ރަޝިޔާ އާއި ވެނެޒުއޭލާއިން އެންކްރިޕްޓެޑް މެސެޖިންގ އެޕް ކަމުގައިވާ ސިގްނަލް ބްލޮކްކޮށްފިކަމަށް ދަ ވާޖް އިން ރިޕޯޓުކޮށްފިއެވެ.
ރަޝިޔާގައި ސިގްނަލް އެޕް ބްލޮކްކުރި ޚަބަރު އެންމެ ފުރަތަމަ ހާމަކުރީ ރަޝިޔާގެ ނިއުސް ސަރވިސް އިންޓަރފެކްސް އިންނެވެ.
ރަޝިޔާގެ ޓެލެކޮމިއުނިކޭޝަންސް ވޮޗްޑޮގް ރޮސްކޮމްނާޒޯރުން މި އެޕް ހިފަހައްޓާފައިވަނީ "ޓެރަރިސްޓް އަދި ހަރުކަށި ފިކުރުގެ ބޭނުންތަކަށް މެސެންޖަރ ބޭނުންކުރުން ހުއްޓުވުމަށް ކުރަންޖެހޭ ރަޝިޔާގެ ޤާނޫނުތަކުގެ ޝަރުތުތަކާ ޚިލާފުވުމުގެ ސަބަބުން" ކަމަށް ރަޝިޔާގެ ރިޕޯޓުގައި ބުނެފައިވެއެވެ.
ސައިބާ ސެކިއުރިޓީ ޓްރެކާ ނެޓްބްލޮކްސް އިން ހުކުރު ދުވަހު އެކްސްގައި ކަށަވަރުކޮށްދިންގޮތުގައި ރަޝިޔާއިން "ގިނަ އިންޓަނެޓް ޕްރޮވައިޑަރުތަކުގައި" ސިގްނަލްއަށް ވަނުން ހިފަހައްޓާފައިވެއެވެ. ނަމަވެސް ސިގްނަލްގެ ސެޓިންގްސްގައި "ސެންސާޝިޕް ސާކަމްވެންޝަން" އެނޭބަލްކޮށްގެން އެޕް ބޭނުންކުރެވޭނެކަމަށް ވެސް ނެޓްބްލޮކްސް އިން ފާހަގަކޮށްފައިވެއެވެ.
މިއީ ދެ ސަރަހައްދުގައި ވެސް މެސެޖުތައް ބްލޮކްކުރެވިފައިވާ ޔޫޒަރުންނަށް ސިގްނަލްގެ އެކްސް އެކައުންޓުން ދީފައިވާ ލަފައެކެވެ.
ވެނެޒުއޭލާގައި ސިގްނަލް ބްލޮކްކުރުން ދިމާވެފައިވަނީ ޖުލައި މަހުގެ ފަހުކޮޅު ބޭއްވުނު ރިޔާސީ އިންތިޚާބުގެ ނަތީޖާއާމެދު ޚިލާފު އުފެދިފައިވަނިކޮށެވެ.
އެސޯސިއޭޓެޑް ޕްރެސްގެ ރިޕޯޓެއްގައިވާ ގޮތުން، ވެނެޒުއޭލާގެ އިލެކްޓޯރަލް އޮތޯރިޓީން ޕްރެޒިޑެންޓް ނިކޮލާސް މަދޫރޯ އިންތިޚާބު ކާމިޔާބުކުރި ކަމަށް އެއްވެސް ހެއްކެއް ހާމަނުކޮށް ސިގްނަލްގައި އިއުލާނުކުރުމާ ގުޅިގެން، މަދޫރޯގެ ވާދަވެރިޔާ އެޑްމުންޑޯ ގޮންޒާލެޒްގެ ތާއީދުކުރާ ފަރާތްތަކުންނާއި އިދިކޮޅު ފަރާތްތަކުން އިހުތިޖާޖު ކޮށްފައިވެއެވެ.
މީޑިއާ ރިޕޯޓްތައް ބުނާގޮތުގައި މި ދެ ސަރަހައްދުގައި ވެސް މިފަދަ ސޯޝަލް މީޑިއާ އެޕްތަކަށް ވަނުން ހުއްޓުވަމުންދަނީ އިދިކޮޅު އަޑުތައް މަޑުކުރުމުގެ ގޮތުން ކަމަށް ބެލެވެއެވެ.