ދިރާގުން އެންމެ ފަހުގެ ގްލޯބަލް ސުޕަ ހައިވޭ ކަމަށްވާ ބައިނަލްއަގުވާމީ ސީ-މީ-ވީ 6 ސަބްމެރިން ކޭބަލް ދިވެހިރާއްޖޭގައި އިފުތިތާހްކޮށްފިއެވެ.
މިގޮތުން މި ސީ-މީ-ވީ 6 ސަބްމެރިން ކޭބަލް ރާއްޖޭގައި ރަސްމީކޮށް އިފުތިތާހުކޮށްފައިވަނީ ހުޅުމާލޭ ދެވަނަ ފިޔަވަހީގައި ބޭއްވި ޚާއްސަ ރަސްމިއްޔާތެއްގައެެވެ.
އެ ރަސްމިއްޔާތު ޝަރަފުވެރިކޮށްދެއްވާފައި ވަނީ ލޯކަލް ގަވާމެންޓް މިނިސްޓަރު އާދަމް ޝަރީފް ޢުމަރެވެ.
އާދަމް ޝަރީފް ވިދާޅުވީ ދިރާގަކީ އަބަދުވެސް ރާއްޖޭގެ ޑިޖިޓަލް މާހައުލު ކުރިއަރުވައި އިންގިލާބި ބަދަލުތައް ގެނައުމުގެ އެންމެ ކުރީ ސަފުގައި ހަރަކާތްތެރިވަމުން އަންނަ ކުންފުންޏެއް ކަމަށެވެ.
"މިއަދު އިފުތިތާހު ކުރެވިގެން މިދިޔަ ސީ-މީ-ވީ 6 ސަބްމެރިން ކޭބަލް އާ އެކު ދުނިޔޭގެ އެކި މައި އިންޓަނެޓް އެކްސްޖޭންޖް ޕޮއިންޓްތަކަށް ދިވެހިރާއްޖެއަށް އެކްސެސް ލިބޭނެ. މީގެ ސަބަބުން އެއްވެސް އެހެނިހެން ގައުމަކަށް ބަރޯސާ ނުވެ، ދުނިޔޭގެ ޑިޖިޓަލް ނެޓްވޯކާ ރާއްޖެއާ ސީދާ ގުޅުވައިލާނެ،" މިނިސްޓަރު ވިދާޅުވިއެވެ.
ދުނިޔޭގެ އިންޓަނެޓް ސުޕަ ހައިވޭއާ ރާއްޖެ ގުޅުވާލައި، ރާއްޖޭގެ މުވާސަލާތީ ވިއުގަ ހަރުދަނާކޮށް ރާއްޖޭގެ އިގުތިސާދީ އަދި އިޖްތިމާޢީ ތަރައްގީ ކުރިއަށްއެރުވުމުގައި ދިރާގުން ކުރަމުންދާ ގައުމީ މަސައްކަތަށް މިނިސްޓަރު ވަނީ ޝުކުރު ދަންނަވާފައެެވެ.
ދިރާގުން ދުނިޔޭގެ ފެންވަރުގެ ސީ-މީ-ވީ ހަ ސަބްމެރިން ކޭބަލް ސިސްޓަމް ރާއްޖޭގައި އިފްތިތާހުކޮށްފި-- ފޮޓޯ/ދިރާގު
އެ ރަސްމިއްޔާތުގައި ދިރާގުގެ ސީއީއޯ އަދި މެނޭޖިންގް ޑިރެކްޓަރު، އިސްމާއީލް ރަޝީދު ވިދާޅުވީ ދިވެހި ރާއްޖޭގެ ގުޅުމުގެ ހައިސިއްޔަތުން އެ ކުންފުނީގެ އަމާޒަކީ ދުނިޔޭގެ އެކި ކަންކޮޅުތަކުގައި ހިންގަމުންދާ ޑިޖިޓަލް ޓްރާންސްފޮމޭޝަނާ އެއްވަރަށް ރާއްޖޭގައި ދިރިއުޅޭ ރައްޔިތުންނަށް ވެސް އެންމެ ފަހުގެ ޓެކްނޮލޮޖީތައް ފޯރުކޮށްދިނުން ކަމަށެވެ.
