ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ އެކައުންޓުގައި ދައުލަތުގެ އެއް އަހަރުގެ ބަޖެޓާ އެއްވަރަށް ފައިސާހުރި ކަމަށް ޕީއެންސީގެ ޕީޖީ ލީޑަރު، އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު މިރޭ ތުހުމަތު ކުރައްވައިފިއެވެ.
ޕީއެންސީން މިރޭ ބޭއްވި ޖަގަހަ ޖަލްސާގައި ފަލާހުވަނީ ރައީސް ޔާމީނަށް ފާޑުވިދާޅުވެ، ބޮޑެތި ތުހުމަތުތަކެއް ކުރައްވައިފައެވެ.
ފަލާހުގެ ވާހަކައިގައިވަނީ ޔާމީންގެ އަރިހުގައި މި ވަގުތު ތިއްބެވި ކުރީގެ މިނިސްޓަރު މުޙައްމަދު މަލީހާއި އެ މަނިކުފާނުގެ ވަކީލު ޑރ. މުޙައްމަދު ޖަމީލަކީ މީގެ ކުރިން ޔާމީނަށް ބޮޑެތި ތުހުމަތުތަކެއް ކުރައްވައި، އެ މަނިކުފާނު ބަދުނާމު ކުރެއްވި ބޭފުޅުންކަން ފާހަގަ ކުރައްވައި ފާޑުވިދާޅުވެފައެވެ.
ޔާމީންގެ އެކައުންޓުތަކުގައި މިލިއަނުން ރުފިޔާއާއި ފައިސާހުރި ކަމަށް ޖަމީލާއި މަލީހު މީގެ ކުރިން ވިދާޅުވެފައިވާކަން ފާހަގަކުރައްވައި ފަލާހު ވިދާޅުވީ އެ ކަމަށް ބާރު ލިބުނީ ޝަރީއަތުގެ މަޖިލިސްތަކުގައި އެ މަނިކުފާނު އެ ކަމަށް އިޢުތިރާފުވެ ވަޑައިގެންފައިވާތީ ކަމަށެވެ.
ޔާމީންގެ އެކައުންޓުގައި ހުރި ފައިސާއަކީ ކެމްޕޭނު ފައިސާ ކަމަށް އެ މަނިކުފާނު ވިދާޅުވެފައިވެއެވެ.
އެހެން ނަމަވެސް ޕާޓީއެއްގެ ކެމްޕޭނަށްދޭ ފައިސާ އަމިއްލަފުޅު އެކައުންޓަށް ޖަމާކުރެއްވުމަކީ ސިޔާސީ ޕާޓީތަކުގެ ގާނޫނާ ޚިލާފު ކަމެއްކަން ފަލާހުގެ ވާހަކަފުޅުގައި ފާހަގަ ކުރެއްވިއެވެ.
އޭނާ ވިދާޅުވި ގޮތުގައި ޔާމީންގެ އެކައުންޓަށް އަޅާ ފައިސާ ނެގޭނެ ގޮތެއް ނޯވެއެވެ. ޗެކު މެދުވެރިކޮށް، ނުވަތަ ޓްރާންފާކޮށްގެން ވެސް އެ ފައިސާ ނެގެން ނޯންނަ ކަމަށް ފަލާހު ވިދާޅުވިއެވެ.
"އަނެއްކާ މިވާ ގޮތަކީ މި އެކައުންޓުތަކަކީ ހަމަ އެކަނި ޑިޕޮސިޓު ކުރެވޭ އެކައުންޓުތަކެއް. ޗެކު ފޮތެއް ނޯވޭ ނުއެއް ނެގޭ. ޓްރާންސްފާ ކުރެވޭނެ ގޮތެއް ނުހުރޭ. އެހެންމާ މަދެއް ނުވޭ މިޔަކުން ދުވަހަކު ވެސް އެއްޗެއް. ހައްތަހާ ވަނީ ގިނަ. ގިނަ ވަމުންވަމުން ގޮސް އަޅުގަނޑުމެންނަށް މިހާރު މައުލޫމާތު ލިބޭ ގޮތުގައި ރައީސް ޔާމީނުގެ ކައުންޓުގައި މިހާރު އެބަހުރި މި ދައުލަތުގެ އެއް އަހަރުގެ ބަޖެޓު ފޫބައްދާ ވަރަށް ފައިސާ،" ފަލާހު ވިދާޅުވިއެވެ.
މިއީ ވެސް މަލީހާއި ޖަމީލު ދައްކަވާ ވާހަކަތަކެއް ކަމަށް ވިދާޅުވެ، ފަލާހުވަނީ އެ ދެ ބޭފުޅުންނަށް ވެސް ވަރަށް ބޮޑަށް ފާޑުވިދާޅުވެފައެވެ.
ޕީއެންސީން މިރޭ ބޭއްވި ޖަގަހަ ޖަލްސާގެ ތެރެއިން -- ސަން ފޮޓޯ/ މޫސާ ނަދީމް
ފަލާހުގެ ވާހަކައިގައިވަނީ ކުރީގެ ވެރިން ލޯނަކަށް ލޯލާރިއެއް ވެސް ނެގުމެއް ނެތި ބާރަ ބުރިޔަށް ގެ ނަގައި، ވިޔަފާރިތައް ހިންގާނަމަ، ރައްޔިތުން ސުވާލު އުފައްދާނެކަން ފާހަގަ ކުރައްވައި، ޔާމީނަށް ބަހުގެ ހަމަލާތައް އަމާޒުކުރައްވާފައެވެ.
"އެ ފަދަ ވެރިންނެއް ރީއްޗެއް ނޫން. ފާޑުފާޑުގެ ބޮޑު ސްކްރީން އަޅުވައިގެން ޖަމީލާއި މަލީހާއި ދެ ފަޅީ ބައިތިއްބައިގެން މިހެން މިހެން ހަދާކަށެއް. މިއީ ހަޑި ކަންކަމޭ. އަޅުގަނޑުމެންނަށް ހަޑި އިނގޭތޯ"
ޔާމީން އާ ޕާޓީއެއް އުފެއްދެވުމުގެ މަސައްކަތް ފެއްޓެވީ، އެ މަނިކުފާނު އިސްކޮށް ހުންނެވި ޕީޕީއެމާއި، އެ މަނިކުފާނު 2018ގައި އުފެއްދެވި ޕީއެންސީ ދޫކުރެއްވުމަށް ފަހުގައެވެ.
ޔާމީން ޕާޓީ ދޫކުރައްވަން ނިންމެވި މައިގަނޑު ސަބަބަކީ، އެ މަނިކުފާނު ޕީޕީއެމާއި ޕީއެންސީގެ ރިޔާސީ ކެންޑިޑޭޓްގެ ގޮތުގައި އެންޑޯސްކުރެއްވި ރައީސް ޑރ. މުޙައްމަދު މުއިއްޒާ ގުޅުން ކެނޑުން ކަމަށް ޔާމީން ވިދާޅުވެއެވެ.