ކެންޔާގައި 42 އަންހެނުން މަރާލި ކަމަށް ފުލުހުންގެ ތަހުގީގުގައި އިއުތިރާފުވި މީހަކު ޖަލުން ފިލުމާ ގުޅިގެން އޭނާ ހޯދުމުގެ މަސައްކަތް ފަށައިފިއެވެ.
"ވެމްޕަޔަ، ސައިކޮޕެތް"އެއްގެ ގޮތުގައި ފުލުހުން ސިފަކުރާ 33 އަހަރުގެ ކޮލިންސް ޖުމައިސީ ހައްޔަރުކުރީ ކެންޔާގެ ވެރިރަށުން ގިނަބައެއްގެ ހަށިގަނޑުގެ ބައިތައް ފެނުމާ ގުޅިގެން ޖުލައި މަހުގެ 15 ވަނަ ދުވަހެވެ. އޭނާ ޖަލުން ފިލައިފައި ވަނީ ޖަލުގައިތިބި އެހެން ގައިދީންތަކަކާއެކު އަންގާރަ ދުވަހު ހެނދުނު ކަމަށް ކެންޔާ ފުލުހުންގެ ތަރުޖަމާނު ރެސިލާ އޮންޔަންގޯ ވިދާޅުވިއެވެ.
އެމީހުން ފިލައިގެން ދިޔަކަން އެނގުނީ ފަތިހު ފަހެއް ޖަހައި އެހާކަންހާއިރު ގައިދީންނަށް ނާސްތާ ދިނުމަށް އޮފިސަރުން ޕޮލިސް ސްޓޭޝަންގެ ގޮޅިތަކަށް ޒިޔާރަތް ކުރުމުން ކަމަށް ފުލުހުން ނެރުނު ބަޔާނެއްގައި ބުނެފައިވެއެވެ.
އެ ވަގުތު ޑިއުޓީގައި ތިބި އޮފިސަރުން އެމީހުން ފިލުމަށް އެހީތެރިވެދީފައިވާ ކަމަށް ބެލެވޭތީ، އެމީހުންނަށް ފިޔަވަޅު އަޅައި ބޮޑު ސެކިއުރިޓީ އޮޕަރޭޝަނެއްވެސް ކުރިއަށްދާ ކަމަށް އެކްޓިން ޕޮލިސް އިންސްޕެކްޓަރު ޖެނެރަލް ގިލްބަޓް މަސެންގޯ ވިދާޅުވިއެވެ.
ކެންޔާގެ ޑިރެކްޓަރޭޓް އޮފް ކްރިމިނަލް އިންވެސްޓިގޭޝަންސްގެ ވެރިޔާ މުހައްމަދު އަމީން ވިދާޅުވި ގޮތުގައި ޖުމައިސީ އެއްބަސްވެފައިވަނީ 2022 ވަނަ އަހަރުން ފެށިގެން ދެ އަހަރު ދުވަހުގެ ތެރޭގައި 42 އަންހެނުން މަރާލި ކަމަށެވެ. އެގޮތުން އޭނާ އެންމެ ފުރަތަމަ މަރައިލައިފައި ވަނީ އޭނާގެ އަންހެނުން ކަމަށްވެސް އެއްބަސްވެފައިވާ ކަމަށް އަމީން ވިދާޅުވިއެވެ.
އޭނާ މަރައިލައިފައިވާ މީހުންގެ ހަށިތައް ފެނިފައި ވަނީ ނައިރޯބީގެ ކުނި ގޮނޑަކުންނެވެ. އެ ކުނިގޮނޑުން، ނުވަ މީހެއްގެ ހަށިގަނޑުގެ ބައިތައް ޕްލާސްޓިކް ކޮތަޅުތަކަށް އަޅައިފައި އޮއްވާ ފެނުނު ކަމަށް މީޑިއާ ރިޕޯޓުތައް ބުނެއެވެ.