މީގެކުރިން ވެސް ވެބް ސީރީސްތަކުން ބެލުންތެރިންގެ ބޮޑު މަގުބޫލުކަމެއް ހޯދާފައިވާ އެކްޓަރު ވިޖޭ ވަރުމާ މުހިއްމު ރޯލް ކުޅޭ ވެބް ސީރީސް "އައިސީ 814: ދަ ޚަންދަހާރު ހައިޖެކް"ގެ ޓީޒާ ދައްކާލައިފިއެވެ.
ޑައިރެކްޓަރު އަނޫބަވް ސިންގްގެ ކެރިއަރުގެ ފުރަތަމަ ވެބް ސީރީސްގެ ޓީޒާއާ އެކު މި މަހުގެ 29އިން ފެށިގެން ނެޓްފްލިކްސްގައި މި ސީރީސް ސްޓްރީމް ކުރަން ފަށާނެކަން ވަނީ އިއުލާނުކޮށްފައެވެ.
ވިޖޭގެ އިތުރުން މި ސީރީސްއިން ފެންނާނެ މުހިއްމު ތަރިންގެތެރޭ އެކްޓަރު ނަސީރުއްދީން ޝާހް، ޕަންކަޖު ކަޕޫރު، މަނޯޖު ޕާހްވާ، ބަތަލާ ދިއާ މިރުޒާ އަދި ކުމުދު މިޝްރާ ހިމެނެއެވެ. ވިޖޭ ޕައިލެޓެއްގެ ރޯލް ކުޅޭ މި ވެބް ސީރީސްގައި ދައްކުވައިދޭނީ އިންޑިއާގެ އޭވިއޭޝަން ދާއިރާގެ ތާރީޚުގައި މިހާތަނަށް ހިނގި އެންމެ ހަނދާންނައްތާލަން ދަތި ހައިޖެކްގެ ދިގު ދަތުރު ކަމަށް ފިލްމީ ޚަބަރުތައް ބުނެއެވެ.
ވެބް ސީރީސް "އައިސީ 814: ދަ ޚަންދަހާރު ހައިޖެކް"ގެ ޕޯސްޓަރެއް--ފޮޓޯ/ފިލްމުފެއަ
ޙަޤީޤީ ޙާދިސާއެއްގެ މައްޗަށް ބިނާކޮށް އުފައްދާފައި މި ސީރީސްއިން އިންޑިއާއިން ހައިޖެކާސްއާ ދެމެދު ވެވުނު އެއްބަސްވުންތަކާ އެކު ފަސިންޖަރުން ސަލާމަތް ކުރުމަށްކުރެވުނު މަސައްކަތްތައް ދައްކުވައިދޭނެއެވެ. މި ހާދިސާ ހިނގާފައި ވަނީ 1999ވަނަ އަހަރުގެ ޑިސެމްބަރު މަހުގެ 24ވަނަ ދުވަހުއެވެ.
އިންޑިއާގެ ނިއު ދިއްލީ-ބައުންޑު ފްލައިޓު އައިސީ-814 ހައިޖެކްކޮށްފައި ވަނީ ނޭޕާލްގެ ވެރިކަންކުރާ ސިޓީ ކަތަމަންޑޫއިން ފުރަން ތައްޔާރުވެފައި ވަނިކޮށެވެ. މުޅިއެކު 180 ފަސިންޖަރުންނާ އެކު ދަތުރު ކުރުމަށ ތައްޔާރުވި އެ މަތިންދާ ބޯޓު ހައިޖެކް ކުރުމަށްފަހު ޓެރަރިސްޓުންގެ ފަސް މީހަކު އެމީހުންގެ ބެލުމުގެ ދަށަށް މަތިންދާބޯޓުގެ ކޮންޓްރޯލް ގެންގޮސް ހަތް ދުވަސް ހޭދަކުރިއެވެ.
ހަތް ދުވަހުގެ މުއްދަތަށްފަހު ފަސިންޖަރުން ސަލާމަތްކުރެވުނީ 1999ވަނަ އަހަރުގެ ޑިސެމްބަރު މަހުގެ 31ވަނަ ދުވަހު ތާލިބާނުންގެ އަތްދަށުގައި އޮތް ކަންދަހާރުންނެވެ.