ބޮލީވުޑްގެ ގިނަ ފްރެންޗައިސްތަކުން ފުރުސަތު ލިބިފައިވާ އެކްޓަރު އަޖޭ ދޭވްގަންގެ އެންމެ ފަހު ފްރެންޗައިސް ފިލްމު "ޝައިތާން"ގެ ސީކުއަލްގެ މަސައްކަތް ފަށައިފި ކަމަށް ރިޕޯޓުތައް ބުނެފިއެވެ.
ބެލުންތެރިންގެ މަސްހުނި ފާޑުކިޔުންތަކެއް ލިބުނު "ޝައިތާން"ގެ ސީކުއަލްގެ މަސައްކަތް ފަށާފައިވާ ކަމަށް ޚަބަރު ފެތުރިފައިވާއިރު އަޖޭ އަންނަނީ ލީޑް ރޯލް ކުޅޭ ފިލްމު "ސަން އޮފް ސަރުދާރު2"ގެ މަސައްކަތް ވެސް ކުރަމުންނެވެ.
ފިލްމު "ޝައިތާން"ގެ ސީކުއަލްއާ އެކު އަޖޭ ވެފައިވަނީ އިންޑިއާގެ ސިނަމާގެ އެންމެ ގިނަ ފްރެންޗައިސް ނުވަތަ ސިލްސިލާ ފިލްމުތައް ކުޅެފައިވާ އެކްޓަރަށެވެ. މިހާތަނަށް އަޖޭ ކުޅެފައިވާ ފިލްމުތަކުގެ ތެރެއިން އަށް ފިލްމަކީ ސިލްސިލާ ފިލްމުތަކެކެވެ.
އަޖޭ ދޭވްގަން އަދި ފިލްމު "ޝައިތާން"ގެ ޕޯސްޓަރެއްގައި އަޖޭ އާއި އެކްޓަރު އާރު މާދަވަން--ފޮޓޯ/ބޮލީވުޑްހަންގާމާ
ފިލްމު "ޝައިތާން"ގެ ސްކްރިޕްޓް އެކުލަވާލުމަށް ފަހު ސްކްރިޕްޓް ލިޔުމުގެ މަސައްކަތް ފެށިފައިވާއިރު ފިލްމުގެ އުފެއްދުންތެރިންނާ އެކު އަމަލީ މަސައްކަތް ފަށާނެ ތާރީޚެއް އިއުލާނުކުރާނީ އަޖޭގެ މަޝްވަރާގެ މަތިން ކަމަށް ރިޕޯޓުތައް ބުނެއެވެ.
ބެލުންތެރިންގެ ތެރެއިން ގިނަ ބަޔަކު ފިލްމު "ޝައިތާން"ގެ ވާހަކަ އަޖޭގެ ފިލްމު "ދުރިޝްޔަމް"އާ ކޮންމެ ވެސް ވަރަކަށް އެއްގޮތް ކަމަށް ދުށް ނަމަވެސް އެއީ މުޅިން ތަފާތު ދެ ވާހަކައެއް ކަމަށް ފިލްމުގެ ޕްރޮޑިއުސަރު ވަނީ ބުނެފައެވެ. ފިލްމު "ޝައިތާން2"ގައި ބިރުވެރިކަން އެތައް ގުނައަކަށް އިތުރުވާނެ ކަމަށާއި ބެލުންތެރިން ފިތްކަނޑައިގެންދާހާ ބިރުވެރި މަންޒަރުތައް ފެންނާނެ ކަމަށް ރިޕޯޓުތައް ބުނެއެވެ.
އަޖޭ ކުޅެފައިވާ ކާމިޔާބު ފްރެންޗައިސްތަކުގެ ތެރޭ "ގޯލް މާލް"ގެ ހަތަރު ފިލްމު، "ސިންގްހަމް"ގެ ދެ ފިލްމު، "ދަމާލް"ގެ ތިން ފިލްމު، "ދޭ ދޭ ޕިޔާރުދޭ" ދެ ފިލްމު، "ދުރިޝްޔަމް"ގެ ދެ ފިލްމު "ރެއިޑް"، "ސަން އޮފް ސަރުދާރު" އަދި "ޝައިތާން" ހިމެނެއެވެ.