ފިލްމު އިންޑަސްޓްރީގައި އުޅޭ މީހުންގެ ތެރެއިން ތެދުވެރިކަމެއް ނެތި އެހެން މީހުންނާ މެދު އިހާނެތިކޮށް ކަންތައް ކުރި މީހުން ފިލްމީ ތަރި ކަންގަނާ ދެކެ ބިރުގަނެ ޖެހިލުންވާ ކަމަށް އޭނާ ބުނެފިއެވެ.
މަޝްހޫރު ޕޮޑްކާސްޓަ ރާޖް ޝަމާނީގެ ޕޮޑްކާސްޓެއްގައި ވާހަކަދައްކަމުން ކަންގަނާ ބުނެފައިވަނީ މިހާތަނަށް އެއްވެސް މީހަކާ ބެހޭގޮތުން ހަގީގަތާ ހިލާފު ވާހަކައެއް ދައްކާފައި ނޯންނާނެ ކަމަށެވެ. ފިލްމީ ދާއިރާގައި މަސައްކަތް ކުރާ ގިނަ ބަޔަކު ކަންގަނާ ދެކެ ބިރު ގަންނަނީ އެ ސަބަބާ ހެދި ކަމަށާއި އޭނާގެ ވާހަކަތަކުގައި ހަގީގަތް އެފަދަ މީހުންނަށް އެނގޭނެ ކަމަށެވެ.
މިހާތަނަށް ހަތަރު ޤައުމީ އެވޯޑު ހާސިލުކޮށްފައިވާ ބަތަލާ ބުނެފައިވަނީ، ފިލްމު އިންޑަސްޓްރީގައި އުޅޭ މީހުންނާ ބެހޭގޮތުން އޭނާ މިހާތަނަށް ނެރެފައިފާ އެއްވެސް ސްޓޭޓްމަންޓަކާ ގުޅިގެން ހިތާމަ ނުކުރާކަމަށެވެ.
ކަންގަނާ އިންޑިއާގެ ޤައުމީ އެވޯޑު ދިނުމުގެ ހަފްލާގައި ބައިވެރިވަނީ--ފޮޓޯ/ކޮއިމޮއި
ކަންގަނާ އަކީ ފިލްމީ ދާއިރާގެ އިތުރުން އިންޑިއާގެ ޤައުމީ ފެންވަރުގައި ކުރިމަތިވާ ގޮންޖެހުންތަކަށް ވެސް އަބަދު ވެސް ފާޑުކިޔާ މީހެކެވެ. އެ ކަމާ ގުޅިގެން ބައެއް މީހުންގެ ފާޑުކިޔުންތައް ބަތަލާއަށް ރައްދުވެފައިވާއިރު ކަންގަނާ ބުނެފައިވަނީ މިހާތަނަށް އެއްވެސް މީހަކާ ޖަދަލުކޮށް ޒުވާބު ކުރުމުގެ މަގުސަދެއް އޭނާގެ ނެތް ކަމަށެވެ.
އޭގެ ބަދަލުގައި ގިނަ ބަޔަކު ކަންގަނާއާ މެދު ޖެހިލުންވާ ކަމަށާއި އެފަދަ މީހުންނަކީ ތެދެވެރިކަމެއް ނެތް މީހުންގެ ގޮތުގައި ކަންގަނާ ވަނީ ސިފަކޮށްފައެވެ.
ސިޔާސީ ދާއިރާއިން ކަންގަނާއަށް ފުރުސަތު ފަހިވި އެންމެ ބޮޑު އެއް ސަބަބަކީ ވެސް އެއްވެސް ކަހަލަ ޖެހިލުމެއްނެތި ކަންކަމާ ކުރިމަތިލުމުގެ ކުޅަދާނަކަން އޭނާގެ ކިބައިގައި ހުރުން ކަމަށާއި އޭގެ ނަތީޖާ ވެސް ވަރަށް ފޮނި ކަމަށް ކަންގަނާ ވަނީ ބުނެފައެވެ.
އިންޑިއާގެ ޤާނޫނޫ ހަދާ މަޖިލީހުގެ ތިރިގެ، ލޯކް ސަބާގެ މެންބަރުކަން ކުރަމުން އަންނަ ބަތަލާ ދެން އެންމެ އަވަހަށް ފެންނާނީ އަންނަ މަހުގެ ހަވަނަ ދުވަހު ރިލީޒްކުރާ ސިޔާސީ ފިލްމު "އިމަޖެންސީ"އިންނެވެ.