މާލޭގައި މާރާމާރީ ހިންގި ހަ ބިދޭސީ މީހަކު ޑީޕޯޓު ކުރަން ނިންމައިފިއެވެ.
އިމިގްރޭޝަނުން އެކްސްގައި ކުރި ޕޯސްޓެއްގައި ވަނީ މާލޭގައި ހިނގި މާރާމާރީއެއްގެ މައްސަލައަކާ ގުޅިގެން، ފުލުހުން ހަ ބިދޭސީއަކު އެ އިދާރާއާ ހަވާލުކޮށްފައިވާ ކަމަށެވެ. އަދި އިމިގްރޭޝަން ގާނޫނުގެ ދަށުން އެ ހުރިހާ ބިދޭސީންގެ ވިސާ ބާތިލުކޮށް، ޑީޕޯޓުކުރުމަށް ނިންމައިފައިވާ ކަމަށް އެ ޕޯސްޓުގައިވެއެވެ.
އެ ހަ މީހުންގެ ފޮޓޯއާއި އުމުރު ފިޔަވައި އިތުރު މައުލޫމާތެއް އިމިގްރޭޝަނުން ހާމައެއް ނުކުރެއެވެ. އޭގެ ތެރޭގައި ހިމެނެނީ 26، 27، 38، 40 އަދި 29 އަހަރުގެ ދެ މީހުންނެވެ.
ބުދަ ދުވަހުގެ ރޭ މާލޭގެ މަގުމަތީގައި ލަޓިބުރިތަކެއް ހިފައިގެން ބިދޭސީންތަކެއް މާރާމާރީ ހިންގާ ވީޑިއޯއެއް ސޯޝަލް މީޑިއާގައި އާންމުވެފައިވެއެވެ.
އެ މައްސަލައާ ގުޅޭ ގޮތުން މީގެ ކުރިން ފުލުހުން ބުނީ މާލޭގެ އަސްރަފީ މަގުގައި ބުދަ ދުވަހުގެ ރޭ 12:33 ހާއިރު ބިދޭސީންތަކެއް މާރާމާރީ ހިންގި މައްސަލައެއް ހުށަހަޅާފައިވާ ކަމަށެވެ. އެ މާރާމާރީ ހިންގާފައިވަނީ ބަންގްލަދޭޝް އާއި ސްރީލަންކާއަށް ނިސްބަތްވާ ބިދޭސީންތަކެއް ކަމަށް ފުލުހުން ބުނެފައިވެއެވެ.
އެ މާރާމާރީގައި ދެ މީހަކަށް އަނިޔާ ވެގެން އައިޖީއެމްއެޗްގައި ފަރުވާ ދިނުމަށްފަހު މިހާރު ދޫކޮށްލާފައި ވާކަމަށް ވެސް ފުލުހުން ބުނެފައިވެއެވެ. އަދި އެ މައްސަލައިގައި ފަސް މީހަކު ފުލުހުންގެ ބެލުމުގެ ދަށަށް ގެންދިޔަ ނަމަވެސް ފަހުން އެ ފަސް މީހުން ވެސް ދޫކޮށްލާފައި ވާކަމަށް ފުލުހުން ބުނެފައިވެއެވެ.
އެ މައްސަލަ ތަހުގީގު ކުރާ ކަމަށް ފުލުހުން ބުނިއިރު، މާރާމާރީގެ ތުހުމަތުގައި ހައްޔަރުކުރި ބަޔަކު ދޫކޮށްލުމުން ސޯޝަލް މީޑިއާގައި މީހުން ނުރުހުން ފާޅުކޮށްފައިވެއެވެ.