ލޭބާ ރިލޭޝަންސް އޮތޯރިޓީ، ހޯމް މިނިސްޓްރީގެ ދަށަށް ބަދަލުކުރަން ރައީސް ޑރ. މުހައްމަދު މުއިއްޒު ނިންމަވައިފިއެވެ.
ރައީސް އޮފީހުން މިއަދު ނެރުނު ބަޔާނެއްގައި ބުނީ މި ބަދަލު ގެނެސްފައި ވަނީ ގާނޫނުއަސާސީގެ ދަށުން ރައީސަށް ލިބިވަޑައިގަންނަވާ އިޚްތިޔާރުގެ ދަށުން އިއްޔެ ކަމަށެވެ.
އެ ބަޔާނުގައި ބުނީ ރައީސް މިގޮތަށް ހަމަޖެއްސެވީ، ގަވާއިދާ ޚިލާފަށް ދިވެހިރާއްޖޭގައި އުޅޭ ބިދޭސީންގެ މައްސަލަ ހައްލުކުރުމާ ގުޅޭގޮތުން ވަޒީރުންގެ މަޖިލީހުގައި މަޝްވަރާކުރެއްވުމަށް ފަހު ކަމަށެވެ.
މީގެ އިތުރުން، މި ބަދަލަކީ ވަޒީރުންގެ މަޖީލީހުގެ ލަފައާއެކީ ގެނައި ބަދަލެއްކަން ރައީސް އޮފީހުން ވަނީ ފާހަގަ ކޮށްފައެވެ.
ލޭބާ ރިލޭޝަންސް އޮތޯރިޓީ މީގެ ކުރިން ހިނގަމުން އައީ މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓްގެ ދަށުންނެވެ.
ހޯމް މިނިސްޓަރު އަލީ އިޙުސާން ވަނީ ލޭބާ ރިލޭޝަންސް އޮތޯރިޓީއަށް ޒިޔާރަތްކުރައްވާ، އެ އިދާރާގެ މުވައްޒަފުންނާ ބައްދަލުކޮށް، އާ މަސްއޫލިއްޔަތުތައް ތަންފީޒުކުރުމާ ބެހޭގޮތުން މަޝްވަރާކުރައްވާފައެެވެ.