އޮސްޓްރޭލިއާގައި ވަގުތީ ވިޒިޓާ ވިސާގައި ތިބި ފަލަސްތީނު ރައްޔިތުންނަށް ދިގު މުއްދަތަކަށް އެ ގައުމުގައި ތިބެވޭނެ ގޮތް ހެދުމަށް މަސައްކަތްކުރަމުން އަންނަ ކަމަށް އޮސްޓްރޭލިއާއިން ބުނެފިއެވެ.
އޮސްޓްރޭލިއާގެ އާ ދާޚިލީ ވަޒީރު، ޓޯނީ ބާކް ވިދާޅުވީ ހަނގުރާމަ ހިނގަމުންދާ މި ދަނޑިވަޅުގައި ފަލަސްތީނު ރައްޔިތުންނަށް ވިޒިޓް ވިސާ ދިނުމަކީ މުހިންމު ކަމެއް ކަމަށާއި، ނަމަވެސް އެ ވިސާތައް މިހާރު މުއްދަތު ހަމަވާން ކައިރިވެފައިވާ ކަމަށެވެ. އަދި އެކަމަށް ހައްލެއް ގެނައުމުގެ މަސައްކަތް ސަރުކާރުން ކުރަމުން އަންނަ ކަމަށާއި، ނަމަވެސް އަދި ގޮތެއް ނުނިންމާ ކަމަށް އޭނާ ވިދާޅުވިއެވެ.
"ޔަގީނުންވެސް ދުނިޔޭގެ އެއްވެސް ގައުމަކުން މިވަގުތު އެ މީހުން އަނބުރާ ޣައްޒާއަށް ނުފޮނުވާނެ، ދުނިޔޭގެ އެއްވެސް ގައުމަކުން އެކަން ނުކުރާނެ. އެހެންވީމަ މިހާރު މީހުން ތިބި ވިސާގެ މުއްދަތު ހަމަވާތީ، އެކަމަށް ހައްލެއް ހޯދަން ޖެހޭ." ބާކް ވިދާޅުވިއެވެ.
ނަމަވެސް އެ ހައްލަކީ "ސޭފް ހެވަން" ވިސާ ނުވަތަ "ޕާމެނެންޓް ޕްރޮޓެކްޝަން ވިސާ" ދިނުން ކަމެއް ބާކް ވިދާޅެއްނުވެއެވެ.
ވަގުތީ ވިސާގެ މުއްދަތަކީ ތިން މަހާއި 12 މަހާއި ދެމެދުގެ މުއްދަތެކެވެ. އެ ވިސާ ލިބޭ ފަރާތްތަކަށް މަސައްކަތް ކުރުމާއި ސްކޫލަށް ދިއުން އަދި ސިއްހީ ފަރުވާ ހޯދުމުގެ ފުރުސަތެއްވެސް ނުލިބޭނެއެވެ.
ސޭފް ހެވަން ވިސާއަކީ އޮސްޓްރޭލިއާގައި ފަސް އަހަރު ދުވަހު ތިބުމުގެ ހުއްދަ ލިބޭ ވިސާއެކެވެ. އަދި ޕާމަނެންޓް ޕްރޮޓެކްޝަން ވިސާއަކީ މުއްދަތެއް ނެތް ގޮތަށް މަޑުކުރުމުގެ ހުއްދަ ލިބޭ ވިސާއެކެވެ.
އޮކްޓޫބަރު ހަތް ވަނަ ދުވަހު އިސްރާއީލުން ޣައްޒާގައި ހަނގުރާމަ ފެށީއްސުރެ، ޖޫން މަހުގެ 30 ވަނަ ދުވަހުގެ ނިޔަލަށް އޮސްޓްރޭލިއާއިން ވަނީ ފަލަސްތީނުގެ ރައްޔިތުންނަށް 2،823 ވަގުތީ ވިސާ ދޫކޮށްފައެވެ. އޭގެ ތެރޭގައި 2،499 ވިޒިޓާ ވިސާ ހިމެނެއެވެ. އެގޮތުން މާޗް މަހުގެ 31 ވަނަ ދުވަހުގެ ނިޔަލަށް އިސްރާއީލުގެ ރައްޔިތެއްކަން އިއުލާންކުރި މީހުންނަށް 3،309 ވިޒިޓާ ވިސާ ދީފައިވެއެވެ.
މެއި މަހުގެ 31 ގެ ނިޔަލަށް ފަލަސްތީނުގެ 1،120 އެއްހާ މީހުން ވަނީ އޮސްޓްރޭލިއާއަށް ދަތުރުކޮށްފައެވެ.