ބޭންކް އޮފް މޯލްޑިވްސް (ބީއެމްއެލް)އަށް މިއަދު އޮޅުމަކުން ބައެއް އެކައުންޓުތަކަށް ފައިސާ ފޮނުވުނު ކަމަށާއި އެ ފައިސާ އަނބުރާ ހޯދައިފައިވާ ކަމަށް އެ ބޭންކުން ބުނެފިއެވެ.
މިއަދު މެންދުރުން ފެށިގެން ހަވީރު 17:30 ވީއިރުވެސް ބީއެމްއެލް އެޕަށް ވަދެވިފައެއް ނުވެއެވެ. ނަމަވެސް މީގެ އިރުކޮޅެއް ކުރިން އެ މައްސަލަ ހައްލުކޮށްފައިވާ ކަމަށް ބޭންކުން ބުންޏެވެ.
އެ މައްސަލައާ ގުޅިގެން އެކްސްގައި ކުރި ޕޯސްޓެއްގައި ބީއެމްއެލްއިން ބުނީ މިއަދު ޕޭމަންޓް ޕްރޮސެސް ކުރުމުގައި 'ހިއުމަން އެރާ'އެއްގެ ސަބަބުން އޮޅިގެން އެކައުންޓުތަކަކަށް ފައިސާ ޖަމާކުރެވުނު ކަމަށެވެ. ނަމަވެސް އެ އެކައުންޓްތައް ދެނެގަނެ، އެ މައްސަލަ މިހާރު ހައްލުކޮށްފައިވާނެ ކަމަށް ބީއެމްއެލްއިން ބުންޏެވެ.
އެ ހާދިސާގެ ސަބަބުން މާލީ ގޮތުން އެއްވެސް ގެއްލުމެއް ލިބިފައި ނުވާކަމަށާއި މައްސަލަ ދިމާވީ ޕޭރޯލް ޕްރޮސެސިންގެ ބަލްކް ޕޭމެންޓްސްއަށް މިފަހުން ގެނައި ބަދަލަކާ ގުޅިގެން ކަމަށެވެ.
"އަޅުގަނޑުމެންގެ ސިސްޓަމްތަކަކީ ރައްކާތެރި ސިސްޓަމްތަކެއްކަން ކަސްޓަމަރުންނަށް ޔަގީންކޮށް އަރުވަން،" ބީއެމްއެލްއިން ބުންޏެވެ.
އެ ބޭންކަށް އޮޅުމަކުން ފޮނުވުނު ފައިސާގެ އަދަދެއް ބީއެމްއެލްއިން ހާމައެއް ނުކުރެއެވެ. ނަމަވެސް، މިއަދު އެކައުންޓަކަށް ބިލިއަނުން ޑޮލަރު ޖަމާކޮށްފައިވާ ބުނެ ސޯޝަލް މީޑިއާގައި ސްކްރީންޝޮޓްތަކެއް ދަނީ ދައުރުވަމުންނެވެ.
އިންޓަނެޓް ބޭންކިންއަށް ދޭތެރެދޭތެރެއިން މައްސަލަތައް ދިމާވެ، ނުވަދެވުމުގެ މައްސަލަތައް ފެންމަތިވެއެވެ.