ބަންގްލަދޭޝްގެ ސަރުކާރާ ދެކޮޅަށް ކުރަމުންދާ މުޒަހަރާއާއި ހިންގަމުންދާ ހަމަނުޖެހުންތަކުގެ ތެރޭގައި އެ ގައުމުގެ ބޮޑު ވަޒީރު ޝައިޚު ހަސީނާ އިސްތިއުފާ ދެއްވައި ގައުމު ދޫކުރައްވައި ވަޑައިގެންފައިވާއިރު، މުޒާހަރާގެ ބައިވެރިން ބޮޑުވަޒީރު ގަނޑުވަރު، ގަނަބަބާންއަށް ވަދެ ބޮޑެތި ގެއްލުންތަކެއް ދީފިއެވެ.
ބަންގްލަދޭޝްގެ ސަރުކާރު ވަޒީފާތަކަށް މީހުން އައްޔަން ކުރުމުގައި ގެންގުޅޭ އުސޫލާ ދެކޮޅަށް އަޑުއުފުލައި ޖުލައި މަހުން ފެށިގެން މުޒާހަރާ ކުރަމުން އަންނައިރު، މިއަދަކީ މުޒާހަރާތައް އެންމެ ވަރުގަދަކުރި ދުވަހެވެ.
ބަންގްލަދޭޝްގެ ޓީވީ ޗެނަލް، ޗެނަލް 24 އިން އާންމުކޮށްފައިވާ ވީޑިއޯތަކުގައި ފެންނަ ގޮތުން މުޒާހަރާގެ ބައިވެރިން ވަނީ ބޮޑުވަޒީރުގެ ގަނޑުވަރަށް ވަދެ، ގޮނޑި މޭޒު ފަދަ ތަކެތި އުކައި، ބިއްލޫރި ދޮރުތައް ތަޅައިލައި، އެތަނުގައި ހުރި ފޮތާއި އެނޫންވެސް ތަކެތި ގެންގޮސްފައެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކާއި ވީޑިއޯތަކުން މީހުން ގަނޑުވަރުގައި ހުރި ކާއެއްޗެހި ކައި، ހިފާ ގެންގުޅޭ ތަކެތި ގެންދާ މަންޒަަރު ފެނެއެވެ.
ބަންގްލަދޭޝްގެ ނޫސްވެރިއެއް ކަމަށްވާ، ޔާސިރު އަރަފާތު ބުނީ އޭނާ ވަނީ ގަނޑުވަރު ތެރެއަށް ވަދެފައި ކަމަށާއި، އެތަނުގެ ތެރޭގައި 1500 އެއްހާ މީހުން ތިބި ކަމަށެވެ. އަދި އެމީހުން އަންނަނީ ތަކެއްޗަށް ގެއްލުން ދެމުން ކަމަށް އޭނާ ވަނީ ބުނެފައެވެ.
އޭގެ އިތުރުން މުޒާހަރާގެ ބައިވެރިން ވަނީ ބަންގްލަދޭޝްގެ މިނިވަން ކަމުގެ ބާނީ ކަމުގައިވާ ހަސީނާގެ ބައްޕަ ޝައިޚް މުޖިއްބުރް ރަޙްމާނުގެ ހަނދާނުގައި ޑާކާގައި ބަހައްޓައިފައި ހުންނަ ބުދަށް ވެސް ގެއްލުން ދީފައެވެ.
ގަނަބަބާން ހުރި ސަރަހައްދަށް މިހާރު މީހުން އެއްވެފައި ވަނީ 2022 ވަނަ އަހަރު ސްރީ ލަންކާގެ އޭރުގެ ރައީސް ގޮތަބަޔާ ރާޖަޕަކްސާގެ ސަރުކާރު ވައްޓައިލަން ރިޔާސީ ގަނޑުވަރަށް މީހުން ވަދެގަތް ގޮތަށެވެ.
އެ ދުވަހުގެ ފޮޓޯތަކާއި ވީޑިއޯތަކުން މީހުން އެ ގަނޑުވަރުގައި އޮތް ސްވިމިން ޕޫލަށް އެރި، އެނދާއި ސޮފާ ފަދަ ފަރުނީޗަރު މަތީ މައްޗަށް އަރައި، ތަކެތި ގެންދާ މަންޒަރު ވެސް ފެނިފައިވެއެވެ.
ލަންކާގެ އިގުތިސާދީ ހާލަތު ދަށްވެ، ރައްޔިތުންނަށް ކާބޯތަކެއްޗާއި ބޭސް ފަދަ އަސާސީ ތަކެތި ނުލިބުމާ ގުޅިގެން ކުރިއަށްގެންދިޔަ އެ މުޒާހަރާތަކާ ގުޅިގެން ގޮތަބަޔަ ފިއްލަވައިގެން ފުރަތަމަ ވަޑައިގަތީ ރާއްޖެއަށެވެ. އެއަށް ފަހު ސިންގަޕޫރަށް ވަޑައިގެން, ޖުލައި 14، 2022ގައި މަގާމުން އިސްތިއުފާ ދެއްވިއެވެ.
ބޭރުގެ މީޑިއާތަކާއި ސޯޝަލް މީޑިއާ ފޮޓޯތަކުން ފެންނަ ގޮތުގައި މުޒާހަރާގެ ބައިވެރިން ވަނީ ހަސީނާ އާއި ހަސީނާގެ އަވާމީ ލީގު ޕާޓީއަށް ނިސްބަތްވާ އެހެން ސިޔާސީ ބޭފުޅުންގެ ގެތަކަށްވެސް ވަދެފައެވެ.
މުޒާހަރާތަކުގައި އިއްޔެ އެކަނިވެސް 95 މީހުން މަރުވެފައިވާއިރު، މިހާތަނަށް މަރުވި މީހުންގެ އަދަދު ވަނީ 300 އާ ގާތްކޮށްފައެވެ.
ހަސީނާ އިސްތިއުފާ ދެއްވައި ގައުމުން ފިއްލަވައިވަޑައިގެންނެވި ޚަބަރާ ގުޅިގެން ވެރިރަށް ޑާކާއާއި އެހެނިހެން ސަރަހައްދުތަކުގައި ހުރި އަވާމީ ލީގުގެ ގިނަ އޮފީސްތަކަށާއި ލީޑަރުންގެ ގެތަކަށް ހަމަލާދީ ލޫޓުވާލާފައިވާ ކަމަށް ރިޕޯޓްތައް ބުނެއެވެ.
މިދިޔަ ޖަނަވަރީ މަހުގެ ތެރޭގައި ބޮޑުވަޒީރު ކަމުގެ އައު ދައުރަކަށް އިންތިޚާބުވެވަޑައިގެންނެވި ޙަސީނާ ގައުމު ދޫކުރައްވާ ވަޑައިގެންނެވުމުން އެ ގައުމުގެ އެތައް މިލިއަން މީހުންނެއް ވަނީ މަގުތައް މައްޗަށް ނުކުމެ އުފާ ފާޅުކޮށްފައެވެ.
ހަސީނާ ވަޑައިގަތުމާ ގުޅިގެން، އަސްކަރިއްޔާގެ ވެރިޔާ ވަނީ ވަގުތީ ސަރުކާރަކުން ވެރިކަމާ ހަވާލުވާނެ ކަމަށް ވިދާޅުވެ، އަމާންކަން ގާއިމުކުރުމަށް އެދިވަޑައިގެންފައެވެ.