މި ސަރުކާރަށް ނުވަ މަސް ވެގެން ދިޔައިރު ރާއްޖޭގެ މާލީ ހާލަތު ރަނގަޅު ކުރުމަށްޓަކައި އެއްވެސް އިސްލާހީ ފިޔަވަޅެއް އަޅާފައިނުވާ ކަމަށާއި، އޭގެ ބަދަލުގައި ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅުތައް ފުއްދަން އުޅޭނަމަ ގައުމު ބަނގުރޫޓުވެދާނެ ކަމަށް މިދިޔަ އެމްޑީޕީ ސަރުކާރުގެ ފިނޭންސް މިނިސްޓަރު އިބްރާހީމް އަމީރު މިއަދު ވިދާޅުވެއްޖެއެވެ.
އަމީރު މިފަދައިން ވިދާޅުވީ، މިހާރު ރާއްޖޭގެ އިގްތިސޯދީ އަދި މާލީ ކަންކަމާ ގުޅޭގޮތުން ހުރި ކަންބޮޑުވުންތައް ހިއްސާކުރެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.
އެ ބައްދަލުވުމުގައި އަމީރު ފާހަގަކުރެއްވީ، މި ސަރުކާރުން ވައުދުތައް ވެފައި ވަނީ އެއްވެސް ވަރަކަށް ރާއްޖެ އޮތް ހާލަތަކަށް ބަލައިގެން ނޫން ކަމަށެވެ.
އެފަދައިން އަމީރު ވިދާޅުވީ އެންމެ ފަހުން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް މިހާރުގެ ފިނޭންސް މިނިސްޓަރު ޑރ. މުހައްމަދު ޝަފީގު ވަޑައިގެން ދެއްކެވި ވާހަކައަށް އިޝާރާތްކުރައްވައެވެ. އެ ކޮމިޓީގައި މިނިސްޓަރު ވަނީ އެންމެ ބޮޑު އިސްކަމެއް ދެއްވާނީ ރައީސް މުއިއްޒުގެ ވައުދުފުޅުތައް ފުއްދުވުމަށްކަމަށް ވިދާޅުވެފައެވެ.
އެކަން ފާހަގަކުރައްވައި އަމީރު ވިދާޅުވީ ގައުމުގެ މާލީ ދެމެހެއްޓެނިވިކަން ހޯދަމުން ރައީސްގެ ހުރިހާ ވައުދުތަކެއް ފުއްދެވުމަށް އެ ވިދާޅުވާ ވިދާޅުވުމަކީ ރައްޔިތުންނަށް ހަގީގަތް އޮޅުވާލުން ކަމަށެވެ.
އެގޮތުން މި ސަރުކާރުގެ 65،000 ހައުސިން ޔުނިޓު އެޅުމުގެ މަޝްރޫއާއި، ރަސްމާލެ ހިއްކުމުގެ މަޝްރޫއާއި، އައްޑޫ ބުރިޖުގެ އިތުރުން ތިލަމާލެ ބުރިޖާއި އެހެނިހެން ވައުދުތަކަށް ގާތްގަނޑަކަށް 100 ބިލިއަނެއްހާ ރުފިޔާ ޚަރަދުވާނެ ކަމަށް އަމީރު ވިދާޅުވިއެވެ.
އެހެންވީމަ ގާތްގަނޑަކަށް މަދުވެގެން 100 ބިލިއަން ރުފިޔާގެ ވައުދުތައް އެބަހުރި ކޮށްފަ. ކުރިއަށް އޮތް ހަތަރު އަހަރުތެރޭ 100 ބިލިއަން ރުފިޔާގެ ވައުދުތައް ފުއްދުމަށްޓަަކައި މާލީ ސިޔާސަތުގެ އަމާޒު ހިފައިފިނަމަ ރާއްޖެ ބަނގުރޫޓުނުވާނެ ގޮތެއް ނުފެނޭ އަޅުގަނޑަކަށް، އިބްރާހީމް އަމީރު
ކުރީގެ ފިނޭންސް މިނިސްޓަރު އިބްރާހީމް އަމީރު މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަނީ: އޭނާ ވިދާޅުވީ ސަރުކާރުގެ ވައުދުތައް ފުއްދާނަމަ ގައުމު ބަނގުރޫޓުވާނެ ކަމަށް -- ސަން ފޮޓޯ/ ނާއިޝް ނާހިދު
ހަމައެއާއެކު އަމީރު ވިދާޅުވީ ފާއިތުވީ ނުވަ މަސްދުވަހު މި ސަރުކާރުން ރިފޯމްގެ ނުވަތަ އިސްލާހީ އެއްވެސް ފިޔަވަޅެއް އެޅުމަށްޓަކައި އެއްވެސް މަސައްކަތެއް ކޮށްފައެއް ނެތް ކަމަށެވެ.
އެގޮތުން މި ސަރުކާރުން ސަބްސިޑީ އާއި އާސަންދައަށް ގެންނަން ނިންމާފައިވާ ކަންކަމަށް އެއްވެސް ބަދަލެއް ގެނެސްފައި ނުވާކަން އޭނާ ފާހަގަކުރެއްވިއެވެ.
އޭގެ ބަދަލުގައި ސިޔާސީ ގޮތުން "ހިތުހުރި ވަރަކަށް" މުވައްޒަފުން އައްޔަނުކޮށް، މުސާރަދީ، ހަދާކަމަށް އަމީރު ވިދާޅުވިއެވެ. އަދި މިދިޔަ ސަރުކާރުން މުވައްޒަފުންނަށް ވަޒީފާދޭތީ އެކަން ގޯސްކޮށް، ވެރިކަމަށް އައުމަށްފަހު އެއަށް ވުރެ އިތުރަށް މީހުން ނަގަމުންދާކަމަށް އޭނާ ތުހުމަތުކުރެއްވިއެވެ.
"ހަމައެކަނި މިދިޔަ ނުވަ މަސްދުވަހު މި ސަރުކާރުން ކޮށްފައި އޮތް ކަމަކީ އަޅުގަނޑުމެން އޭރުކޮށްފައި ހުރި މަސައްކަތްތައް އެއީ ރަނގަޅު އެއްޗެއްތޯ ބެލުން. ރިފޯމުގެ އެއްވެސް މަސައްކަތެއް ކުރެވިފައެއް ނެތް،"
ހަމައެއާއެކު މިއަހަރުގެ ބަޖެޓު 49.9 ބިލިއަނުން 58 ބިލިއަން ރުފިޔާއަށް އިތުރުވާކަމަށް އަމީރު ވިދާޅުވިއެވެ. އަދި މިއަހަރުގެ ބަޖެޓުގެ ކަންކަން ޕްލޭނާ އެއްގޮތަށް ދާނަމަ އަށް ބިލިއަން އިތުރުވެގެން ނުވާނެކަމަށް އޭނާ ވިދާޅުވިއެވެ.
މި ސަރުކާރުން ވެރިކަމަށް އައީ އުމްރާނީ ގޮތުން ބިޔަ ޕްރޮޖެކްޓުތައް ހިންގުމުގެ ވައުދާއެކުގައެވެ. ނަމަވެސް ކުރީ ސަރުކާރުން ބަޖެޓު އެކުލަވާލީ މަޝްރޫއުތަކަށް އެކަށީގެންވާ ވަރަށް ފައިސާ ކަނޑަނާޅައި ކަމަށް މި ސަރުކާރުން ބުނެއެވެ.