ބަންގްލަދޭޝްގައި ހިނގަމުންދާ މުޒާހަރާތަކާ ގުޅިގެން ޕްރެޝަރު ބޮޑުވެ، އިސްތިއުފާ ދެއްވައި، ބޮޑު ވަޒީރު ޝައިޚް ހަސީނާ ގައުމު ދޫކުރައްވައި ފިއްލަވައިވަޑައިގަތުމުން، އެކުލަވާލާ ވަގުތީ ސަރުކާރު ހިންގުން ނޮބެލް އިނާމު ހޯއްދަވައިފައިވާ މުޙައްމަދު ޔޫނުސް އާ ހަވާލުކުރުމަށް އެންޓި ޑިސްކްރިމިނޭޝަން ސްޓޫޑެންޓް މޫވްމަންޓްގެ ކޯޑިނޭޓަރުން އެދިއްޖެއެވެ.
ވަގުތީ ސަރުކާރެއް އެކުލަވައިލުމަށް ތައްޔާރުވަމުން އަންނައިރު، އަސްކަރިއްޔާގެ އިސް ވެރިޔާ، ވޭކާ އުޒް ޒަމާން، މިއަދު ވަގުތެއްގައި މުޒާހަރާގެ ބައިވެރިންނާ ބައްދަލުކުރުމަށްވެސް ވަނީ ހަމަޖެހިފައެވެ.
"އަޅުގަނޑުމެން ލަފާދިން ސަރުކާރު ނޫން އެހެން ސަރުކާރެއް ބަލައިނުގަނެވޭނެ." ދަރިވަރުންގެ ހަރަކާތް އެއް އިންތިޒާމް ކުރާ އެއް ލީޑަރު، ނާހިދު އިސްލާމާއި އިތުރު ލީޑަރުން ފޭސްބުކްގައި އާންމުކުރި ވީޑިއޯއެއްގައި ބުނެފައިވެއެވެ.
"ސިފައިންގެ ތާއީދު އޮންނަ ނުވަތަ ސިފައިން އިސްވެ އޮވެގެން އެއްވެސް ސަރުކާރެއް އަޅުގަނޑުމެން ގަބޫލެއް ނުކުރާނަން."
އެ މީހުން މިހާރު ވާނީ ޔޫނުސް އާ މަޝްވަރާކޮށްފައި ކަމަށާއި ޔޫނުސް ވަނީ ސަރުކާރާ ހަވާލުވާން އެއްބަސްވެފައި ކަމަށްވެސް ލީޑަރުން ވަނީ ބުނެފައެވެ.
އުމުރުން 84 އަހަރުގެ ޔޫނުސް އާއި އޭނާގެ ގްރަމީން ބޭންކަށް 2006 ވަނަ އަހަރުގެ ނޮބެލް ސުލްހައިގެ އިނާމު ލިބުނީ ބަންގްލަދޭޝްގެ ފަގީރު ހިސާބުތަކުގެ މީހުންނަށް ކުދި ލޯނު ދީގެން އެ މީހުން ފަގީރުކަމުން ސަލާމަތް ކުރުމަށް ކޮށްފައިވާ މަސައްކަތްތަކަށެވެ. ނަމަވެސް ޔޫނުސްގެ މައްޗަށް ކޯޓުން ވަނީ ވައްކަމުގެ ތުހުމަތުކޮށްފައެވެ. އެ ތުހުމަތުތަކަށް ޔޫނުސް އިންކާރުކުރެއެވެ.
އިސްތިއުފާ ދެއްވުމަށްފަހު، ގައުމު ދޫކުރައްވައި ހަސީނާ ވަޑައިގަތީ އިންޑިއާ އަށެވެ. އިންޑިއާ ސަރުކާރުގެ ދެ އޮފިޝަލަކާ ހަވާލާދީ ރޮއިޓާސް އިން ބުނީ އުމުރުން 76 އަހަރުގެ ހަސީނާ ދިއްލީ ކައިރީގައި އޮންނަ އަސްކަރީ އެއާފީލްޑެއް ކަމަށްވާ ހިންދޫންއަށް ޖައްސާފައި ވަނީ ހޯމަ ދުވަހު ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ހާމައެއްނުކުރެއެވެ.
ބައެއް މީޑިއާތަކުން ރިޕޯޓުކޮށްފައިވާ ގޮތުގައި ހަސީނާ ވަނީ އިނގިރޭސިވިލާތުގެ ހިމާޔަތަށް އެދިވަޑައިގެންފައެވެ.
އެމެރިކާގައި ދިރިއުޅޭ ހަސީނާގެ ފިރިހެން ދަރިފުޅު، ސަޖީބް ވާޖިދާ ހަވާލާދީ ހިންދުސްތާން ޓައިމްސްއިން ރިޕޯޓުކޮށްފައިވާ ގޮތުގައި ހަސީނާ ގައުމު ދޫކުރައްވައި ވަޑައިގަތީ މަޖުބޫރުވެގެން އަމިއްލަ ސަލާމަތަށްޓަކައެވެ. އަދި ހަސީނާ ގައުމަށް ހޯދައިދިނީ އެންމެ ރަނގަޅު ވެރިކަން ކަމަށާއި އެއްވެސް ކަމެއް ގޯސްކޮށް ކުރައްވައި ނުވާ ކަމަށް ވާޖިދު ވަނީ ވިދާޅުވެފައެވެ. ހަސީނާ ދެން ވަގުތު ހޭދަކުރައްވާނީ މާމަ ދަރިންނާއެކީގައި ކަމަށްވެސް ވާޖިދާ ހަވާލާދީ ހިންދުސްތާން ޓައިމްސްއިން ބުނެއެވެ.