އިސްރާއީލުން ޣައްޒާއަށް ދޭ ހަމަލާތައް ހުއްޓުވުމަށް މިސްރުގެ ވެރިރަށް ގާހިރާގައި ކުރިއަށްގެންދިޔަ މަޝްވަރާތަކުން އެއްބަސްވުމަކަށް ނާދެވޭ ކަމަށާއި މެދުވެރިން ހުށަހެޅި ބައެއް ހުށަހެޅުންތަކަށް ހަމާސް އާއި އިސްރާއީލުން އެއްބަސް ނުވާ ކަމަށް މިސްރުގެ ސަލާމަތީ ދެ މަސްދަރަކުން ބުނެފިއެވެ.
ކެނެޑާގެ ހެލިފެކްސްގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެމެރިކާގެ ނޭޝަނަލް ސެކިއުރިޓީ އެޑްވައިޒަރު ޖޭކް ސުލިވާން ވިދާޅުވީ މިސްރާއި ގަތަރާއެކު އެމެރިކާއިން އަދިވެސް މަސައްކަތް ކުރަނީ ހަނގުރާމަ ހުއްޓައިލައި އަސީރުން މިނިވަންކުރުމުގެ އެއްބަސްވުމެއް ގާއިމުކުރުމަށް ކަމަށެވެ.
އެމެރިކާ، މިސްރު އަދި ގަތަރު މެދުވެރިވެގެން ކުރިއަށްދާ މަޝްވަރާތަކުގައި އެންމެ ބޮޑަށް އަލިއަޅުވައިލައިފައިވަނީ މިސްރާއި ޣައްޒާގުޅޭ ސަރަހައްދީ ރޮނގު، ފިލަޑެލްފީ ކޮރިޑޯގެ މައްސަލައަށެވެ. ފިލަޑެލްފީ ކޮރިޑޯ މިވަގުތު އޮތީ އިސްރާއީލުގެ އަތްދަށުގައެވެ. އިސްރާއީލުން އެ ކޮރިޑޯގެ ބާރުތައް ދޫކޮށްލުމަށް ދެކޮޅު ހަދަމުން އަންނައިރު އެތަނުގެ ބާރުތައް ދޫކޮށްލުމަށް ހަމާސްއިން އަންނަނީ ބާރުއަޅަމުންނެވެ.
ހަމާސްއިން ބުނީ ކޮރިޑޯއިން އިސްރާއީލު ސިފައިން ފައިބާނެ ކަމަށް ވައުދުވި ނަމަވެސް އިސްރާއީލުން ވީ ވައުދު ފުއްދައިފައިނުވާ ކަމަށެވެ. އޭގެ ބަދަލުގައި އިތުރު ޝަރުތުތައް ކަނޑައަޅައިފާ ކަމަށެވެ. އޭގެތެރޭގައި ޣައްޒާއަށް އެނބުރި އަންނަ މީހުން ސްކްރީން ކުރުންވެސް ހިމެނޭ ކަމަށް ހަމާސް އިން ވަނީ ބުނެފައެވެ.
މޭ މަހުގެ ތެރޭގައި އިސްރާއީލު ފައުޖުތަކުން ވަނީ އަސްކަރީ ޓޭންކުފަހަރާއެކު އެއްގަމު މަގުން ރަފަހަށް އަރައި ސަރަހައްދީ ރޮނގުގެ ކޮންޓްރޯލު ހޯދަައިފައެވެ. އިސްރާއީލުން ބޭނުން ވަނީ ހަނގުރާމަ ހުއްޓައިލި ނަމަވެސް، ފިލަޑެލްފީ ކޮރިޑޯގެ މައްޗަށް ބާރު ހިންގުމަށެވެ. ނަމަވެސް އިސްރާއީލު ސަރުކާރުގެ ތެރޭގައި ވެސް އެ ކަމާ މެދު ވަނީ ޚިޔާލު ތަފާތުވުން އުފެދިފައެވެ.
އެ ގައުމުގެ ބޮޑުވަޒީރު ބެންޖަމިން ނަތަންޔާހޫ ބުނީ މިސްރު މަގުން ޣައްޒާއަށް ހަތިޔާރު އެތެރެކުރުން ހުއްޓުވަން އެ ތަނުގައި ސިފައިން ތިބެން ޖެހޭނެ ކަމުގައެވެ. ނަމަވެސް ޔަހޫދީންގެ ދިފާއީ އިދާރާތަކުން ދަނީ އެ ކަމާ ދެކޮޅު ހަދަމުންނެވެ.
އޭގެ އިތުރުން, އަސީރުން ބަދަލު ކުރުމުގައި ދެ ފަރާތުގެ މެދުގައި ވަނީ ދެބަސްވުންތައް އުފެދިފައެވެ. ހަމާސްއިން ބުނީ ޖުލައި މަހުގެ ދެ ވަނަ ދުވަހު އެމެރިކާއާއެކު އެއްބަސްވެފައިވާ ތާވަލާ އެއްގޮތަށް އަސީރުން މިނިވަން ކުރަން އެ ޖަމާއަތުން ތައްޔާރަށް އޮތް ކަމަށެވެ.
ޣައްޒާގެ މުސްލިމުންނާ ދެކޮޅަށް އިސްރާއިލުން ހިންގަމުންދާ ލާއިންސާނީ އުދުވާނުގައި މިހާތަނަށް 40،405 މީހުން ވަނީ ޝަހީދުކޮށްލައިފައެވެ. ހަމަލާތަކުގައި ޒަޚަމްވި މީހުންގެ އަދަދު ވަނީ 93،468 އަށް އުފުލިފައެވެ.