އިންޑިއާއަކީ ރާއްޖެއަށް އަގުނުކުރެވޭ ވަރުގެ އެކުވެރިއެއް ކަމަށާއި، ރާއްޖެއަށް އެހީތެރިކަން ބޭނުންވާ ކޮންމެ ވަގުތެއްގައި އިންޑިއާގެ އެހީތެރިކަން ލިބޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ، އިންޑިއާގެ އެގްޒިމް ބޭންކުން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގައި ގާއިމްކޮށްފައިވާ ފެނާއި ނަރުދަމާ ނިޒާމްގެ މަސައްކަތްތައް ނިންމައި އިންޑިއާ ސަރުކާރުން ހަވާލުކުރުމަށްޓަކައި މިއަދު ރައީސް އޮފީހުގައި ބޭއްވި ރަސްމިއްޔާތުގައެވެ.
މި ރަސްމިއްޔާތުގައި އިންޑިއާ ސަރުކާރުގެ ފަރާތުން އެ މަޝްރޫއުތަކުގެ މަސައްކަތް ނިންމާ ރަސްމީކޮށް ހަވާލުކޮށްދެއްވީ އެގައުމުގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު: އެމަނިކުފާނު ވިދާޅުވީ އިންޑިއާއަކީ ރާއްޖެއަށް އަގުނުކުރެވޭ ވަރުގެ އެކުވެރިއެއް ކަަަމަށް -- ފޮޓޯ/ ރައީސް އޮފީސް
ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ޖައިޝަންކަރުގެ ދަތުރުފުޅާއެކު އިންޑިއާއާއެކު އޮތް ޒަމާންވީ ރަހުމަތްތެރިކަމުގެ ގުޅުން އިތުރު ހަރުފަތަކަށް މައްޗަށް ގޮސް ދެ ގައުމުގެ ގުޅުން އިތުރުވާނެ ކަމަށެވެ. އަދި އެ ގުޅުން ކުރިއަށް އޮތް ތަނުގައި ވެސް ހަރުދަނާކުރުމަށްޓަކައި މި ސަރުކާރުން އެއްބާރުލުން ދެއްވާނެ ކަމުގެ ޔަގީންކަން ރައީސް ވަނީ އަރުވާފައެވެ.
ރައީސް ވިދާޅުވީ، އިންޑިއާއަކީ ރާއްޖެއަށް ބޭނުމެއް ޖެހޭ ހިނދެއްގައި އެހީތެރިވުމަށް އެންމެ ކުރީ ސަފުގައި އޮންނަ ގައުމެއް ކަމަށެވެ.
"އިންޑިއާއަކީ ބޭނުންޖެހޭ ކޮންމެ ވަގުތެއްގައި ރާއްޖެއަށް އެހީތެރިވާން އޮންނަ ގައުމެއް. އަދި އެކި ދާއިރާތަކުން ރާއްޖެއަށް އެހީތެރިވުމުގައި އަގުނުކުރެވޭ އަވައްޓެރިއެއް،" ރައީސް މުއިއްޒުގެ ވާހަކަފުޅުގައި ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އަރިހަށް، އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު ޢިހްތިރާމުގެ ޒިޔާރަތެއް ކުރެއްވުން--- ފޮޓޯ: ރައީސް އޮފީސް
ހަމައެއާއެކު އިންޑިއާގެ އެހީގައި ކުރިއަށް ގެންދިޔަ މަޝްރޫއުތަކަކީ ރާއްޖޭގެ ތަރައްގީއާއި ކުރިއެރުމަށް ވަރަށް މުހިއްމު އެހީއެއް ކަމަށް ރައީސް ވިދާޅުވިއެވެ. އަދި އެ މަޝްރޫއުތަކާއެކު ރައްޔިތުންގެ ދިރިއުޅުމުގެ ހާލަތާއި ފެންވަރު ރަނގަޅުވާނެ ކަމަށް ވެސް އެމަނިކުފާނު ވިދާޅުވިއެވެ.
މިއަދުގެ ރަސްމިއްޔާތުގައި ރައީސް އޮފީހުގެ އިސްވެރިންނާއި، ކެބިނެޓުގެ ވަޒީރުންގެ އިތުރުން އިންޑިއާ ސަފީރު މުނު މަހާވަރު ވެސް ވަނީ ބައިވެރިވެވަޑައިގެންފައެވެ.