ގާލްގައިޑް ހަރަކާތުން ގައުމަށް ބޭނުންތެރި އަންހެން ދަރިންތަކެއް ބިނާކުރެވޭނެ ކަމަށާއި އެ ކަމުގެ ފައިދާ ގައުމަށް ކުރާނެ ކަމަށް ރައީސް ޑރ. މުޙައްމަދު މުއިއްޒުގެ އަނބިކަނބަލުން މެޑަމް ސާޖިދާ މުހައްމަދު ރޭ ވިދާޅުވެއްޖެއެވެ.
ސްރީލަންކާގެ ކުރުނެގަލާގައި ބާއްވާ ސިލޯނާ 2024 އިންޓަނޭޝަނަލް ކޭމްޕްގައި މޯލްޑިވްސް ގާލް ގައިޑްސް އެސޯސިއޭޝަނުން ބައިވެރިވާ ގައިޑު ދަރިވަރުންނާއި އެ ދަރިވަރުންގެ ބެލެނިވެރިން އަދި ލީޑަރުންނާ ބައްދަލުކުރައްވަން ރޭ ސަލާޙުއްދީން ސްކޫލުގައި ބޭއްވި ރަސްމިއްޔާތެއްގައި ވާހަކަދައްކަވަމުން މެޑަމް ވަނީ ގާލްގައިޑުންގެ މުހިންމުކަމާ ގުޅޭ ގޮތުން ވާހަކަދައްކަވައިފައެވެ.
އެކަމަނާގެ ވާހަކަފުޅުގައި ގާލްގައިޑް ޙަރަކާތުގައި ބައިވެރިވެ ގިނަ އަންހެން ދަރިންތަކެއް ބިނާވެގެން ދިއުމުގެ ފައިދާ ޢާއިލާތަކާއި މުޖުތަމަޢަށް އަދި މުޅި ޤައުމަށްވެސް ކުރާނެކަން ފާހަގަކުރެއްވިއެވެ.
މެޑަމް ސާޖިދާ: އެ ކަމަނާ ވިދާޅުވީ ގާލްގައިޑް ޙަރަކާތުގައި ބައިވެރިވެ ގިނަ އަންހެން ދަރިންތަކެއް ބިނާވެގެން ދިއުމުގެ ފައިދާ ޢާއިލާތަކާއި މުޖުތަމަޢަށް އަދި މުޅި ޤައުމަށްވެސް ކުރާނެކަމަށް -- ފޮޓޯ/ ރައީސް އޮފީސް
"ގާލްގައިޑް ހަރަކާތުގައި ބައިވެރިވެ ގިނަ ދަރިވަރުންތަކެއް ބިނާވަމުން އައުމަކީ ގައުމަށް ނުހަނު ބޭނުންތެރި ކަމެއް. އޭގެ ލާމަ ކުރިމަގުގައި އާއިލީ ހަޔާތުންނާއި އިޖުތިމާއީ ހަޔާތުންނާއި ގައުމީ ހަޔާތުން ވެސް ފެންނާނެ ކަމެއް،" ސާޖިދާ ވިދާޅުވިއެވެ.
އެ ކަމަނާ ވިދާޅުވީ، ގާލްގައިޑް ހަރަކާތްތަކުގެ އެންމެ ބޮޑު އެއް ބޭނުނަކީ ދިރިއުޅުމުގެ ހުނަރުތަކާއި ބައިނަލްއަގުވާމީ ގުޅުންތަކަށް އަހުލުވެރިކުރުވުން ކަމަށެވެ.
އެ ފަދަ ހަރަކާތްތަކުގައި ބައިވެރިވާއިރު ކޮންމެ ބައިވެރިއަކު ވެސް އެ ބައިވެރިއެއްގެ އަމިއްލަވަންތަ ދީނީ ގައުމީ ޝަހުސިއްޔަތަށް ހުރުމަތްތެރިކޮށް ހިތަން އެ ކަމަނާ ވަނީ އެދިވަޑައިގެންފައެވެ. އަދި، އެ ފަދަ އެހެން މީހުންގެ ޝަހުސިއްޔަތުތަކަށް ކަމޭހިތުމުގެ ގާބިލުކަން ވެސް ގާލްގައިޑުންގެ ކިބައިގައި ހުންނަންވާނެ ކަމަށް އެ ކަމަނާ ވިދާޅުވިއެވެ.
ރޭގެ ރަސްމިއްޔާތުގައި މެޑަމް ސާޖިދާ (މ): ދީނަށް ފަރުވާތެރިވުމާއި ދިވެހި ގައުމަށް ރީތި ނަން ހޯދައިދިނުން އެންމެ ބޮޑު އުފަލަށް ހަދަންޖެހޭ ކަމަށް އެ ކަމަނާ ވިދާޅުވި -- ފޮޓޯ/ ރައީސް އޮފީސް
"ތިޔަ ކޮންމެ ކުއްޖަކު އަބަދު ވެސް ވަރަށް މުހިންމު ދެ ކަމެއް ހަނދާނުގައި ބަހައްޓަންވާނެ. އެއީ، އަހަރެން މިއީ މުސްލިމެއްކަން، އަހަރެން މިއީ ދިވެއްސެއްކަން،" ސާޖިދާ ވިދާޅުވިއެވެ.
"ދީނަށް ފަރުވާތެރިވުމާއި ދިވެހި ގައުމަށް ރީތި ނަން ހޯދައިދިނުން އެންމެ ބޮޑު އުފަލަކަށް ހަދަންވާނެ،"
މި ޖަލްސާގައި މެޑަމް ސާޖިދާ ވަނީ ކޭމްޕުގައި ބައިވެރިވާ ރާއްޖޭގެ ކޮންޓިންޖެންޓުގެ އިސްވެރިޔާއަށް ޤައުމީ ދިދަ ހަވާލުކޮށްދެއްވާފައެވެ.
ސްރީލަންކާގެ ކުރުނެގަލާގައި ބާއްވާ ސިލޯނާ 2024 އިންޓަނޭޝަނަލް ކޭމްޕްގައި ރާއްޖޭގެ 38 ސްކޫލަކުން 305 ގާރލްގައިޑުންނާ، 32 އެޑަލްޓް ލީޑަރުން ބައިވެރިވެއެވެ.