ޝާހްރުކް ޚާންގެ ދަރިފުޅު ސުހާނާ ޚާން ސްކްރީނުން ފެންނާނު ފުރަތަމަ ފިލްމު "ކިންގް"ގެ ވަރަށް ޚާއްސަ ރޯލަކަށް ޒުވާން އެކްޓަރު އަބޭ ވަރުމާ ސޮއިކޮށްފިއެވެ.
އަބޭ ވަރުމާއަކީ ދާދި ފަހުން ރިލީޒްކޮށް ބޮކްސް އޮފީހުގައި ބޮޑު ކާމިޔާބީއެއް ހޯދި ހޮރޯ ކޮމެޑީ ފިލްމު "މުންޖިއާ"ގެ ލީޑް އެކްޓަރެވެ.
ފިލްމީ ޚަބަރުތައް ބުނާގޮތުން "ކިންގް"ގައި އަބޭ ވަރުމާ ކުޅެން ހަމަޖެހިފައިވަނީ ސުހާނާގެ ލޯބިވެރިޔާގެ ރޯލެވެ. ފިލްމު "މުންޖިއާ"ގެ އިތުރުން އަބޭ ވަރުމާ ވަނީ އެމޭޒަން ޕްރައިމްގައި ޕްރިމިއާކުރި ވަޠަނީ ފިލްމު "އޭ ވަޠަން މެރޭ ވަޠަން"ގެ ވެސް ވަރަށް މުހިއްމު ރޯލެއް ކުޅެފައެވެ.
ސުހާނާ ޚާން--ފޮޓޯ/ޕިންކްވިލާ
މަޝްހޫރު ޑައިރެކްޓަރު ސިދާތު އާނަންދުގެ ފިލްމު ކުންފުނި މާފްލިކްސްއާއި ޝާހްރުކް ޚާންގެ ފިލްމު ކުންފުނި ރެޑް ޗިލީޒް ގުޅިގެން އުފައްދާ "ކިންގް"އިން ފެންނާނެ އިތުރު ތަރިންގެ ތެރޭ އެކްޓަރު އަބީޝެކް ބައްޗަން ވެސް ހިމެނެއެވެ.
މި އަހަރުގެ ނޮވެމްބަރު މަހު ފިލްމުގެ މަސައްކަތް ފަށަން ތައްޔާރުވަމުން އަންނައިރު ފިލްމުގެ ވަރަށް ބޮޑު ބައެއް އިންޑިއާއިން ބޭރު ޤައުމުތަކުގައި ޝޫޓްކުރަން ވަނީ ނިންމާފައެވެ. ވަރަށް ވަރުގަދަ އެކްޝަން ތުރިލާއެއްގެ ގޮތުގައި އުފައްދާ މި ފިލްމަކީ، ނެޓްފްލިކްސްގެ ފިލްމު "ދި އާޗީސް"އަށް ފަހު ސުހާނާ މަސައްކަތް ކުރާ އެންމެ ބޮޑު އެއް ފިލްމެވެ.
ޑައިރެކްޓަރު ސުޖޯއި ގޯޝްގެ މި ފިލްމު ރަސްމީކޮށް އިއުލާނުކޮށްފައިނުވާތީ ފިލްމާ ބެހޭ ވަރަށް ގިނަ މައުލޫމާތުތައް ވަނީ ސިއްރުކޮށްފައެވެ. ޚާއްސަކޮށް މިއީ ސިނަމާއިން ސުހާނާގެ ކެރިއަރު ރަސްމީކޮށް ފަށާނެ ފިލްމަށް ވާތީ ޝާހު ބޭނުންވަނީ ދަރިފުޅުގެ މި ފިލްމުގެ މަސައްކަތްތަކަށް ވަރަށް އިސްކަމެއް ދީގެން ކުރުމަށެވެ.