މާލެއަށް ދިމާވެފައިވާ ފެން ބޮޑުވުމުގެ މައްސަލަ ހައްލުކުރުމަށް ދިމާވެފައިވާ އެންމެ ބޮޑު ގޮންޖެހުމަކީ މާލޭގެ މަގުތައް ހެދުމުގައި ބިމަށް ފެން ހިނދޭ ގޮތަށް ކޮށްފައިވާ ޑިޒައިނާ އެއްގޮތަށް މަސައްކަތް ނުކުރުމުން ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
މިއަދު ހެނދުނުން ފެށިގެން މާލޭ ހިމެނޭ ގޮތަށް މުޅި ރާއްޖޭގެ ބޮޑު ބަޔަކަށް އަންނަނީ ވަރަށް ބޮޑަށް ވިއްސާރަކުރަމުންނެވެ. ވިއްސާރައިގެ ތެރެއިން މިއަދު މުޅި މާލޭގައި ވަނީ ފެންބޮޑުވެފައެވެ.
މި ކަމާ ގުޅިގެން އެކްސްގައި ކުރެއްވި ޕޯސްޓެއްގައި މިނިސްޓަރު މުއްތަލިބު ވިދާޅުވީ، މާލޭގެ ހުރިހާ މަގުތައް ރަނގަޅު ފެންވަރަކަށް ހެދުމަށް ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދިއުމަށް ރާވާފައިވާ މަޝްރޫއުގައި އެންމެ ބޮޑު އިސްކަމެއް ދޭނީ މާލެއަށް ދިމާވެފައިވާ ފެން ބޮޑުވުމުގެ މައްސަލައަށް ދާއިމީ ހައްލެއް ހޯދުމަށް ކަމަށެވެ. އެގޮތުން، އެކަމަށް އެކަށޭނެ ސްޓޯމްވޯޓާ މެނޭޖްމަންޓް ސިސްޓަމެއް ގާއިމުކުރާނެ ކަމަށް މިނިސްޓަރު ވިދާޅުވިއެވެ.
އަދި، މި ޕްރޮޖެކްޓަކީ މުޅި މާލެ ސާވޭކޮށް، ޑިޒައިން ކޮށްގެން ކުރިއަށް ގެންދެވޭނެ މަޝްރޫއަކަށްވާތީ، މަޝްރޫއު ނިމޭއިރު މާލެއަށް ދިމާވެފައިވާ ފެން ބޮޑުވުމުގެ މައްސަލަ އެއްކޮށް ހައްލުވާނެ ކަމަށް މުއްތަލިބު ވިދާޅުވިއެވެ.
މި ކަމާ ގުޅިގެން ޑިފެންސް މިނިސްޓަރު ގައްސާން މައުމޫނު ވެސް ވަނީ ފެންބޮޑުވުމުގެ ސަބަބުން ރައްޔިތުންނަށް އެހީވުމަށްޓަކައި ސިފައިންގެ އެއްބާރުލުން ލިބޭނެ ކަމަށް ވިދާޅުވެފައެވެ.
އަދި، ސިފައިންގެ ވެރިޔާ، ރައީސް ޑރ. މުހައްމަދު މުއިއްޒުގެ އަމުރާއެކު ރައްޔިތުންނަށް އެހީވުމަށް މަގުމަތީގައި ސިފައިން ބައިތިއްބާނެ ކަމަށް ވެސް ގައްސާން ވިދާޅުވިއެވެ. އަދި، ފެން ހިންދުމުގެ މަސައްކަތުގައި ވެސް އެހީތެރިވާނެ ކަމަށް ގައްސާން ވިދާޅުވިއެވެ.
މޫސުން ގޯސްވެ، ރާއްޖޭގެ އެކި ހިސާބުތަކަށް ވިއްސާރަކުރަމުންދާއިރު، މިއަދުގެ 13:00އިން ފެށިގެން 17:00ގެ ނިޔަލަށް ހއ. އަތޮޅުން ފެށީގެން އދ. އަތޮޅަށް ވަނީ ރީނދޫ ސަމާލު ވެސް ނެރެފައެވެ.
އަދި، ގަޑިއަކު 50 މޭލަށް ވައިގަދަވެ، ކަނޑުތައް ގަދަވާނެ ކަމަށް މޫސުމާބެހޭ ގައުމީ އިދާރާ (މެޓް)އިން ލަފާކޮށްފައިވެއެވެ. ރާޅުގެ އުސްމިން ހުންނާނީ ހަ ފޫޓާއި ނުވަ ފޫޓާ ދެމެދުގައި ކަމަށް ލަފާކޮށްފައިވާއިރު، ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ވެސް ކުރުން އެކަށީގެންވާތީ، ހުރިހައި ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.
މީގެ ކުރިން ވަނީ މި ތިން ދުވަހުގެ ތެރޭގައި އެއް މަސް ދުވަހުގެ ވާރޭ މާލެއަށް ވެހޭނެ ކަމަށް ލަފާކޮށްފައެވެ.