ހިޔާ ފުލެޓުގެ 'އެޗް5'ގެ 318 ނަންބަރު އެޕާޓްމަންޓަށް މީހުން ގެންގޮސް ބަރަހަނާކޮށް ފޭރުނު މައްސަލައިގައި ހިމެނޭ އަންހެނެއްގެ މަންމަ ހަމަ އެފަދަ މައްސަލައެއްގައި ހޯދަން ފުލުހުން މިއަދު އިއުލާނުކޮށްފިއެވެ.
ފުލުހުން ހޯދަން އިއުލާނުކޮށްފައިވަނީ މ. ގޯބިލިގަސްދޮށުގެ، ސަލީމާ ސަލީމެވެ.
މި ކަމާ ގުޅިގެން ފުލުހުން ކުރި އިއުލާނެއްގައި ވަނީ އޭނާ ހޯދަނީ ފުވައްމުލަކު ސިޓީ ޕޮލިސް ސްޓޭޝަނުން ތަހުގީގުކުރާ، މަކަރާއި ހީލަތުގެ މައްސަލައެއްގެ ތަހުގީގަށް ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައިނުވާތީ ކަމަށެވެ.
އެހެންކަމުން މި މައްސަލަ ތަހުގީގުކުރުމަށްޓަކާ އަންނަ ހަފުތާގެ އަންގާރަ ދުވަހު ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގަށް ހާޒިރުވާން އޭނާއަށް ވަނީ އަންގާފައެވެ.
މީގެ ކުރިން މި ފަދަ މައްސަލައެއްގައި އޭނާގެ ދަރިފުޅު މ. ގޯންބިލިގަސްދޮށުގެ، އައިމިނަތު ހުމައިނާ ޒަކަރިއްޔާ، 24 ހައްޔަރުކުރިއެވެ. އޭނާ ހައްޔަރުކުރީ ހިޔާ ފުލެޓު އެޕާޓްމަންޓަށް އޮޅުވާލައިގެން މީހުން ގެންގޮސް ބިރުދައްކައި ޖިސްމާނީ އަނިޔާކޮށް އެ މީހުން ގަދަކަމުން ބަރަހަނާކުރުމަށް ފަހު، ބްލެކްމެއިލްކޮށްގެން އެ މީހުންގެ އަތުން ގިނަ އަދަދެއްގެ ފައިސާއާއި މޯބައިލްފޯނު ފަދަ ތަކެތި އަތުލުމުގެ ތުހުމަތުގައެވެ.
ހުމައިނާއަކީ މާބަނޑު އަންހެނަކަށްވާތީ އޭނާގެ ސިއްހީ ހާލަތަށް ރިއާޔަތްކޮށް ކޯޓަށް ނުގެންގޮސް ދޫކޮށްލާފައިވާ ކަމަށް ހުޅުމާލޭ ފޭސް ދޭއްގެ ޕޮލިސް ސްޓޭޝަންގެ ހެޑް، ސުޕްރިޑެންޓް އޮފް ޕޮލިސް ރަޖުނީ ޝުއައިބު މީގެ ކުރިން ވިދާޅުވިއެވެ. އެ މައްސަލައިގައި ހިމެނޭ އިތުރު މީހުން ބަންދުކުރިއެވެ.
ރަޖުނީ ވިދާޅުވީ، އެ އެޕާޓްމަންޓަށް މީހުން ގެންގޮސްފައިވަނީ އެ ތަނުގެ ތެރޭގައި ފައިސާއަށް ހަށިވިއްކާ ކަމަށް އިޝްތިހާރުކޮށްގެން ކަމަށެވެ. އެގޮތުން، ސޯޝަލް މީޑިއާގެ އެކިއެކި ޕްލެޓްފޯމްތަކުގައި އަންހެނުންގެ ނަމުގައި އައިޑީތައް ހަދައިގެން ފިރިހެނުންނާ ގުޅުން އުފެއްދުމަށް ފަހު ހަށިވިއްކާ ކަމަށް ބުނެ އޮޅުވާލައިގެން އެ އެޕާޓްމަންޓަށް މީހުން ގެންދިޔަ ކަމަށް ރަޖުނީ ވިދާޅުވިއެވެ.
އަދި، މި މައްސަލައިގައި ހިމެނޭ އަންހެނުން ހިޔާ ސަރަހައްދުން އުމުރުން ދުވަސްވީ މީހުންނާ ބައްދަލުކޮށް ހަށިވިއްކާ ކަމަށް ބުނެ، އެ އެޕާޓްމަންޓަށް އެ މީހުން ގެންގޮސް، ބަރަހަނާކޮށް ފައިސާ ފޭރިފައިވާ ކަމަށް ވެސް ރަޖުނީ ވިދާޅުވިއެވެ.