ދިވެހި ސަގާފަތާއި އާދަކާދަ ދެއްކުމަށްޓަކައި، މާފުށީ ޖަލުގެ ގޯތިތެރޭގައި "ދިވެހި ސަގާފީ ގޯތި"ގެ ނަމުގައި ކަލްޗަރަލް ސެންޓަރެއް އިފުތިތާހުކޮށްފިއެވެ.
މި ސެންޓަރު އިފުތިތާހުކޮށްދެއްވީ އެކަމަށްޓަކައި މާފުށީޖަލުގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާގެ އަނބިކަނބަލުން، ފަސްޓްލޭޑީ ސާޖިދާ މުހައްމަދެވެ. މި ރަސްމިއްޔާތުގައި ހޯމް މިނިސްޓަރު އަލީ އިހުސާނާއި، ހެރިޓޭޖް މިނިސްޓަރު އާދަމް ނަސީރާއި، ކޮމިޝަނާ އޮފް ޕްރިޒަންސް ހަސަން ޒަރީރުގެ އިތުރުން ވެސް ސަރުކާރުގެ އިސް ބޭފުޅުން ބައިވެރިވެ ވަޑައިގަތެވެ.
މި ސެންޓަރުގެ ބޭނުމަކީ ސަގާފަތް ދިރުވައި އާލާކުރުމާއި ގައިދީންނަށް ސަގާފީ މަސައްކަތްތަކާ ގުޅޭ ތަމްރީން ޕްރޮގްރާމްތައް ކުރިއަށް ގެންދިއުމެވެ.
މި ސެންޓަރު ތަރައްގީކޮށްފައި ވަނީ ރައްޖޭގެ އެންމެ ކުރީގެ މަންޒަރުތައް ވަރަށް ބޮޑަށް ސިފަވާގޮތަށެވެ. އެގޮތުން ގޯތިތެރޭގައި ގެތަކެއ އިމާރާތްކޮށްފައި ވާއިރު، އެއިން ކޮންމެ ތަނަކުން ވެސް ދައްކުވައިދެނީ ތަފާތު މަސައްކަތްތައް ކުރާ ތަނެވެ. އަދި އެއްޗެއް ތައްޔާރުކުރަން ބޭނުންވާ ތަފާތު މަރުހަލާތައް ވެސް ދައްކުވައިދެއެވެ.
"ދިވެހި ސަގާފީ ގޯތި"ން ރޯނުވެށުމާއި ފަންގިވިނުމުގެ ތަފާތު މަރުހަލާތައް، ފުނޑުމާއި ދިވެހި ކެއުން ތައްޔާރުކުރުމުގެ މަރުހަލާތައް، ތިލޭރުކަން، ވަޑާންކުރުން، ރާވެރިކަން އަދި މަސްވެރިކަމަށް ދައު ހެދުމުގެ މަސައްކަތްތައް ވެސް ދައްކުވައިދެއެވެ.
މިއަދު ސާޖިދާ ވަނީ މި މަސައްކަތްތައް ބައްލަވައިލައްވައިފައެވެ.
"ދިވެހި ސަގާފީ ގޯތި" ބައްލަވައިލެއްވުމަށްފަހު ވާހަކަ ދައްކަވަމުން ސާޖިދާ ވަނީ، ދިވެހިންގެ ސަގާފަތަކީ އަދުގެ ދިރިއުޅުމުގެ ބަޔަކަށް ހެދުމަށް އިލްތިމާސްކުރައްވާފައެވެ.
އެކަމަނާގެ ވާހަކަފުޅުގައި މިއަދުގެ ދިވެހިންގެ ދިރިއުޅުމުގެ ބަޔަކަށް ދިވެހިންގެ ރީތި ސަގާފަތް ހެދުމުން ކުރާނެ ފައިދާތަކުގެ މައްޗަށް ވެސް އަލިއަޅުވާލެއްވިއެވެ. އަދި ދިވެހި ސަގާފަތާއި ދިވެހިންގެ ތަރިކައިގެ މައްޗަށް ވަރަށް ތަފުސީލީ ގޮތެއްގައި އަލިއަޅުވާލައްވައި އެކަމަނާ ވަނީ ދިވެހި މުޖުތަމައުގައި ހުރި ކަންބޮޑުވާ މައްސަލަތަކަށް ހައްލު ލިބެން އޮތީ ދިވެހި ގައުމިއްޔަތު އިއާދަކުރެވިގެންކަން ފާހަގަކުރައްވާފައެވެ.
"މިއަދު ދިވެހި މުޖުތަމައު ކަންބޮޑުވަނީ އުފެއްދުންތެރި ދިވެހި ސިކުނޑިތަކެއް ނެތަތީ،" ސާޖިދާ ވިދާޅުވިއެވެ.
މީގެ ކުރިން ކަރެކްޝަނަލް ސާވިސްއިން ވަނީ، ސެންޓަރުގައި ދިވެހި ސަގާފީ މަސައްކަތްތައް ދައްކާލުމަށާއި، ގައިދީންނަށް އެ މަސައްކަތް ދަސްކޮށްދިނުމަށް ޖަލު އޮފިސަރުންނަށް ކޯސްތަކެއް ކުރިއަށް ގެންގޮސްފައެވެ.
"ދިވެހި ސަގާފީ ގޯތި" ދިވެހިންނަށާއި ފަތުރުވެރިންނަށް ހުޅުވާލާނީ، ގައިދީން ތަމްރީނުކުރުމަށް ފަހު ކަމަށް ކަރެކްޝަންސްގެ މީޑިއާ އޮފިޝަލް ވަނީ "ސަން"އަށް މައުލޫމާތު ދެއްވައިފައެވެ. އަދި އާންމުންނަށް މިތަން ހުޅުވާލާނެ ވަކި ތާރީޚެއް ފަހުން އިއުލާނު ކުރާނެ ކަމަށް ވެސް އޭނާ ވިދާޅުވިއެވެ.