ހޮލީވުޑްގެ އެންމެ މަގުބޫލު ތަރިންގެ ލިސްޓުގައި މިވަގުތު ހިމެނޭ ޒެންޑެޔާ އާއި ރޮބާޓް ޕެޓިންސަން އެކީގައި ފިލްމެއްގެ މަސައްކަތް ކުރަމުން އަންނަ ކަމަށް އިއުލާނު ކޮށްފިއެވެ.
ދެމީހުން އެކީގައި ލީޑުން ފެންނަ ފިލްމަކީ މިވަގުތު އެންމެ މޮޅެތި ފިލްމުތައް ރިލީޒްކުރާ ޕްރޮޑަކްޝަން ކަމަށްވާ "އޭ24"ގެ ދަށުން ނެރުމަށް ހަމަޖެހިފައިވާ ފިލްމެކެވެ. މި ފިލްމު ޕްރޮޑިއުސް ކުރުމަށް ހަމަޖެހިފައިވަނީ ތަފާތު އެކި ފިލްމުތައް، ޚާއްސަކޮށް ބިރުވެރި ފިލްމުތައް އުފެއްދުމަށް މޮޅު އާރީ އެސްޓާ އެވެ.
ކްރިސްޓޮފާ ބޯގްލީ ޑައިރެކްޓު ކުރުމަށް ހަމަޖެހިފައިވާ މި ފިލްމަކީ ލޯބީގެ އިތުރުން ތަފާތު ތުރިލާގެ ރަހަތަކެއް ވެސް ހިމެނޭނެ ފިލްމެއް ކަމަށް މައުލޫމާތު ލިބެއެވެ. ދެމީހުން އެކީގައި ފެންނަ މި ފިލްމަށް ކިޔާނީ "ދަ ޑްރާމާ"އެވެ.
ދަ ޑްރާމާ އާ ގުޅޭގޮތުން މާ ގިނަ މައުލޫމާތުތަކެއް ހާމަކޮށްފައެއް ނުވެއެވެ. ނަމަވެސް މި ފިލްމުގައި ދެ އެކްޓަރުންގެ ކިބައިން ވެސް ތަފާތު ހުނަރުތަކެއް ފެންނާނެ ކަމަށް ޕްރޮޑަކްޝަނުން ބުނެއެވެ.
މި ފިލްމުގެ ޝޫޓިން ފަށާނެ ދުވަހެއް އަދި ހާމަކޮށްފައެއް ނުވެއެވެ. ނަމަވެސް ޚަބަރު ފެތުރިފައިވާ ގޮތުގައި އަންނަ އަހަރު ނުވަތަ 2026 ވަނަ އަހަރު މި ފިލްމު ރިލީޒް ކުރާނެއެވެ.
ޒެންޑެޔާ އާއި ޕެޓިންސަން އަކީ ތަފާތު އެކި ރޯލުތަކުން ފެނިފައިވާ އެކްޓަރުންނެވެ. އެގޮތުން ހޮލީވުޑްގެ ބޮޑެތި ތަފާތު ޕްރޮޖެކްޓުތަކުން ދެމީހުން ވެސް ފެނިފައިވާއިރު ކުދި ޕްރޮޖެކްޓުތަކުގައި ވެސް ދެމީހުން ވަނީ މަސައްކަތް ކޮށްފައެވެ.
ޒެންޑެޔާ އެންމެ ފަހުން ފެނިފައިވާ ބޮޑު ޕްރޮޖެކްޓަކީ "ޑޫން" އެވެ. އަދި ޕެޓިންސަން ފެނިފައިވަނީ "ބެޓްމޭން" އިންނެވެ.