ޕާކިސްތާނުގެ އެކްސްޕޯ ސެންޓަރު ކަރާޗީގައި މިހާރު ކުރިއަށްދާ ދެވަނަ ބައިނަލްއަޤްވާމީ ކާބޯތަކެއްޗާއި ދަނޑުވެރިކަމުގެ މައުރަޒުގައި ރާއްޖޭގެ ކެއްކުންތަކާއި ރަހަތައް ރާއްޖޭގެ ޝެފް އިސްހާގް ޞާލިހު ދައްކައިލައިފިއެވެ.
ޝެފް ގިލްޑް މޯލްޑިވްސްއިން ބުނީ މިދިޔަ ހުކުރު ދުވަހުން ފެށިގެން މާދާމާގެ ނިޔަލަށް ކުރިއަށް ގެންދާ މި ހަރަކާތަކީ ޕާކިސްތާނުގެ ޓްރޭޑް ޑިވެލޮޕްމަންޓް އޮތޯރިޓީން އިންތިޒާމްކޮށްގެން ބާއްވާ ހަރަކާތެއް ކަމަށެވެ.
ޝެފް ގިލްޑް މޯލްޑިވްސް އިން ބުނީ މި ހަރަކާތުގައި ރާއްޖެއިން ބައިވެރިވުމުގެ ބޭނުމަކީ ރާއްޖޭގެ ތަފާތު ކެއުންތައް ދުނިޔޭގެ ބެލުންތެރިންނަށް ތައާރަފް ކޮށްދިނުން ކަމަށެވެ.
މި އިވެންޓުގައި ދެ ވަނަ ގްލޯބަލް ކުއިޒިން ކޫކިން ޝޯގައި ބައިވެރިވުމަށް ޕާކިސްތާނުގެ ޓްރޭޑް ޑިވެލޮޕްމަންޓް އޮތޯރިޓީގެ ދައުވަތަކަށް ކަރާޗީއަށް ޒިޔާރަތްކުރާ ޝެފްސްގިލްޑް އޮފް މޯލްޑިވްސްގެ ނައިބު ރައީސް ޝެފް އިސްހާގް ސޯލިހުގެ މާސްޓާ ކްލާސް ޕްރެޒެންޓޭޝަނެއް ވަނީ ބާއްވައިފައެވެ.
މިއަދު އޮތް ޝެފް އިޝާގް ސޯލިހުގެ މާސްޓާ ކްލާސް ޕްރެޒެންޓޭޝަންގައި ރާއްޖޭގެ ކެއުންތަކަށް އަލިއަޅުވައިލިއެވެ. އަދި ރާއްޖޭގެ ބަޖިޔާ، ކަނޑު ކުކުޅާއި ބަނބުކޮޔޮ ޕުޑިން އާއެކު، ސަގާފީ ކެއުންތައް ދައްކާލައިފައިވެއެވެ.
ޝެފް ސޯލިހަކީ ވޯލްޑްޝެފްސް ސެޓްފިކެޓް ލިބިފައިވާ ކޮންޓިނެންޓަލް ޖަޖެކެވެ.
އެގޮތުން ފުރަތަމަ ސީޖީއެމް ޝެފްސް އެވޯޑްސް 2022 ގައި އެގްޒެކެޓިވް ޝެފް އެވޯޑާއި ލޯންގް ސާވިސް ސްޕެޝަލް އެވޯޑް ހާސިލްކޮށްފައިވާ ޝެފް ސޯލިހް މިހާރު މަސައްކަތް ކުރަނީ ރޯޔަލް އައިލެންޑް ރިސޯޓުގެ އެގްޒެކެޓިވް ޝެފްގެ ގޮތުގައެވެ.
ޝެފްސް ގިލްޑް އޮފް މޯލްޑިވްސް އަކީ ރާއްޖޭގެ ޝެފުންނަށް ހާއްސަކޮށްގެން މަސައްކަތްކުރުމަށް ތަޢާރަފްކުރެވުނު ފުރަތަމަ ޖަމިއްޔާއެވެ.