ޕްރޮޑިއުސަރު ސަންޖޭ ލީލާ ބަންސާލީގެ ވެބް ސީރީސް "ހީރާ މަންޑީ: ދަ ޑައިމަންޑް ބަޒާރު"އިން ބޮޑު މަގުބޫލުކަމެއް ހޯދި އެކްޓަރު ތާހާ ޝާހަށް ރަމޭޝް ސިއްޕީ އެންޓަޓެއިންމަންޓްގެ ތިން ފިލްމަކުން ފުރުސަތު ލިބިއްޖެއެވެ.
މަޝްހޫރު ފިލްމު "ޝޯލޭ"ގެ ޑައިރެކްޓަރު ރަމޭޝް ސިއްޕީގެ ފިލްމު ކުންފުނިން ތާހާއަށް ހުށަހަޅާފައިވާ ތިން ފިލްމުގެ ޑައިރެކްޓަރަކީ ރަމޭޝް ސިއްޕީގެ ދަރިފުޅު ރޯހަން ސިއްޕީއެވެ. ރޯހަން ސިއްޕީއަކީ ފިލްމު "ކުޗް ނާ ކަހޯ"، "ބްލަފް މާސްޓަ" އަދި "ދަމް މަރޯ ދަމް"ގެ ޑައިރެކްޓަރު ވެސް މެއެވެ.
ތާހާ ޝާހް ވެބް ސީރީސް "ހީރާ މަންޑީ"ގެ މަންޒަރެއްގައި--ފޮޓޯ/މިޑްޑޭ
ވެބް ސީރީޒް "ހީރާ މަންޑީ"ގައި ތާހާ ދައްކުވައިދިން މޮޅު އެކްޓިންއާ އެކު އެ ސީރީޒްއަށް އިތުރު ދިރުމެއް ތާހާ ގެނެސްދީފައިވާ ކަމަށް ރޯހަން ވަނީ ބުނެފައެވެ. ހަމައެއާ އެކު އޯޑިއަންސާ ވަރަށް ވަރުގަދަ ގުޅުމެއް "ހީރާމަންޑީ"އިން ތާހާއަށް ބޭއްވުނު ކަމަށާއި އެއީ ވަރަށް ކުޅަދާނަ އެކްޓަރުންނަށް ނޫނީ ނުކުރެވޭނެ ކަމެއް ކަމަށް ރޯހަން ބުނެފައިވެއެވެ.
ސަންޖޭގެ ވެބް ސީރީޒްއިން ފުރުސަތު ލިބުމުގެ ކުރިން ތާހާ ވަނީ ޒީ5އިން ދެއްކި "ތާޖް" ޑިވައިޑެޑް ބައި ދަ ބްލަޑް"ގައި ވެސް މަސައްކަތްކޮށްފައެވެ.
މީގެކުރިން ފިލްމު އިންޑަސްޓްރީއިން ފުރުސަތުތައް ލިބުން ހަނިވެފައި ވަނިކޮށް ތާހާއަށް ފުރުސަތުތައް ލިބެން ފެށީ ޑައިރެކްޓަރު ސަންޖޭ ހުޅުވައިދިން ފުރުސަތާ އެކު ކަމަށާއި ރަމޭޝް ސިއްޕީގެ ކުންފުނިން އެއްފަހަރާ ތިން ހުށަހެޅުމެއް ލިބުމަކީ ލިބުނު ވަރަށް ބޮޑު ޝަރަފެއް ކަމަށް ތާހާ ވަނީ ބުނެފައެވެ.