އަމާޒަކީ ކުރިއަށްއޮތް 2025 ވަނަ އަހަރުގެ ނިޔަލަށް މުޅި ރާއްޖޭގެ މީހުން ދިރިއުޅޭ ހުރިހާ ރަށަކަށް ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ޚިދުމަތް ފޯރުކޮށްދިނުން ކަމަށް ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު އިބްރާހިމް ޔާސިރު ރޭ ވިދާޅުވެއްޖެއެވެ.
އެސްއެސްޓީވީގެ ބާރު ހަތަރެއް ޕްރޮގްރާމްގައި ވާހަކަ ދައްކަވަމުން ޔާސިރު ވިދާޅުވީ ކުރިއަށް އޮތް އަހަރު އާރްޓީއެލް ޚިދުމަތް މުޅި ރާއްޖެއަށް ފުޅާކުރުމަކީ ރައީސް ޑރ. މުޙައްމަދު މުއިއްޒު އިރުޝާދު ދެއްވައިފައިވާ ގޮތް ކަމަށެވެ.
އޭނާ ވިދާޅުވީ އެ މަސައްކަތަށް ޚާއްސަ ހިންގާ ކޮމިޓީއެއް ވެސް އެކުލަވައިލައިފައިވާ ކަމަށެވެ.
"އަޅުގަނޑުމެންނަށް ރައީސުލް ޖުމްހޫރިއްޔާ ވެސް ޑައިރެކްޝަން ދެއްވާފައި އޮތީ އެ ގޮތަށް މި ޕްރޮޖެކްޓުގެ އެންމެ މުހިންމު އެއް ކޮމްޕޯނެންޓް އެއީ މި ޕްރޮޖެކްޓުގެ މިނިސްޓީރިއަލް ލެވެލްގެ ސްޓިއަރިން ކޮމިޓީއެއް އޮންނާނެ،" ޔާސިރު ވިދާޅުވިއެވެ.
ހުވަދު އަތޮޅަށް ފުރި އާރުޓީއެލްގެ ފެރީތައް --- ފޮޓޯ: މާހިލް އާތިފް
ޔާސިރު ވިދާޅުވީ މި ޕްރޮޖެކްޓުގެ ހިންގާ ކޮމިޓީން، އަމާޒުތައް ހާސިލުކުރުމަށް ޓަކައި ކޮންމެ ދެހަފުތާއިން އެއް ހަފުތާގައި ބައްދަލުވުންތައް ބާއްވާ ކަމަށެވެ.
އެގޮތުން ޕްރޮޖެކްޓް ފެށުނު ފަހުން މިހާތަނަށް 119 ކޮމެޓީ ބައްދަލުވުން ބާއްވާފައި ވާނެ ކަމަށްވެސް އޭނާ ވިދާޅުވިއެވެ.
އާރްޓީއެލްގެ ޚިދުމަތަކީ ނިމިދިޔަ އެމްޑީޕީ ސަރުކާރުން، މުޅި ރާއްޖެ ފެރީގެ ނިޒާމުން ގުޅައިލުމަށްޓަކައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްގެން ކުރިއަށްގެންދާ ޕްރޮޖެކްޓެކެވެ.
އާރްޓީއެލްގެ ދަށުން މުޅި ރާއްޖެ ހަ ޒޯނަކަށް ބަހާލައި ބައެއް ޒޯންތަކުގައި ހިމެނޭ ރަށްތަކަށް ކަނޑައެޅޭ ތާވަލެއްގެ ދަށުން މިހާރުވެސް އާރުޓީއެލްގެ ޚިދުމަތް އަންނަނީ ދެމުންނެވެ.