ރަނގަޅުކުރުމަށް ރައީސުލްޖުމްހޫރިއްޔާގެ ސިޔާސަތު ތަންފީޒު ކުރުމަށްޓަކައި އަޅުގަނޑުމެން ހޯދަންޖެހޭ ހުރިހާ ފައިސާއެއް ރައީސުލްޖުމްހޫރިއްޔާ އެހެރީ ހޯއްދަވާފައި. ދެން އޮތީ މިކަންކަން ތަންފީޒުކުރުން، ފިޝަރީޒް މިނިސްޓަރު އަހުމަދު ޝިޔާމް
މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ ވެސް ރައީސް މުއިއްޒުގެ ވައުދުފުޅެކެވެ. އެ ވައުދު ނުފުއްދި، މަސްވެރިންނަށް ފައިސާ ދިނުން ލަސްވާތީ މީގެ ކުރިން މަސްވެރިން އިހުތިޖާޖުކޮށްފައިވެއެވެ. ނަމަވެސް އެ ވައުދުގެ ދަށުން އިއްޔެ ވަނީ މަސްވެރިންނަށް ފުރަތަމަ ޕޭމަންޓު ޖަމާކޮށްދީފައެވެ. ޝިޔާމް ވިދާޅުވި ގޮތުގައި އެއީ މިދިޔަ އާދިއްތަ ދުވަހު މަސްވެރިން ކިރި މަހަށްވާ 2.04 މިލިއަން ރުފިޔާއެވެ.
ހަމައެއާއެކު ރައީސް ވިދާޅުވީ، މިހާތަނަށް މަސްވެރިންނަށް ނުދެވި ހުރި 38 މިލިއަން ރުފިޔާ ވެސް މިދިޔަ ހޯމަ ދުވަހު ޖަމާކޮށްފައިވާ ކަމަށެވެ. އެއީ، މިދިޔަ ދެ ހަފުތާ ތެރޭގައި ދޭންޖެހިފައި ހުރި ފައިސާއެވެ.
އަދި މިއަދުން ފެށިގެން މާލެ އަތޮޅު ހިންމަފުށިންނާއި އައްޑޫ ސިޓީ ހުޅުމީދޫގެ އިތުރުން ކޫއްޑޫއާއި ފެލިވަރުން މަސްވެރިންނަށް އެސްޓީއޯ ރޭޓުގައި ތެޔޮ ގަންނަން ލިބޭނެއެވެ.