ހިކަނދިފަތަކީ އޭޝިއާގެ ޤައުމުތަކުގައި އާއްމުކޮށް ގިނަ ބަޔަކު ބޭނުންކުރާ ބާވަތެކެވެ. ހާއްސަކޮށް އިންޑިއާ ސްރީލަންކާ ފަދަ ޤައުމުތަކުގެ ކެއުންތަކުގައި ހިކަނދިފަތަކީ ކޮންމެހެންވެސް ހިމެނުން ލާޒިމު ފަތެކެވެ.
ސިޓްރަސް އާއިލާއަށް ނިސްބަތްވާ ހިކަނދިފަތަކީ، ލެމަންގްރާސް ފަދަ ވަރަށް ވަރުގަދަ ވަހަކާއި ރަހައެއް އޭގައި އެކުލެވިފައިވާ ފަތްޕިލާވެލީގެ ބާވަތެކެވެ. ހާއްސަކޮށް ހަވާދުގެ ބާވަތެއް ބޭނުންކޮށްގެން ތައްޔާރުކުރާ ކެއުންތަކަށް ރަހައިގެ ގޮތުން އިތުރު ފުރިހަމަކަމެއް ގެނެސްދިނުމުގައި އެންމެ މުހިއްމު ރޯލެއް އަދާކުރާ އެއް ބާވަތަކީ ހިކަނދިފަތެވެ.
ދިވެހިރާއްޖޭގެ ގިނަ ރަށްތަކުގައި ވެސް ހިކަނދިފަތް ގަހަކީ އާއްމުކޮށް ލިބެން ހުންނަ އޭގެ ގަސް ވެސް ވަރަށް ގިނަ ގޭގޭގައި ހައްދާ ބާވަތެކެވެ. އަނގަޔަށް މީރު ކެއުންތަކަށް ގެނެސްދޭ އިތުރު ފުރިހަމަކަމާ އެކު ހިކަނދިފަތަކީ އޭގައި ވަރަށް ގިނަ ސިއްހީ ފައިދާތަކެއް އެކުލެވޭ ބާވަތެކެވެ. އެގޮތުން މިއީ ބައެއް އަޔުރުވެޑިކް ބޭސްތައް ތައްޔާރު ކުރުމަށް ވެސް ބޭނުންކުރާ ފަތެކެވެ.
ބައެއް މީހުން ހިކަނދިފަތް މުގުރައިގެން ވެސް ބޭނުންކުރާ--ފޮޓޯ/ފްލެވަސްއޮފްމުމްބައި
ހިކަނދިފަތުން ހަށިގަނޑަށް ލިބޭ ސިއްހީ ފައިދާތަކުގެ ލިސްޓު ދިގު ނަމަވެސް ކުރުގޮތަކަށް އޭގެ މައުލޫމާތު ހިމަނާލާނަމެވެ.
ހަށިގަނޑުގެ ދިފާޢީ ނިޒާމު ވަރުގަދަކޮށް ދިނުމުގެ އިތުރުން ބަނޑާއި ގޮހޮރުގެ ރައްކާތެރިކަން އަދި ހަކުރު ބަލި ކޮންޓްރޯލް ކޮށްދިނުން މި ފަތުން ލިބޭ ފައިދާތަކުގެ ތެރޭ ހިމެނެއެވެ. ދާދިފަހުން ކުރެވުނު ދިރާސާއަކުން ދައްކާ ގޮތުގައި ހިކަނދިފަތް ބޭނުންކުރުމުގެ ސަބަބުން އުރަމަތީގެ ކެންސަރު ބަލިޖެހިފައިވާ މީހުންގެ ހަށިގަނޑުގައި ހުންނަ ކެންސަރުގެ ސެލްތައް މަރާލަން އެހީތެރިވެދެއެވެ.
މިކަމާގުޅޭ އިތުރު ދިރާސާތައް ކުރެވެމުންދާއިރު މިއީ ކުރިމަގައި ކެންސަރު ބަލީގެ ޝިކާރައަށްވާ މީހުންނަށް ލިބޭނެ ވަރަށް ބޮޑު އެހީތެރިކަމެކެވެ.
ހިކަނދިފަތް ގަސްތަކެއް ހެއްދުމަށް ބަހައްޓާފައި. މިއީ ވަރަށް ފަސޭހައި ގޭގައި ހައްދާލެވޭ ބާވަތެއް--ފޮޓޯ/ޕިންޗްއޮފްސީޑް
މި ފަތުން ހަށިގަނޑަށް، ފޮސްފަރަސް، ކެލްސިއަމް، ދަގަނޑު، ވިޓަމިން އޭ، ބީ، އަދި އީ ލިބޭއިރު ހަށިގަނޑުގައި ހުންނަ ޖަރާސީމު ނައްތާލުމަށް ހިކަނދިފަތް އެހީތެރިވެއެވެ. ކެއްކުމުގެ އިތުރުން ހިކަނދިފަތް ބޭނުންކޮށްގެން ތަފާތު އެކި ވައްތަރުގެ ޖޫސް ތައްޔާރުކޮށް ގައިގެ ހަންގަނޑު ރީތިކޮށް އޮމާންކޮށް ބެހެއްޓުމަށް އެކި ވައްތަރުގެ ފޭސް މާސްކްވެސް ތައްޔާރު ކުރެވިދާނެއެވެ.
މީގެއިތުރުން އިސްތަށިގަނޑު ވަރުގަދަކުރުމަށް ހިކަނދިފަތް ބޭނުންކޮށްގެން އެކަމަށް ހާއްސަ ހެއަ މާސްކް ވެސް ތައްޔާރުކޮށްލެވިދާނެއެވެ. އެހެންކަމުން މިއީ ކެއުމުގެތެރޭގައި އެއްގޮތަކަށް ވެސް އެއްކައިރި ކޮށްލުމަށްފަހު އުކާލަން ރަނގަޅު ބާވަތެއް ނޫނެވެ.