"ދިރާގުގެ ޑިޖިޓަލް ނެޓްވޯކް ސީ-މީ-ވީ 6 ސަބްމެރިން ކޭބަލް ސިސްޓަމާ ގުޅާލުމަކީ ދުނިޔޭގެ ފެންވަރުގެ ޑިޖިޓަލް ހަބެއްގެ ގޮތުގައި ރާއްޖެ ގާއިމްކޮށް، އަޅުގަނޑުމެންގެ މުވާސަލާތީ ވިއުގަ އިތުރަށް ވަރުގަދަ ކުރުމަށް އެޅޭ މުހިންމު ފިޔަވަޅެއް،" އޭނާ ވިދާޅުވިއެވެ.
އޭނާ ވިދާޅުވީ މިއީ ރާއްޖޭގެ ކޭބަލް ބައިނަލްއަގުވާމީ ސިސްޓަމަކާ ސީދާ ގުޅާލެވޭ ފުރަތަމަ ފަހަރު ކަމަށާއި މިކަމުގެ ސަބަބުން ރާއްޖޭގެ ޑިޖިޓަލް ކަނެކްޓިވިޓީގެ ސްޕީޑް އިތުރަށް ހަލުވިވެ، ލޭޓެންސީ ކުޑަވެ، މުސްތަގުބަލުގައި ދިރާގުގެ އިންޓަނެޓް ޚިދުމަތުގެ އަގުތަކަށް ހެޔޮ ބަދަލުތަކެއް އަންނާނެ ކަމަށެެވެ.
ދިރާގުން ބުނީ ސީ-މީ-ވީ 6 ސަބްމެރިން ކޭބަލް ސިސްޓަމަކީ ދެކުނު އިރުމަތީ އޭޝިއާ، މެދުއިރުމަތި އަދި ހުޅަނގު ޔޫރަޕް ގުޅުވާލަދޭ ގްލޯބަލް ސުޕާ ހައިވޭއެއް ކަމަށެވެ.
އެންމެފަހުގެ ކަނޑުއަޑީގެ ކޭބަލް ޓެކްނޮލޮޖީން ފަރުމާކޮށްފައިވާ މި ސިސްޓަމް ސިންގަޕޫރުން ފެށިގެން ފަރަންސޭސިވިލާތާ ދެމެދު 11 ގައުމެއްގައި ޖައްސާނެ ކަމަށް ދިރާގުން ބުނެއެވެ.
ދިރާގުން ބުނީ ދިގުމިނުގައި 19،200 ކިލޯމީޓަރު ހުންނަ މި ސަބްމެރިން ކޭބަލް ސިސްޓަމްގެ ޓްރާންސްމިޝަން ސްޕީޑް ފަށާނީ ވެސް 100 ޓީބީއެސްއިން ކަމަށެވެ.
މި ގްލޯބަލް ސިސްޓަމްގެ ފުރިހަމަ ބައިވެރިއަކަށް ވުމަށްޓަކައި ދިރާގުން ވަނީ 2021 ވަނަ އަހަރު ދުނިޔޭގެ ބައިނަލްއަގުވާމީ 16 ޓެލްކޯ އަދި ޓެކް ކުންފުންޏޭއް ޝާމިލްވާ ކޮންސޯޓިއަމެއްގައި ބައިވެރިވެފައެވެ.
ދިރާގުން މި ކުރި ބޮޑު އިންވެސްޓްމަންޓުގެ ސަބަބުން ދުނިޔޭގެ މުހިންމު އިންޓަނެޓް އެކްސްޗޭންޖް ޕޮއިންޓްތަކާއި ޑޭޓާ ސެންޓަރުތަކާ ދިވެހިރާއްޖެ ސީދާ ގުޅުވާލެވި، ރާއްޖޭގެ ބައިނަލްއަގުވާމީ ކަނެކްޓިވިޓީ އިތުރަށް ހަރުދަނާވާނެ ކަމަށެވެ.