ސައިފް އަލީ ޚާން ވަރަށް ވަރުގަދަ ވިލެންއެއްގެ ގޮތުގައި ފެންނާނެ ފިލްމު "ދެވާރާ:ޕާޓް1"ގެ ފުރަތަމަ ޓީޒާ ދައްކާލައިފިއެވެ.
ތެލުގޫ އެކްޓަރު ޖޫނިއަ އެންޓީއާރު ލީޑް ރޯލް ކުޅޭ މި ފިލްމުގެ ޓީޒާ ބެލުންތެރިންނަށް ދައްކާލާފައި ވަނީ އިއްޔެ ފާހަގަކުރި ސައިފްގެ 54ވަނަ އުފަންދުވަހާ ގުޅުވައިގެންނެވެ. ފިލްމުގެ ޓީޒާއާ އެކު ސައިފް ފިލްމުގައި ކުޅޭ 'ބައިރާ'ގެ ރޯލްގައި އެކްޓަރު ފެންނަގޮތް ދައްކުވައިދެއެވެ.
މި ޓީޒާ ބެލުމަށްފަހު ގިނަ ބަޔަކު ބުނެފައި ވަނީ މިއީ މިހާތަނަށް ސައިފް ފެނިފައިނުވާ ފަދަ އަނިޔާވެރި ރޯލެއް ކަމަށާއި ފިލްމު ބަލަން އިތުރަށް ޝައުގު އުފެދިއްޖެ ކަމަށެވެ. އެކްސްގައި ފިލްމުގެ ޓީޒާ ދައުރުވެފައިވާއިރު ސައިފް ކުޅޭ މިފަދަ ކޮންމެ ރޯލަކީ ވެސް ވަރަށް ވަރުގަދަ 'ސެލެބްރޭޝަނެއް'ގެ ގޮތުގައި އެއްބަޔަކު ވަނީ ސިފަކޮށްފައެވެ.
ބަތަލާ ޖާންވީ ކަޕޫރު ފިލްމު "ދެވާރާ"ގެ ޕޯސްޓަރެއްގައި--ފޮޓޯ/ހިންދުސްތާންޓައިމްސް
ފިލްމު "ދެވާރާ:ޕާޓް1" ސިނަމާތަކަށް ގެންނަން ނިންމާފައި ވަނީ ކުރިއަށް އޮތް ސެޕްޓެމްބަރު މަހުގެ 27ވަނަ ދުވަހުއެވެ. ޖޫނިއާ އެންޓީއާރުގެ އާއިލީ ކުންފުނި އެންޓީއާރު އާޓްސްއިން ގެނެސްދޭ މި ފިލްމުގެ ބަތަލާ އަކީ ބޮލީވުޑް ޒުވާން ބަތަލާ ޖާންވީ ކަޕޫރެވެ. މިއީ ޖާންވީ ސައުތު ސިނަމާއަށް ތައާރަފުވާ ފިލްމުވެސް މެއެވެ.
މީގެއިތުރުން މި ފިލްމުގެ ވަރަށް ޚާއްސަ ރޯލަކުން ބޮބީ ޑިއޯލް ވެސް ފެންނާނެއެވެ. ނަމަވެސް ބޮބީ ފިލްމުގައި ފެންނާނެ ރޯލާ ބެހޭ މައުލޫމާތު ހާމަކޮށްފައެއް ނުވެއެވެ.
ރިޕޯޓުތައް ބުނާގޮތުން ބޮބީ ފެންނާނީ ފިލްމު ނިމޭ ހިސާބުންނެވެ. އެހެންވެ ބެލެވޭގޮތުގައި މި ފިލްމުގެ ދެވަނަ ބައިގައި ބޮބީގެ ރޯލް ތަންކޮޅެއް ދިގުވާނެއެވެ. މި ފިލްމުގެ ހިންދީ ވާޝަން ގެނެސްދޭން ނިންމާފައި ވަނީ ކަރަން ޖޯހަރުގެ ދަރުމާ ޕްރޮޑަކްޝަންސްއިންނެވެ.