މަރުކަޒީ ބޭންކު (އެމްއެމްއޭ) ޒަމާނީ ސެންޓްރަލް ބޭންކަކަށް ހެދުމަށްޓަކާ އެ އިދާރާގެ ހިންގުމަށް ބޮޑެތި ބަދަލުތަކެއް ގެނައުމަށް އެމްއެމްއޭގެ ބޯޑުން ފާސްކޮށްފިއެވެ.
"ސަން"އަށް މައުލޫމާތުދެއްވަމުން އެމްއެމްއޭގެ އޮފިޝަލަކު ވިދާޅުވީ ޒަމާނީ ސެންޓްރަލް ބޭންކަކަށް އަދި ހެޔޮ ނަތީޖާ ނެރޭ ބޭންކަކަށް އެމްއެމްއޭ ހެދުމަށް އެ އިދާރާގެ އޮނިގަނޑަށް ބަދަލުތައް ގެނެސްފައި ވާކަމަށެވެ.
މި ބަދަލުތަކުގެ ސަބަބުން އެމްއެމްއޭއިން ކުރަމުންދާ މަސައްކަތްތައް މިހާރަށްވުރެ ހަރުދަނާވެ، ހެޔޮ ނަތިޖާތަކެއް ނެރުމަށް ފަސޭހަވާނެ ކަމަށް އޭނާ ވިދާޅުވިއެވެ.
އެމްއެމްއޭގެ އޮނިގަނޑަށް މިގެނެވުނު ބަދަލުތަކާއެކު އެސިސްޓެންޓް ގަވަރުނަރުގެ މަގާމު ވަނީ މެނޭޖިން ޑިރެކްޓަރުގެ މަގާމަށް ބަދަލުކޮށްފައެވެ. އަދި މިހާރު ތިއްބެވި އެސިސްޓެންޓް ގަވަރުނަރުން ވަނީ އެޑްވައިޒަރުންގެ މަގާމަށް ޕްރޮމޯޓްކޮށްފައިކަމަށް އޭނާ ވަނީ މައުލޫމާތު ދެއްވާފައެވެ.
މިއާއެކު އަލަށް ހުޅުވާލާ މެނޭޖިން ޑިރެކްޓަރުގެ މަގާމު ވަނީ ފަސް އަހަރުގެ ދެ ދައުރަކަށް ހޮވޭ މަގާމަކަށް ބަދަލުކޮށްފައި ވާކަމަށް އޭނާ މައުލޫމާތު ދިނެވެ.
މި މާގާމުތަކަށް ކުރިމަތިލުމުގެ ފުރުސަތު އެމްއެމްއޭގައި މަސައްކަތްކުރާ ފަރާތްތަކުގެ އިތުރުން އާންމުކޮށް ވެސް ހުޅުވާލާނެކަމަށް އޭނާ ވިދާޅުވިއެވެ. އަދި މީގެ ސަބަބުން އެމްއެމްއޭގައި މިހާރު ތިބި ގާބިލު ފަރާތްތަކަށް އާ ފުރުސަތުތައް ހުޅުވޭނެ ކަމަށާއި ފަންނީ ގާބިލު މީހުންނަށް އެމްއެމްއޭއަށް ވަނުމަށް ވެސް ފުރުސަތު ހުޅުވޭނެ ކަމަށް އޭނާ ވިދާޅުވިއެވެ.
މި ބަދަލުތައް ގެންނަން ނިންމާފައި ވަނީ އެމްއެމްއޭގެ ބޯޑުގެ މަޝްވަރާގެ މަތިން، ބޭންކުގެ ގަވަރުނަރު ކަމަށް އޭނާ ވަނީ މައުލޫމާތު ދީފައެވެ.