ބޭންކް އޮފް މޯލްޑިވްސް (ބީއެމްއެލް)އިން އއ. އަތޮޅު ފެރިދުއާއި ބޮޑުފޮޅުދޫގައި ދެ އޭޓީއެމް ސެންޓަރު މިއަދު ހުޅުވައިފިއެވެ.
ބީއެމްއެލްއިން ބުނި ގޮތުގައި، އެ ރަށްތަކުގައި ގާއިމްކުރި އޭޓީއެމް ސެންޓަރުތަކާ އެއްކޮށް ރައްޔިތުންނަށް ފަސޭހަކަމާއެކު ބޭންކިން ޚިދުމަތްތައް ލިބޭނެ މަގު އިތުރަށް ތަނަވަސްވާނެއެވެ.
މި އޭޓީއެމް ސެންޓަރުތަކުން 24 ގަޑިއިރު އަސާސީ ބޭންކިން ޚިދުމަތްތައް ފޯރުކޮށްދޭއިރު، ފައިސާ ނެގުމާއި ފައިސާ ޖަމާކުރުމުގެ އިތުރުން ފައިސާ ޓްރާންސްފާ ކުރެވޭނެއެވެ.
އަލަށް މިއަދު ހުޅުވި ސެންޓަރުތައް ހިމަނައިގެން ބީއެމްއެލްއިން ވަނީ އއ. އަތޮޅުގައި ޖުމްލަ ހަ އޭޓީއެމް ސެންޓަރު ގާއިމްކޮށްފައެވެ.
މިކަމާ ގުޅުވައި ބީއެމްއެލްގެ ސީއީއޯ މުޙައްމަދު ޝަރީފު ވިދާޅުވީ، އއ. އަތޮޅުގައި އޭޓީއެމް ވިއުގަ ފުޅާކޮށް، ފެރިދުއާއި ބޮޑުފޮޅުދޫގެ ރައްޔިތުންނަށް އަސާސީ ބޭންކިން ޚިދުމަތްތައް އިތުރަށް ފަސޭހައިން ލިބޭނެ މަގު ތަނަވަސް ކުރެވުމަކީ ލިބޭ ވަރަށް ބޮޑު އުފަލެއް ކަމަށެވެ.
"އަޅުގަނޑުމެން ޑިޖިޓަލް ބޭންކިން ފުޅާކުރުމަށް ކުރަމުންދާ އިންވެސްޓްމެންޓްތަކާއެކު، މި އިންވެސްޓްމަންޓަކީ އަޅުގަނޑުމެން ޚިދުމަތްދޭ މުޖުތަމައުތަކަށް އެހީތެރިވުމަށާއި، ދިވެހިރާއްޖޭގެ އިގުތިސާދު ހަރުދަނާކުރުމަށް ބޭންކުން ކުރަމުންދާ މަސައްކަތުގެ ހެއްކެއް،" ޝަރީފް ވިދާޅުވިއެވެ.
ބީއެމްއެލްއިން އަންނަނީ 20 އަތޮޅުގައި 39 ބްރާންޗާއި 91 ސެލްފް ސާވިސް ބެންކިން ސެންޓަރުގެ އިތުރުން 147 އޭޓީއެމް މެދުވެރިކޮށް ޚިދުމަތް ދެމުންނެވެ.
ފާހަގަކޮށްލެވޭ ގޮތުގައި، މިމަހު ނުވައެއްގައި ބީއެމްއެލްއިން ވަނީ ކ. ގާފަރުގައި ވެސް އޭޓިއެމް ސެންޓަރެއް ހުޅުވައި، ޚިދުމަތް ދޭން ފަށާފައެވެ.