މިއަދު ހެނދުނު މާލޭގައި ވޮލެޓެއް ފޭރި، ދަބަހެއް ވަގަށް ނެގި މައްސަލަތަކެއްގައި ހަތަރު މީހަކު، ވޮލެޓާއި ދަބަހާއެކު އަތުލައިގެންފިއެވެ.
ފުލުހުން ބުނީ، ވައްކަން ކުރީ ރަސްފަންނަށް މޫދަށް އެރި އުޅުނު ބަޔަކު އަތްދަބަސް ގަސްތަކެއްގެ ކައިރީގައި ބާއްވާފައި އޮއްވާ ކަމަށެވެ.
އެ މައްސަލަ މާފަންނުގައި ޕެޓްރޯލް ކުރަމުންދިޔަ ފުލުހުންގެ ސަމާލުކަމަށް އައީ 10:50ހާއިރު ކަމަށާއި، ދަބަސް ވަގަށް ނެގި މީހުން ހޯދުމަށް ސީސީޓީވީ ފުޓެޖު ބަލައިގެން ދެނެގަތް ކަމަށް ފުލުހުން ބުންޏެވެ.
"އެ މީހުން ހޯދުމަށް ކުރި މަސައްކަތް މަޖީދީ މަގު، ދިލްބަހާރު މަގު ގުޅޭ ހިސާބުން 11:50އެހާކަންހާއިރު އެމީހުން ހައްޔަރުކޮށް ރަސްފަންނުން އެމީހުން ވަގަށް ނެގި އަތް ދަބަސް ވަނީ ހޯދާފައި،" ފުލުހުންގެ މެސެޖުގައިވެއެވެ.
އެ އަތްދަބަހުގައި އޮތް ދެ ފޯނާއި އެހެނިހެން ތަކެތިވެސް ހޯދައި ވެރިފަރާތާ ހަވާލުކޮށްފައިވާ ކަމަށް ފުލުހުން ބުންޏެވެ.
އެ މައްސަލައާ ގުޅިގެން ހައްޔަރުކުރީ ތ. ތިމަރަފުށީ، ލަކީ ހައުސް، ސޮފްވާން އަލީ އާއި ގއ. ވިލިނގިލި، ޒިއުރިކް ވިލާ، ހަސަން ތައުފީގެވެ.
ވޮލެޓެއް ފޭރުނު މައްސަލަައިގައި ހައްޔަރުކުރި ދެ މީހުން: ވޮލެޓާއި އޭގައި ހުރި ފައިސާ ވެސް ފުލުހުން ވަނީ ހޯދައިފައި -- ފޮޓޯ/ ފުލުހުން
ވޮލެޓް ފޭރުނު މައްސަލައާ ގުޅޭ ގޮތުން ފުލުހުން ބުނީ، 9:40ހާއިރު ހެންވޭރު ޕޮލިސް ސްޓޭޝަންގެ ފުލުހުން ޕެޓްރޯލް ކުރަމުން ދިޔައިރު ސޯސަން މަގުން ސައިކަލެއްގައި ދިޔަ މީހަކު ބިދޭސީއެއްގެ ވޮލެޓް ފޭރުނު ކަމުގެ މައުލޫމާތު ލިބިފައިވާ ކަމަށެވެ.
ފުލުހުން އެ ސައިކަލު ފަހަތުން ގޮސް، ސައިކަލް ދުއްވި މީހާ ކަސްތޫރި މަގުން ފުލުހުންގެ ބެލުމުގެ ދަށަށް ގެންދިޔަ ކަމަށް އެ މެސެޖުގައިވެއެވެ. އަދި ސައިކަލް ފަހަތުގައި އިން މީހާ އެ ހިސާބު ގެޔަކަށް ވަދެފައިވާ ކަމުގެ މައުލޫމާތު ލިބުމުން އެ މީހާ ހޯދައި އޭނާ ވެސް ބެލުމުގެ ދަށަށް ގެންދިޔަ ކަމަށް ފުލުހުން ބުންޏެވެ.
އޭނާ ހުރިތަން ބަލައި ފާސްކުރިއިރު، ފޭރުނު ވޮލެޓް ފެނުނު ކަމަށާއި އޭގައި ހުރި އެމެރިކާ ޑޮލަރާއި އޮސްޓްރޭލިއާ ޑޮލަރާއި ދިވެހި ފައިސާ އޭނާގެ އަތުމުން ފެނުނު ކަމަށް ފުލުހުން ބުންޏެވެ.
އެ ތަކެތި ވެރިފަރާތާ ހަވާލުކޮށްފައިވާކަން ފުލުހުން ފާހަގަކުރިއެވެ.
އެ މައްސަލައާ ގުޅިގެން ހައްޔަރުކޮށްފައި ވަނީ ސ. މަރަދޫ، ސަލްޓަން ވިލާ، މުޙައްމަދު ރިމާހާއި ހަމަ އެ ގެއަށް ނިސްބަތްވާ އިބްރާހީމް ޝުޖާއެވެ.
އެ ދެ މައްސަލަ ވެސް ފުލުހުން އަންނަނީ ތަހުގީގު ކުރަމުންނެވެ.