ކުރިއަށް އޮތް މަހު ރިލީޒްކުރާ ބަތަލާ ކަންގަނާ ރަނާވަތުގެ ފިލްމު "އިމަޖެންސީ"އާ ގުޅިގެން އެކި ފަރާތްތަކުން ސޯޝަލް މީޑިއާ މެދުވެރިކޮށް ކަންގަނާއަށް މަރުގެ އިންޒާރުތަކެއް ދީފިއެވެ.
ކަންގަނާއަށް ލިބެމުން އަންނަ މަރުގެ އިންޒާރުތަކާ ގުޅިގެން ބަތަލާ ވަނީ އިންޑިއާގެ މަހާރަޝްތުރާ، ޕަންޖާބް އަދި ހިމާޗަލް ޕްރަދޭޝްގެ ލޯ އެންފޯސްމެންޓުގެ ސަމާލުކަމަށް އެކަން ގެނެސް އެކަމާ ގުޅިގެން ފިޔަވަޅު އެޅުމަށް އެދިފައެވެ.
ކަންގަނާ ލީޑް ރޯލް ކުޅެ, ޑައިރެކްޓްކުރާ ފިލްމު "އިމަޖެންސީ"އާ ގުޅިގެން އިންޑިއާގެ ސިކުންގެ ކޮމިއުނީޓީއަކުން ވަނީ ވަރަށް ބޮޑަށް ނުރުހުން ފާޅުކޮށްފައެވެ. މި ކޮމިއުނިޓީއިން ދެކޭ ގޮތުގައި ފިލްމުގައި ކުރީގެ ބޮޑު ވަޒީރު އިންދިރާ ގާނދީގެ ރޯލް ދައްކުވައިދީފައި ވަނީ އިންދިރާ ގާނދީއާ މެދު ނަފުރަތު އުފެދޭ ބީދައިންނެވެ.
އެ މީހުން ތުހުމަތު ކުރާ ގޮތުގައި ފިލްމުގެ ވަރަށް ގިނަ މަންޒަރުތައް ހިމަނާފައިވަނީ އިންޑިއާގެ އެއް ކޮމިއުނިޓީ އަނެއް ކޮމިއުނީޓީއާ މެދު ނަފުރަތު އުފެއްދުމުގެ މަގުސަދުގައެވެ.
ސިކުންގެ ޖަމާއަތެއް ކަމަށްވާ ޝިރޮމާނީ ގުރުދުވާރާ ޕްރަބަންދަކް ކޮމިޓީ (އެސްޖީޕީސީ)އިން ފިލްމު ދެއްކުން މަނާކުރުމަށް ގޮވާލަމުން އަންނައިރު އިންޑިއާގެ ޕަންޖާބުންނާއި ސިކުންނާ އެކު ކަންގަނާގެ ގުޅުން މާ ކުރިން ވެސް ވަނީ ގޯސްވެފައެވެ.
ކަންގަނާ ފިލްމު "އިމަޖެންސީ"ގެ މަންޒަރެއްގައި--ފޮޓޯ/ޓެލެގްރާފްއިންޑިއާ
ޕަންޖާބަށް ނިސްބަތްވާ ސޯޝަލް މީޑިއާ އެކްޓިވިސްޓް ވިކީ ތޯމަސް ސިންގްގެ ވީޑިއޯއެއް އިންޓަނެޓުގައި ދައުރުވާން ފަށާފައިވާއިރު މި ވީޑިއޯ ކްލިޕްގައި އޭނާ ބުނެފައިވަނީ އަމިއްލަ ކަނދުރާ ބަޔަކަށްޓަކާ ޤުރުބާންކުރި ފަދައިން ބައެއްގެ ކަނދުރާ ހަށިގަނޑާ ވަކިކުރަން ވެސް އެ މީހުން ފަސްނުޖެހޭނެ ކަމަށެވެ.
ކަންގަނާގެ އިތުރުން ބަތަލާ މަހިމާ ޗައުދަރީ، އަނޫޕަމް ހޭރް، ޝްރެޔަސް ތަލްޕަޅޭ އަދި މިލިންދު އާނަންދު މުހިއްމު ރޯލް ކުޅޭ "އިމަޖެންސީ" ސިނަމާތަކަށް ގެންނަން ނިންމާފައިވަނީ އަންނަ މަހުގެ ހަވަނަ ދުވަހުއެވެ.