ޚާރިޖީ ވަޒީރު މޫސާ ޒަމީރު ރަސްމީ ދަތުރުފުޅެއްގައި މިއަދު ސައުދީ އަރަބިއްޔާއަށް ފުރާވަޑައިގެންފިއެވެ.
މި ދަތުރުފުޅަކީ ސަޢޫދީ ޢަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން އަލް-ސަޢޫދުގެ ދަޢުވަތަކަށް ކުރައްވާ ދަތުރުފުޅެކެވެ.
ފޮރިން މިނިސްޓްރީން ބުނީ މި ދަތުރުފުޅުގައި، ރައީސް ޑރ. މުޙައްމަދު މުއިއްޒުގެ ސިޓީއެއް ސައުދީގެ ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާން ބިން ޢަބްދުލްޢަޒީޒް އަލް ސައުދަށް އަރުވާނެ ކަމަށެވެ.
މި ދަތުރުފުޅުގައި މިނިސްޓަރު ޒަމީރު ސަޢޫދީ ޢަރަބިއްޔާގެ ޚާރިޖީ ވަޒީރާ އެކު މަތީ ފެންވަރުގެ މަޝްވަރާތަކެއް ކުރައްވާނެ ކަމަށާ މި މަޝްވަރާތަކުގައި ދެ ގައުމުގެ ދެމެދުގައި އޮތް ޒަމާންވީ ގުޅުމާ ގުޅޭ ގޮތުންނާއި، ދެ ފަރާތަށް މުހިންމު ދާއިރާތަކުގައި ކުރިމަގުގައި އެއްބާރުލުން ދެވިދާނެ ގޮތްތަކާ މެދު މަޝްވަރާކުރެވޭނެ ކަމަށްވެސް ފޮރިން މިނިސްޓްރީން ބުންޏެވެ.
މި ދަތުރުފުޅުގައި ޒަމީރު ސައުދީ ސަރުކާރުގެ އިސް ބޭފުޅުންނާއި ސަޢޫދީ ފަންޑް ފޯ ޑިވެލޮޕްމަންޓްގެ ބޭފުޅުންގެ އިތުރުން، ރިޔާދުގައި ދިރިއުޅޭ ދިވެހިންނާ ބައްދަލުކުރައްވާނެ ކަމަށް ވެސް އެ މިނިސްޓްރީން ބުންޏެވެ.
ޒަމީރާއެކު މަރުކަޒީ ބޭންކުގެ ގަވަރުނަރު އަހުމަދު މުނައްވަރު ވެސް ސައުދީއަށް ވަޑައިގަތުމަށް ވަނީ ހަމަޖެހިފައެވެ. އެ ވަފުދުގައި އެމްބެސެޑަރު އެޓް ލާޖް އަޙްމަދު ނަސީރާއި އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް މުޙައްމަދާއި ޖޮއިންޓް ސެކްރެޓަރީ ބަދޫރާ ސަޢީދުގެ އިތުރުން ޑިރެކްޓާ ޖެނެރަލް ޢާއިޝަތު ފަރީނާ ވެސް ހިމެނިވަޑައިގަންނަވާނެއެވެ.
އެ ދަތުރު ނިންމަވާލެއްވުމަށް ފަހު ވަފުދު އެނބުރި ވަޑައިގަންނަވާނީ އަންނަ ބުރާސްފަތި ދުވަހެވެ.
މިއަހަރަކީ ދިވެހިރާއްޖެއާއި ސައުދީ އަރަބިއްޔާއާ ދެމެދު ޑިޕްލޮމެޓިކް ގުޅުން ގާއިމުކުރިތާ 43 އަހަރު ފުރޭ އަހަރެވެ.