ސްޕާސްއަށް ލިބުނު ފުރުސަތުތައް ބޭކާރު؛ ވާޑީގެ ލަނޑުން ލެސްޓާއަށް ޕޮއިންޓެއް

އިނގިރޭސި ޕްރިމިއާ ލީގުގައި ޓޮޓްނަމް ހޮޓްސްޕާއާއި އަލަށް ޕްރޮމޯޓްވި ލެސްޓާ ސިޓީ ބައްދަލުކުރި މެޗު އެއްވަރުވެއްޖެއެވެ.

ލެސްޓާގެ ދަނޑުގައި ކުޅުނު މި މެޗު ނިމުނީ 1-1 އިން ދެ ޓީމު އެއްވަރުވެގެންނެވެ.

މެޗުގެ ފުރަތަމަ 45 މިނެޓުގައި ސްޕާސްގެ ފަރާތުން ފެނުނީ ވަރަށް މޮޅު ކުޅުމެކެވެ. މި ހާފު އެއްކޮށް ކަހަލަ ގޮތަކަށް ސްޕާސްއިން ޑޮމިނޭޓްކޮށްގެން ކުޅުނުއިރު ލެސްޓާގެ ގޯލަށް ގިނަ ހަމަލާތަކެއް އުފެއްދިއެވެ. މެޗުގައި ސްޕާސްއިން ކާމިޔާބުކުރި ހަމައެކަނި ލަނޑު މެޗުގެ 29 ވަނަ މިނެޓުގައި ޖޭމްސް މެޑިސަން ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ޕެޑްރޯ ޕޯރޯއެވެ.

މި ހާފުގައި މީގެ އިތުރުން ވެސް ލަނޑު ޖަހާނެ ގިނަ ފުރުސަތު ސްޕާސްއަށް ލިބުނެވެ. ނަމަވެސް، މިއިން އެއްވެސް ފުރުސަތެއްގެ ބޭނުން އެ ޓީމަށް ހިފޭގޮތެއްނުވިއެވެ. މީގެ ތެރެއިން ވެސް އެ ޓީމާ އަލަށް ގުޅުނު ޑިމިނިކް ސޮލާންކީއަށް ލިބުނު ފުރުސަތުތައް ފާހަގަވިއެވެ.

ދެވަނަ ހާފުގައި ލެސްޓާއިން ވަނީ ކުޅުން ރަނގަޅުކޮށްފައެވެ. އެ ގޮތުން، މެޗުގެ 57 ވަނަ މިނެޓުގައި ލެސްޓާއިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އެ ޓީމުގައި މި ވަގުތު ހުރި އެންމެ ތަޖުރިބާކާރު ކުޅުންތެރިޔާ، ޖޭމީ ވާޑީއެވެ. އުމުރުން 37 އަހަރުގެ ވާޑީއަށް ދެވަނަ ހާފުގައި ރަނގަޅު އެތައް ފުރުސަތެއް ލިބުނެވެ.

މި ހާފުގައި ސްޕާސް ފެނުނީ ތަންކޮޅެއް އާދައިގެ ކުޅުމެއްގައެވެ. ނަތީޖާއަކަށްވީ ދެ ޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބުނުކުރެވި މެޗު އެއްވަރުވުމެވެ.

މި ހާފުގައި ސްޕާސްގެ ރޮޑްރިގޯ ބެންޓަކޫއަށް ވަރަށް ބޮޑަށް އަނިޔާވެ، އަށިގަނޑުގައި ބޭލިތަން ފެނުނެވެ. އޭނާއަށް ލިބުނު އަނިޔާގެ ބޮޑު ކުޑަމިން އަދި ނޭނގުނު ނަމަވެސް ސްޕާސްގެ ކޯޗު އެންގާ ޕޮސްޓެކޮގްލޫ ބުނީ، ބެންޓަކޫގެ ހޭ ހުރި ކަމަށާއި މިހާރު ވާހަކަދައްކާ ކަމަށެވެ.