މިއަދު ހެނދުނުއްސުރެ ބޭންކް އޮފް މޯލްސްޑިވްސް (ބީއެމްއެލް)ގެ ޚިދުމަތްތައް މެދުކެނޑިފައި އޮތުމަށްފަހު، އަށްގަޑިއިރު ފަހުން ޚިދުމަތްތައް ލިބެން ފަށައިފިއެވެ.
ބީއެމްއެލްއިން މިއަދު ހެނދުނު 7:51ގައި އެކްސްގައި ކޮށްފައިވާ ޕޯސްޓެއްގައި ވަނީ ޓެކްނިކަލް މައްސަލައެއްގެ ސަބަބުން އެޕާއި އިންޓަނެޓް ބޭންކިން ބުރޫ އަރައިފައިވާ ކަމަށް ބުނެފައެވެ.
ގިނަ ބައެއްގެ ޒަރޫރީ ބޭނުންތައް ފުއްދަން ހުރަސް އެޅި، ގިނަ ބަޔަކު ވަނީ އެކަމުގެ ޝަކުވާއާއި ކަންބޮޑުވުން ސޯޝަލް މީޑިއާގައި ހިއްސާކޮށްފައެވެ.
ބީއެމްއެލްގެ ޚިދުމަތްތަކަށް ބޫރޫއެރުމަކީ ދޭތެރެއަކުން ދިމާވާ މައްސަަލައެކެވެ. އޭގެ ސަބަބުން ގިނަ ބަޔަކަށް އެކި ދަތިތައް ކުރިމަތިވާއިރު އެ ކަމަށް ގިނަ ބަޔަކު އަބަދުވެސް ފާޑުކިޔައެވެ.
ކޮވިޑުގެ ބަލިމަޑުކަމަށްފަހު ގިނަ ބަޔަކު މާލީ މުއާމަލާތްތައް ކުރަމުން އަންނަނީ އޮންލައިންކޮށެވެ. ނަގުދު ފައިސާ އަތުގައި ގެންގުޅޭ މީހުން މަދެވެ. އެހެންކަމުން އޮންލައިން ބޭންކިން ހުއްޓުމާއެކު ގިނަބައެއްގެ އާންމު ދިރިއުޅުމަށް ވެސް އަސަރުކުރެއެވެ.