އިޓަލީ ލީގު: ދެ މެޗުން މޮޅުވެވުނީ ވެސް ޔުވޭއަށް އެކަނި

އިޓާލިއަން ސެރީއާގައި ޔުވެންޓަސްއާއި ހެލަސް ވެރޯނާ ބައްދަލުކުރި މެޗު ކާމިޔާބުކޮށް, ޔޫވޭއިން ތާވަލުގެ އެއްވަނައަށް އަރައިފިއެވެ.

ވެރޯނާގެ ދަނޑުގައި ކުޅުނު މި މެޗު ޔޫވޭއިން ކާމިޔާބުކޮށްފައިވަނީ 3-0 އިންނެވެ.

މި މެޗު ޔޫވޭއިން ފެށީ ވަރަށް ފޯރީގައެވެ. ނަތީޖާއަކަށްވީ މެޗުގެ 28 ވަނަ މިނެޓުގައި ލަނޑެއް ޖަހާ މެޗުގެ ލީޑު ނެގުމެވެ. މި ލަނޑު އެ ޓީމަށް ޖަހައިދިނީ ޑުސާން ވްލަހޮވިޗެވެ. މި ލަނޑު ޖެހިތާ 11 މިނެޓު ފަހުން ޔޫވޭއިން ވަނީ އިތުރު ލަނޑެއް ޖަހައި މެޗުގެ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ޔޫވޭގެ އެކަޑަމީއިން ފުރަތަމަ ޓީމަށް އަލަށް ޕްރޮމޯޓްވި ކުޅުންތެރިއެއްކަމަށްވާ ނިކޮލޯ ސަވޯނާއެވެ. މިއީ އޭނާ ޔޫވޭގެ ސީނިއާ ޓީމަށް ކާމިޔާބުކޮށްދިން ފުރަތަމަ ލަނޑެވެ.

ފުރަތަމަ ހާފެކޭ އެއްގޮތަށް ދެވަނަ ހާފު ވެސް ޔޫވޭއިން ފެށީ ހަމަލާއަށް އިސްކަން ދީގެންނެވެ. މި ގޮތުން މެޗުގެ 53 ވަނަ މިނެޓުގައި ލިބުނު ޕެނަލްޓީއަކުން ޔޫވޭގެ ތިންވަނަ ލަނޑު ވްލަހޮވިޗް ކާމިޔާބުކޮށްދީ ލީޑު އިތުރަށް ފުޅާކޮށްދިނެވެ.

އިޓާލިއަން ސެރީއާގައި މިހާރު ކޮންމެ ޓީމަކުން ވެސް ދެ މެޗު ކުޅެފައިވާއިރު ސައްތައިން ސައްތަ ރިކޯޑެއް ދެހެއްޓިފައިވަނީ ހަމައެކަނި ޔޫވޭއަށެވެ. އެ ޓީމުން ކުޅުނު ދެ މެޗު ވެސް ކާމިޔާބުކޮށް، އެ ޓީމު މިހާރު އުޅެނީ ތާވަލުގެ އެއްވަނައިގައެވެ.

ހަތަރު ޕޮއިންޓާ އެކު ދެވަނައިގައި އޮތީ އެންމެ ފަހުގެ ޗެމްޕިއަން އިންޓަ މިލާނެވެ. ހަތަރު ޕޮއިންޓު ލިބުނު ނަމަވެސް ފައިދާގެ ގޯލުގެ ތަފާތުން ތިންވަނައިގައި އޮތީ ޓޮރީނޯއެވެ. އަދިވެސް އިތުރު ހަތަރު ޓީމަކަށް ހަތަރު ޕޮއިންޓު ލިބިފައިވެއެވެ.