މިއަހަރުގެ އޭޝިއަން ސާފިން ޗެމްޕިއަންޝިޕްގެ ޑިޖިޓަލް ޕާޓްނަރެއްގެ ގޮތުގައި ދިރާގު ސޮއިކޮށްފިއެވެ.
މިއީ މޯލްޑިވްސް ސާފިން އެސޯސިއޭޝަން (އެމްއެސްއޭ) އާއި އޭޝިއަން ސާފިން ފެޑެރޭޝަން (އެފްއެސްއޭ) އިން އިންތިޒާމްކޮށްގެން ރާއްޖޭގައި ބާއްވާ އޭޝިއަން ސާފިން ޗެމްޕިއަންޝިޕްގެ ތިން ވަނަ އެޑިޝަން އެވެ.
މިއަހަރުގެ އޭޝިއަން ސާފިން ޗެމްޕިއަންޝިޕް ބޭއްވުމަށް ހަމަޖެހިފައިވަނީ މިއަންނަ ހޮނިހިރު ދުވަހުން ފެށިގެން މިމަހުގެ 24 ވަނަ ދުވަހުގެ ނިޔަލަށް ކ. ތުލުސްދޫގައެވެ.
ދިރާގުން ބުނީ މިއަހަރުގެ މިބާރާތުގައި ރާއްޖޭގައި 15 ލޯކަލް ރާޅާއެޅުންތެރިން ވާދަކުރާނެ ކަމަށެވެ.
ދިރާގުގެ ކަސްޓަމާ ސާވިސަސް އެންޑް ރީޖަނަލް އޮފީސްތަކުގެ ޑިރެކްޓަރު މަސްއޫދު އަލީ ވިދާޅުވީ ވިދިވިދިގެން ދެވަނަ އަހަރު އޭޝިއަން ސާފިން ޗެމްޕިއަންޝިޕްގެ ޑިޖިޓަލް ޕާޓްނަރަކަށްވެ، މި ބައިނަލްއަޤްވާމީ އިވެންޓް ރާއްޖޭގައި އިންތިޒާމުކުރުމަށް އެހީތެރިވެދިނުމަކީ ލިބޭ ވަރަށް ބޮޑު އުފަލެއް ކަމަށެވެ.
ދިރާގުން ވަނީ، ދިވެހި ކުޅިވަރާއި މުނިފޫހިފިލުވުމުގެ ދާއިރާ ހަރުދަނާކޮށް، އާ ފުރުސަތުތައް ލިބޭ މިފަދަ އިވެންޓްތަކަށް އެހީތެރިވުމަށް އެ ކުންފުނިން އަބަދުވެސް އެއްބާރުލުންދޭ ކަމަށް ބުނެފައެވެ.